ޕެރިސް، ފްރާންސް (ޖެނުއަރީ 28) - ފާއިތުވި 52 އަހަރު ތެރޭގައި ފްރާންސްގެ އިގްތިސާދަށް ނުލިބޭ ވަރުގެ ބޮޑު ކުރިއެރުމެއް 2021 ވަނަ އަހަރު ލިބިއްޖެ އެވެ.
އިންސީ ސްޓެޓިސްޓިކްސް އިންސްޓިޓިއުޓުން ބުނީ 2021 ވަނަ އަހަރު އެ ގައުމުގެ އިގްތިސާދަށް 7.0 ޕަސެންޓުގެ ކުރިއެރުމެއް އައި ކަމަށެވެ. އެއީ ކުރިން އަންދާޒާ ކުރި ވަރަށް ވުރެ އިތުރެވެ.
ވިހި ވިހި ވަނަ އަހަރު ފްރާންސްގެ އިގްތިސާދު 7.9 ޕަސެންޓް ފަހަތަށް ޖެހުމަށް ފަހު، މިދިޔަ އަހަރު އުފެއްދުންތެރިކަން ހުރީ 2019 ވަނަ އަހަރަށް ވުރެ ދަށުގަ އެވެ.
ނަމަވެސް އިންސީއިން ބުނީ 2019 ވަނަ އަހަރުގެ ފަހު ކުއާޓާއާ އަޅާ ބަލާއިރު، 2021 ވަނަ އަހަރުގެ އޮކްޓޯބަރު މަހުން ޑިސެމްބަރު މަހަށް ޖީޑީޕީ އިތުރުވި ކަމަށެވެ.
ފިނޭންސް މިނިސްޓަރު ބްރޫން ލެ މެއާ ވިދާޅުވީ އެއީ "ފާހަގަކުރެވޭ ބޮޑު ކުރިއެރުމެއް" ކަމަށާއި އޭގެ ސަބަބުން "އިގްތިސާދީ ކާރިސާ ފޮހެވިއްޖެ" ކަމަށެވެ. އަދި އެއީ "ސަރުކާރުގެ އިގްތިސާދީ ސިޔާސަތުގެ ކާމިޔާބުކަމުގެ ހެއްކެއް" ކަމަށް ވިދާޅުވި އެވެ.
މިދިޔަ އަހަރު އިގްތިސާދީ ރަނގަޅު ކުރަން ފްރާންސްގެ ސަރުކާރުން 67 ބިލިއަން ޑޮލަރު (60 ބިލިއަން ޔޫރޯ) ހޭދަކުރި އެވެ. އެއާއެކު ސަރުކާރުގެ ދަރަނި ވެސް 113 ޕަސެންޓު އުފުލުނެވެ.
މިދިޔަ އަހަރުގެ ފަހު ކުއާޓާގައި ފްރާންސްގައި ވަޒީފާ ނެތް މީހުންގެ އަދަދުތައް 10 އަހަރުގެ ތެރޭގައި ތިރިނުވާހާ ބޮޑަށް ތިރިވި އެވެ.
ސަރުކާރުން ލަފާކުރާ ގޮތުގައި 2022 ވަނަ އަހަރު އިގްތިސާދް ހަތަރު ޕަސެންޓުން ފުޅާވާނެ އެވެ. ނަމަވެސް ބޭންކް އޮފް ފްރާންސުން އަންދާޒާ ކުރަނީ 3.6 ޕަސެންޓްގެ ކުރިއެރުމެކެވެ.
