ޓޯކިޔޯ، ޖަޕާން (ޖެނުއަރީ 28) - ޖަޕާނުގައި ޑޮކްޓަރަކު ރަހީނުކޮށް، ބަޑި ޖަހައި މަރާލިކަމުގެ ތުހުމަތުގައި މީހަކު ހައްޔަރުކޮށްފި އެވެ.
ބަޑި ގެންގުޅެވޭނެ ގޮތްތަކަށް ހަރުކަށި ގަވާއިދުތައް ހަދާފަފައިވާ ޖަޕާނުގައި އެފަދަ ހަތިޔާރަކުން ކުށް ކުރުން ވަރަށް މަދެވެ. އެހެންކަމުން ޓޯކިޔޯ ކައިރީގައި އޮންނަ ފުޖިމިނޯ ސިޓީގައި ހިންގި ހާދިސާއާ ގުޅިގެން އާއްމުން ތިބީ ޝޮކެއްގަ އެވެ.
"ތުހުމަތު ކުރެވޭ މީހާ ބޭނުން ކުރީ ޝިކާރަ ކުރާއިރު ގެންގުޅޭ ބާވަތުގެ ރައިފަލް ބަޑިއެއް. އޭނާ ބަޑި ޖެހީ މަރާލުމުގެ ނިޔަތުގައި،" ފުލުހުންގެ ތަރުޖަމާނަކު އޭއެފްޕީއަށް ބުންޏެވެ.
ތަރުޖަމާނު ބުނީ އުމުރުން 66 އަހަރުގެ މީހާ ހައްޔަރުކޮށްފައިވާ އިރު، އެ ހާދިސާ ހިނގީ ބުރާސްފަތި ދުވަހުގެ ރޭ އޭނާގެ ގޭގައި ކަމަށެވެ. އޭނާ ބަޑި ޖެހުމުގެ ސަބަބުން ވަރަށް ބޮޑަށް ޒަހަމްވެފައިވާ ފިޒިއޮތެރަޕިސްޓަކަށް މިހާރު ދަނީ ފަރުވާދެމުންނެވެ.
މަރުވި ޑޮކްޓަރާއި، ފިޒިއޮތެރަޕިސްޓް އަދި މެޑިކަލް ޓީމްގެ އިތުރު މެމްބަރަކު އެ ގެޔަށް ދިޔައީ ތުހުމަތުވާ މީހާގެ މަންމަ މަރުވުމުން، ތައުޒިޔާގެ ޒިޔާރަތެއްގައި ކަމަށް ޖަޕާނުގެ މީޑިއާއިން ބުންޏެވެ.
އެންއެޗްކޭއިން ބުނީ ތުހުމަތުވާ މީހާ އެ ގޭގައި ދިރިއުޅެން ފެށީ މީގެ ތިން އަހަރު ކުރިން ކަމަށާއި އޭނާ އެ ގޭގައި ހުންނަނީ މަންމަގެ ކަންކަން ބަލައިދިނުމަށް ކަމަށެވެ.
"މަންމަ ބަލިވެ އުޅޭތީ މި ނެއިބާހުޑްގައި ކުރާ ކަންކަމުގައި ބައިވެރިނުވެވޭ ކަމަށް އޭނާ ބުނި،" އެ ސަރަހައްދުގައި ދިރިއުޅޭ މީހަކު އެންއެޗްކޭއަށް ބުންޏެވެ.
އެ ހިސާބުގައި ދިރިއުޅޭ އުމުރުން 19 އަހަރުގެ ދަރިވަރަކު ކިޔޯޑޯ ނިއުސްއަށް ބުނީ ބުރާސްފަތި ދުވަހުގެ ރޭ ބަޑީގެ އަޑު އިވުނު ކަމަށާއި "ބޭނުންވީ ބިރުން އެ ހިސާބުން ދުރަށް ދާން" ކަމަށެވެ.
ރިޕޯޓުތައް ބުނާ ގޮތުން އެ ހާދިސާ ހިނގަމުން ދިޔައިރު، މެޑިކަލް ޓީމްގެ ތިން ވަނަ މީހާގެ ގަޔަށް ޕެޕާ ސްޕްރޭ ޖެހި އެވެ. ނަމަވެސް އޭނާ ވަނީ ގެއިން ނުކުމެގެން ގޮސް، ބަޔަކު ރަހީނުކޮށްގެން އުޅޭކަން ފުލުހުންނަށް އަންގާފަ އެވެ.
ބުރާސްފަތި ދުވަހުގެ ރޭ ފުލުހުން ވަނީ ތުހުމަތުވާ މީހާއަށް ފޯނުން ގުޅައި، ރަހީނުކޮށްފައި ތިބި ދެ މީހުން ދޫކޮށްލަން އޭނާއަށް ވިސްނައިދޭން ވަރަށް މަސައްކަތްކޮށްފަ އެވެ. ނަމަވެސް 11 ގަޑިއިރު ވަންދެން އޭނާ ދޫނުދީ ހިފެހެއްޓި އެވެ.
