މެންޗެސްޓާ (ފެބްރުއަރީ 2) - ގެވެށި އަނިޔާގެ މައްސަލަ އާއި ރޭޕް އަދި މީހަކު މަރާލަން އިންޒާރު ދިނުމުގެ ތުހުމަތުގައި ފުލުހުންގެ ބެލުމުގެ ދަށުގައި ހުރި މެންޗެސްޓާ ޔުނައިޓެޑްގެ ފޯވާޑް މޭސަން ގްރީންވުޑް، ކަފާލާތުގެ ދަށުން މިއަދު ދޫކޮށްލައިފި އެވެ.
މިދިޔަ އާދިއްތަ ދުވަހު އުމުރުން 20 އަހަރުގެ ގްރީންވުޑް ހައްޔަކުރީ، އޭނާގެ ލޯބިވެރިޔާ ހެރިއަޓް ރޮބްސަން ސޯޝަލް މީޑިއާގައި އާންމުކުރި ފޮޓޯތަކާއި ވޮއިސް ނޯޓަށް ފަހު އެވެ.
ފޮޓޯތަކުން ފެންނަ މަންޒަރުތަކަށް ބަލާއިރު، ހެރިއަޓްގެ އަނގަމަތި ފަޅައިގެން ގޮސް ލޭ އޮހޮރެ އެވެ. އަދި ދައުރުވަމުން އަންނަ ވޮއިސް ނޯޓުން އިވޭ އަޑުތަކަށް ބަލާއިރު، ހެރިއަޓްގެ ނުރުހުމުގައި ގްރީންވުޑް ޖިންސީ އެދުން ފުއްދަން އުޅޭ އަޑުއިވެ އެވެ. ހެރިއަޓް ވަނީ ވީޑިއޯގައި މިއީ ގްރީންވުޑް އޭނާ އަށް ދީފައިވާ އަނިޔާ ކަމަށް ތަކުރާރުކޮށް ބުނެފަ އެވެ.
ގްރީންވުޑް ހައްޔަރުގައި ބަހައްޓާފައި ހުރިތާ ދެ ދުވަސް ފަހުން އިއްޔެ، ފުލުހުން ވަނީ ގްރީންވުޑް ޖަލުގައި ބަހައްޓައިގެން ތަހުގީގުކުރާ މުއްދަތު އިތުރުކުރަން ނިންމާފައިވާ ކަމަށް ބުނެފަ އެވެ. އެއީ އޭނާގެ އިތުރު މައްސަލަތަކެއް ފެންމަތިވުމުންނެވެ. އެއީ ގެވެށި އަނިޔާ އާއި ރޭޕްގެ ތުހުމަތުގެ އިތުރުން "މީހަކު މަރާލުމަށް" މަސައްކަތް ކޮށްފައިވާތީ ގްރީންވުޑްގެ މައްޗަށް ހިންގޭ ތަހުގީގުގެ ސުވާލުތައް ކުރުމުގެ ގޮތުންނެވެ.
ޔުނައިޓެޑުން ވަނީ ގްރީންވުޑް އެ ކްލަބްގެ ހަރަކާތްތަކުން މުއްދަތެއް ނެތް ގޮތަށް ސަސްޕެންޑްކޮށްފަ އެވެ. ޔުނައިޓެޑްގެ މާޗެންޑައިސް ޝޮޕްތަކުން ގްރީންވުޑާ ގުޅޭ ހުރިހާ އެއްޗެއް ނަގާފައިވާއިރު، އެ ކްލަބްގެ ގިނަ ކުޅުންތެރިން ވަނީ ސޯޝަލް މީޑިއާގައި ގްރީންވުޑް، އަންފޮލޯ ކޮށްފަ އެވެ. އޭގެ ތެރޭގައި ކްރިސްޓިއާނޯ ރޮނާލްޑޯ، ޕައުލް ޕޮގްބާ، ޑޭވިޑް ޑެހެއާ، މާކަސް ރެޝްފޯޑް، ޖެސީ ލިންގާޑް އަދި އަލެކްސް ޓެލޭސް ހިމެނެ އެވެ.
ޒުވާން ތަރި ގްރީންވުޑާ މެދު ނައިކީ އާއި އީއޭ ސްޕޯޓްސް އިން ވެސް ވަނީ ފިޔަވަޅު އަޅައިފަ އެވެ. ނައިކީން ވަނީ ގްރީންވުޑާ އެކު އޮތް ސްޕޮންސަޝިޕް އެއްބަސްވުން މި ވަގުތަށް ސަސްޕެންޑްކޮށްފަ އެވެ. އީއޭ ސްޕޯޓްސް އިން ވަނީ ފީފާ22 އިން ގްރީންވުޑްގެ ހުރިހާ ބައެއް އުނިކޮށްފަ އެވެ.
ޔުނައިޓެޑްގެ އެކެޑަމީ ގްރެޖުއޭޓެއްގެ ގޮތުގައި ފުރަތަމަ ޓީމަށް ގްރީންވުޑް ޕްރޮމޯޓްކުރީ 2019 ވަަނަ އަހަރުގެ މާޗް މަހުގަ އެވެ. ޔުނައިޓެޑްގެ ސީނިއާ ޓީމަށް ގަވާއިދުން ކުޅެމުން އައި ގްރީންވުޑް ވެފައިވަނީ ޓީމުގެ މުހިންމު ކުޅުންތެރިއަކަށެވެ. އިންގްލެންޑް ގައުމީ ޓީމުން ވެސް ޖާގަ ހޯދި ގްރީންވުޑް، ޔުނައިޓެޑުގައި ދައްކަމުން އައި މޮޅު ކުޅުމުގެ ސަބަބުން އެ ކްލަބުން ވަނީ މިދިޔަ އަހަރުގެ ފެބްރުއަރީ މަހު ގްރީންވުޑަށް ހަތަރު އަހަރުގެ ކޮންޓްރެކްޓެއް ދީފަ އެވެ. އެކަމަކު، މިހާރު ގްރީންވުޑްގެ މައްޗަށް އެ ކުރާ ތުހުމަތުތަކުގެ ތަހުގީގު ނިމޭ ގޮތަކުން ޔުނައިޓެޑުން އޭނާގެ ކޮންޓްރެކްޓް އުވާލުމުގެ ފުރުސަތު އެބައޮތެވެ.
