ޕަބްލިކް ސާވިސް މީޑިއާ (ޕީއެސްއެމް) ގެ މާލީ ހިސާބުތައް ބަލަހައްޓަނީ އެ ކުންފުންޏަށް ލިބޭ އާމްދަނީ އާއި ހަރަދު ކުރާ ފައިސާގެ ސައްހަކަން ކަށަވަރު ނުކުރެވޭނެ ގޮތަށް ކަމަށް އެ އޮޑިޓާ ޖެނެރަލްގެ އޮފީހުން ބުނެފި އެވެ.
ޕީއެސްއެމްގެ 2017 އާއި 2018 އާއި 2019 ވަނަ އަހަރުގެ މާލީ ހިސާބުތައް އޮޑިޓު ކުރުމަށްފަހު އޮޑިޓާ ޖެނެރަލްގެ އޮފީހުން އާންމުކޮށްފައިވާ ރިޕޯޓުތައް ދައްކާ ގޮތުން އެ އަހަރުތަކުގެ ކުންފުނީގެ އާމްދަނީ އައީ ހަރަދުތައް ހިނގާފައިވާ ގޮތް ހިސާބުތަކުން އެނގޭކަށް ނެތެވެ.
އެގޮތުން، 2017 ވަނަ އަހަރުގެ ނިޔަލަށް އާމްދަނީގެ ގޮތުގައި ލިބުނު ކަމަށް ރިޕޯޓުކޮށްފައިވާ 53.9 މިލިއަން ރުފިޔާގެ ސައްހަކަން ކަށަވަރު ކުރެވޭނެ ގޮތެއް ނެތް ކަމަށް އޮޑިޓުގައި ބުނެފައިވެ އެވެ.
ހަމަ އެގޮތަށް ކަމާ ގުޅޭ ލިޔުން ނެތުމުން، 2018 ވަނަ އަހަރު ލިބުނު ކަމަށް ބުނާ 39.6 މިލިއަން ރުފިޔާ އާއި 2019 ވަނަ އަހަރުގެ އާމްދަނީގެ ގޮތުގައި ލިބުނު ކަމަށް ބުނާ 22.2 މިލިއަން ރުފިޔާގެ ސައްހަކަން ވެސް ކަށަވަރުނުވާ ކަމަށް އޮޑިޓު އޮފީހުން ބުނެ އެވެ.
އާމްދަނީގެ އިތުރުން، އެ ތިން އަހަރު ޕީއެސްއެމުން ހަރަދުގެ ގޮތުގައި ބަޔާންކޮށްފައިވާ ޖުމްލަ 600 މިލިއަނެއްހާ ރުފިޔާގެ ސައްހަކަން ވެސް ކަށަވަރު ކުރެވޭނެ ގޮތެއް ނެތް ކަމަށް އޮޑިޓު އޮފީހުން ބުންޏެވެ. އަދި 2017 ގައި ޕީއެސްއެމް ބަޖެޓަށް ފިނޭންސް މިނިސްޓްރީން ދޫކުރި 88.1 މިލިއަން ރުފިޔާ އާއި 2018 ގައި ދޫކުރި 142 މިލިއަން ރުފިޔާގެ އިތުރުން 2019 ގައި ލިބުނު 129.9 މިލިއަން ރުފިޔާގެ ހިސާބުތައް ވެސް ބަލަހައްޓާފައިނުވާ ކަމަށް އެ އޮޑިޓު ރިޕޯޓުތަކުން ދައްކަ އެވެ.
އޭގެ އިތުރުން، ގާނޫނުގެ ދަށުން ޕީއެސްއެމުން ވެސް ބިޒްނަސް ޕްރޮފިޓް ޓެކްސް އާއި އިންކަމް ޓެކްސް ދައްކަން ލާޒިމުކޮށްފައިވީ ނަމަވެސް، ކުންފުނީގެ މާލީ ހިސާބުތަކުގައި ޓެކްސް ޕްރޮވިޝަން ހަދާފައިނުވާކަން އެ ތިން އަހަރުގެ އޮޑިޓު ރިޕޯޓުގައި ވެސް ފާހަގަކޮށްފައި ވެއެވެ.
