ރައީސް އިބްރާހީމް މުހައްމަދު ސޯލިހު ކުރައްވަން ނިންމަވާފައިވާ މަސައްކަތްޕުޅުތައް ކުރެއްވުމުގައި ރައްޔިތުންގެ މަޖިލީހުން ވީ އެންމެ ބޮޑަކަށް އެމަނިކުފާނަށް އެހީތެެރިވާނެ ކަމަށް އެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްުޔިތުންގެ މަޖިލިސް މި އަހަރަށް ހުޅުވަން ބޭއްވި ޖަލްސާގައި ރައީސް ސޯލިހު މިއަހަރުގެ ރިޔާސީ ބަޔާން އިއްވަވައި ނިންމެވުމުން، އެ ޖަލްސާ ނިންމައިިލުމުގެ ގޮތުން ވާހަކަފުޅުދައްކަވަމުން ނަޝީދު ވިދާޅުވީ، މިދިޔަ އަހަރު ރާއްޖެއަށް ދިމާވި ކަންކަމާ ގުޅޭ ގޮތުން ރިޔާސީ ބަޔާނުގައި ރައީސް ވާހަކަފުޅު ދެއްކެވީ ވަރަށް ތަފްސީލުކޮށް ކަމަށެވެ. އަދި ކުރިއަށް އޮތް އަހަރު ގެންގުޅުއްވާނެ ސިޔާސަތުތައް އެ މަނިކުފާނު ވަރަށް ސާފުކޮށް ހާމަކޮށްދެއްވި ކަމަށް ވެސް ނަޝީދު ވިދާޅުވި އެވެ.
"އަޅުގަނޑު ރައީސުލް ޖުމްހޫރިއްޔާއަށް އިންތިހާއަށްް ޝުކުރުދަންނަވަން. އަދި ރައީސުލް ޖުމްހޫރިއްޔާއަށް ޔަގީންކޮށް އަރުވަން މި އިއްޒަތްތެރި މަޖިލީހުން، މަނިކުފާނު ތިޔަ ކުރެއްވުމަށް ނިންމަވާފައިވާ ކަންކަން ކުރެއްވުމުގައި އަޅުގަނޑުމެނަށް ވީ އެންމެ ފުންމިނަކުން ބޮޑުމިނަކުން އިރާދަކުރެއްވިއްޔާ އެހީތެރިކަން ފޯރުކޮށްދޭނަން،" ނަޝީދު ވިދާޅުވި އެވެ.
އެއާކު ރައްޔިތުނަށް އެމަނިކުފާނު އިލްތިމާސް ކުރެއްވީ ކޮވިޑް-19 ގެ ބަލިމަޑުކަމުން އަރައިގަތުމަށްޓަކައި އަޅަން ޖެހޭ ރައްކާތެރިކަމުގެ ފިޔަވަޅުތަކަށް ސަމާލުކަން ދިނުމަށާއި ކޮވިޑުން ދިފާއުވާ ވެކްސިން ޖެހުމަށެވެ.
ރިޔާސީ ބަޔާނުގައި ރައީސް ވެސް ރައްޔިތުންގެ މަޖިލީހުގެ މެމްބަރުންނަށް ޝުކުރުއަދާކުރެއްވި އެވެ. އެމަނިކުފާނު ވިދާޅުވީ މިދިޔަ ދަތިދުވަސްތަކުގައި މަޖިލީހުން ކުރި ބުރަމަސައްކަތްތައް ފާހަގަކުރައްވާ ކަމަށެވެ.
"މިދިޔަ ދަތި އުނދަގޫ ދުވަސްތަކުގެ ތެރޭގާ ވަކިން ހާއްސަކޮށް މިއިއްޒަތްތެރި މަޖިލީހަށް ނުހަނު ހައްސާސް ދަނޑިވަޅެއްގައި، ކުރެއްވި ބުރަ މަސައްކަތް އަޅުގަނޑު ފާހަގަކޮށް ތިޔަ ހުރިހާ އިއްޒަތްތެރި މެމްބަރުންނަށާ މަޖިލީހުގެ އިއްޒަތްތެރި ރައީސަށް ވަރަށް އިހުލާސްތެރި ޝުކުރު ދަންނަވަން،" ރައީސް ވިދާޅުވި އެވެ.
އެމަނިކުފާނު އިއްވެވި ރިޔާސީ ބަޔާނުގައި ސަރުކާރުން ކުރަން ގަސްދުކުރާ ގިނަ ކަންތައްތަކަކާއި ސަރުކާރަށް މިހާތަނަށް ހާސިލުކުރެވުނު މަސައްކަތްތަކާ ބެހޭ ގޮތުން ވަަރަށް ތަފްސީލުކޮށް ވާހަކަ ދެއްކެވި އެވެ. އެމަނިކުފާނުގެ ވާހަކަފުޅު ގާތްގަނޑަކަށް ގަޑިއެއްހާ އިރަށް ދެމިގެން ދިޔަ އެވެ.
