މެންޗެސްޓާ (ފެބްރުއަރީ 1) - ގެވެށި އަނިޔާގެ މައްސަލައިގައި ފުލުހުންގެ ބެލުމުގެ ދަށުގައި ހުރި މެންޗެސްޓާ ޔުނައިޓެޑްގެ ފޯވާޑް މޭސަން ގްރީންވުޑްގެ ހައްޔަރުގެ މުއްދަތު އިތުރުކުރަން ނިންމައިފި އެވެ.
މިދިޔަ އާދިއްތަ ދުވަހު އުމުރުން 20 އަހަރުގެ ގްރީންވުޑް ހައްޔަކުރީ، އޭނާގެ ލޯބިވެރިޔާ ހެރިއަޓް ރޮބްސަން ސޯޝަލް މީޑިއާގައި އާންމުކުރި ފޮޓޯތަކާއި ވޮއިސް ނޯޓަށް ފަހު އެވެ. ފޮޓޯތަކުން ފެންނަ މަންޒަރުތަކަށް ބަލާއިރު، ހެރިއަޓްގެ އަނގަމަތި ފަޅައިގެން ގޮސް ލޭ އޮހޮރެ އެވެ. އަދި ދައުރުވަމުން އަންނަ ވޮއިސް ނޯޓުން އިވޭ އަޑުތަކަށް ބަލާއިރު، ހެރިއަޓްގެ ނުރުހުމުގައި ގްރީންވުޑް ޖިންސީ އެދުން ފުއްދަން އުޅޭ އަޑުއިވެ އެވެ.
މެންޗެސްޓާ ފުލުހުންގެ ތަރުޖަމާނު މެދުވެރިކޮށް އާދިއްތަ ދުވަހުގެރޭ ނެރުނު ބަޔާނެއްގައި ބުނެފައިވަނީ، ސޯޝަލް މީޑިއާގައި އާންމުވި ގެވެށި އަނިޔާގެ މައްސަލައެއްގައި 20 އަހަރުގެ ފިރިހެނަކު (ގްރީންވުޑް) ހައްޔަރުކޮށްފައިވާ ކަމަށެވެ. އަދި އޭނާ ހައްޔަރުކޮށްފައިވަނީ ގެވެށި އަނިޔާ އާއި ރޭޕްގެ މައްސަލައަކާ ގުޅިގެން ކަމަށާއި ތަހުގީގު ނިމެންދެން ކަމަށެވެ.
ފުލުހުން މިރޭ ނެރުނު ބަޔާނުގައިވަނީ ގެވެށި އަނިޔާ އާއި ރޭޕްގެ ތުހުމަތުގެ އިތުރުން "މީހަކު މަރާލުމަށް" މަސައްކަތް ކޮށްފައިވާތީ ގްރީންވުޑްގެ ތަހުގީގު އިތުުރަށް ކުރިއަށް ގެންދަން އޭނާގެ ހައްޔަރުކޮށްފައި ބަހައްޓާ މުއްދަތު އިތުރުކޮށްފައިވާ ކަމަށެވެ.
ޔުނައިޓެޑުން ވަނީ ގްރީންވުޑް އެ ކްލަބްގެ ހަރަކާތްތަކުން މުއްދަތެއް ނެތް ގޮތަށް ސަސްޕެންޑްކޮށްފަ އެވެ. ޔުނައިޓެޑްގެ މާޗެންޑައިސް ޝޮޕްތަކުން ގްރީންވުޑާ ގުޅޭ ހުރިހާ އެއްޗެއް ނަގާފައިވާއިރު، އެ ކްލަބްގެ ގިނަ ކުޅުންތެރިން ވަނީ ސޯޝަލް މީޑިއާގައި ގްރީންވުޑް، އަންފޮލޯ ކޮށްފަ އެވެ. އޭގެ ތެރޭގައި ޔުނައިޓެޑްގެ ކްރިސްޓިއާނޯ ރޮނާލްޑޯ، ޕައުލް ޕޮގްބާ، ޑޭވިޑް ޑެހެއާ، މާކަސް ރެޝްފޯޑް، ޖެސީ ލިންގާޑް އަދި އަލެކްސް ޓެލޭސް ހިމެނެ އެވެ.
ގްރީންވުޑާ މެދު ނައިކީ އާއި އީއޭ ސްޕޯޓްސް އިން ވެސް ވަނީ ފިޔަވަޅު އަޅައިފަ އެވެ. ނައިކީން ވަނީ ގްރީންވުޑާ އެކު އޮތް ސްޕޮންސަޝިޕް އެއްބަސްވުން މި ވަގުތަށް ސަސްޕެންޑްކޮށްފަ އެވެ. އީއޭ ސްޕޯޓްސް އިން ވަނީ ފީފާ22 އިން ގްރީންވުޑްގެ ހުރިހާ ބައެއް އުނިކޮށްފަ އެވެ.
