ރާއްޖޭގައި ތިބި އެންމެ އުމުރުން ދޮށީ މީހުންގެ ތެރޭގައި ހިމެނޭ އެކަކު ކަމުގައިވާ ޏ. ފުވަމުލަކަށް ނިސްބަތްވާ އަލީ ސުލައިމާން (އަލިބެ) މިއަދު ހެނދުނުގެ ވަގުތެއްގައި މަރުވެއްޖެ އެވެ.
އަލީ ސުލައިމާން މަރުވި އިރު އުމުރަކީ 104 އަހަރެވެ. އޭނާ މަރުވި އިރު ދިރިއުޅެމުން ދިޔައީ މާލޭގަ އެވެ. އަދި މަރުވި ފަހުން ހެދި ޓެސްޓުތަކުން އޭނާ ވަނީ ކޮވިޑަށް ފައްސިވެފައިކަން ހާމަވެފައިވުމާ އެކު އޭނާގެ ޖަނާޒާ ބާއްވާފައި ވަނީ މިއަދު ހުކުރު ނަމާދަށްފަހު ހުޅުމާލޭ ސަހަރާ މިސްކިތުގަ އެވެ.
އަލީ ސުލައިމާން ނިޔާވުމާ ގުޅިގެން ރައްޔިތުންގެ މަޖިލީހުގެ ރައީސް މުހަންމަދު ނަޝީދު ވަނީ އެ އާއިލާއަށް ތައުޒިޔާ ވިދާޅުވުމުގެ ގޮތުން އޮފިޝަލް ޓްވިޓާ އެކައުންޓުގައި ޓްވީޓެއް ކުރައްވާފަ އެވެ.
އަލިބެ ނިޔާވި އިރު ކޮވިޑަށް ފައްސިވެފައިވީ ނަމަވެސް އޭނާގެ މަރުގެ ސަބަބަކީ ކޮވިޑަށް ފައްސިވުން ކަމުގައި އެޗްޕީއޭއިން އިއުލާނުކޮށްފައެއްނުވެ އެވެ.
މިހާތަނަށް ރާއްޖޭގައި ކޮވިޑް ބަލީގައި 274 މީހުން މަރުވެފައިވާކަމަށް އެޗްޕީއޭގެ ތަފާސްހިސާބުތަކުން ދައްކަ އެވެ. ރާއްޖޭގަ ކޮވިޑަށް ފައްސިވެފައިވާ މީހުންގެ އަދަދު މިހާރު 16،950 އަށް އަރާފައިވާ އިރު، 54 މީހަކަށް މިވަގުތު ހޮސްޕިޓަލުގައި ފަރުވާ ދެވެމުން ދާކަން އެޗްޕީއޭއިން ހާމަކޮށްފައިވެ އެވެ.
