އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި، ތ. ވިލުފުށި އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވޯޓުލުމަށް ރަޖިސްޓަރީވެފައިވާ މީހުންގެ ތެރެއިން ކޮވިޑު ޖެހިފައިވާ މީހުނަށް ވޯޓުލެވޭ ގަޑި އިލެކްޝަންސް ކޮމިޝަނުން އާންމުކޮށްފި އެވެ.
އިލެކްޝަންސް ކޮމިޝަނުން އިއްޔެ ކުރި އިއުލާނެއްގައި ބުނީ އެ ބައި-އިލެކްޝަންތަކުގައި ވޯޓުލުމަށް ރަޖިސްޓަރީވެފައިވާ މީހުންގެ ތެރެއިން ކޮވިޑަށް ޕޮޒިޓިވްވެފައިވާ މީހުންގެ އިތުރުން ކަރަންޓީނުގައި ތިބޭ މީހުން ވޯޓުލުމަށް ކަނޑައެޅިފައިވަނީ ހޮނިހިރު ދުވަހުގެ މެންދުރުފަހު 3:00 އިން ހަވީރު 4:00އަށް ކަމަށެވެ.
"މިފަދަ މީހުން ވޯޓުލާ މަރުކަޒަށް ވޯޓުލުމަށް ވަޑައިގަންނަވާއިރު ހެލްތު ޕްރޮޓެކްޝަން އެޖެންސީއިން ކަނޑައަޅާފައިވާ ރައްކާތެރިކަމުގެ ފިޔަވަޅުތައް އަޅުއްވައިގެން ވަޑައިގެންދެއްވުން އެދެމެވެ،" އެ އިއުލާނުގައި ބުންޏެވެ.
އަންނަ ހޮނިހިރު ދުވަހު ބާއްވާ ކޮމަންޑޫ ދާއިރާގެ ބައި-އިލެކްޝަންގައި ވާދަކުރައްވަނީ އެމްޑީޕީގެ ފަރާތުން މުހައްމަދު ރާޝިދާއި ޕީޕީއެމްގެ ފަރާތުން މޫސާ ފަތުހީގެ އިތުރުން އެމްއެންޕީގެ ފަރާތުން އަބްދުލްހަންނާން އިދުރީސް އެވެ.
ކޮމަންޑޫ ދާއިރާގެ ތިން ރަށުގެ އިތުރުން މާލޭގައި ވެސް ވޯޓު ފޮއްޓެއް ބަހައްޓާނެ ކަމަށް އިލެކްޝަންސުން ވަނީ ބުނެފަ އެވެ. އެއީ ކޮންމެ ރަށަކަށް ދެ ފޮށީގެ އިތުރުން މާލޭ އިސްކަންދަރު ސްކޫލުގައި ބަހައްޓާ ތިން ފޮއްޓެވެ.
ބައި އިލެކްޝަނަށް ތައްޔާރުވެފައި ވާއިރު އެ ދާއިރާގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު ވަނީ އާންމުކޮށްފަ އެވެ.
އެ ލިސްޓްގައިވާ ގޮތުން ބައި އިލެކްޝަންގައި ވޯޓް ދިނުމުގެ ހައްގު އެ ދާއިރާގެ ތިން ރަށް ކަމަށްވާ ކޮމަންޑޫ އާއި ފޯކައިދޫ އަދި މަރޮށީގެ 3،309 މީހަކަށް ލިބިގެންވެ އެވެ. އެއީ ފެބްރުއަރީ ފަސްވަނަ ދުވަހުގެ ނިޔަލަށް އުމުރުން 18 އަހަރު ފުރޭ އެ ދާއިރާއަށް ނިސްބަތްވާ މީހުންގެ އަދަދެވެ.
ކޮމަންޑޫ ދާއިރާގެ ކެމްޕެއިންގެ ހަރަކާތްތައް ވާދަކުރާ ޕާޓީތަކުގެ ފަރާތުން އަންނަނީ ފޯރިއާއެކު ކުރިޔަށް ގެންދަމުންނެވެ. އެމްޑީޕީގެ ކެންޑިޑޭޓަށް ތާއިދު ކުރުމަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީން ވަނީ ނިންމާފަ އެވެ. އެމްއާރުއެމްއިން ވަކި ކެންޑިޑޭޓަކަށް ތާއީދު ނުކުރެ އެވެ.
އިންތިހާބަށް ވަގުތު ކުޑަތަން ވެފައި ވަނިކޮށް އެ ދާއިރާގައި ގިނަ މަޝްރޫއުތަކެއް ސަރުކާރުން ފެށުމާއި ގުޅިގެން އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ. އެގޮތުން އެންމެ ބޮޑު ފާޑުކިޔުމެއް އަމާޒުވެފައި ވަނީ ކޮމަންޑޫ އާއި އެ ރަށާ ޖެހިގެން އޮންނަ ކުޑަ ފަޅު ރަށް މަތިކޮމަންޑޫ ގުޅާލުމަށް ސަރުކާރުން ފެށި ޕްރޮޖެކްޓަށެވެ.
އެއީ އިންތިހާބަށް ނުފޫޒު ފޯރުމުގެ ގޮތުން ކުރިޔަށްގެންދާ ޕްރޮޖެކްޓެއް ކަމަށް ބުނެ އަމިއްލަ ފަރާތަކުން ވަނީ އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ވެސް ހުށަހަޅާފަ އެވެ.
