މެލްބަން، އޮސްޓްރޭލިއާ (ޖެނުއަރީ 26) - ސްޕެއިނުގެ މަޝްހޫރު ކުޅުންތެރިޔާ ރަފައެލް ނަޑާލަށް ޓެނިސް އަމްޕަޔަރުން ހާއްސަ އަހައްމިއްޔަތެއް ދޭ ކަމަށް ބުނެ، އޮސްޓްރޭލިއަން އޯޕަން ކުއާޓާ ފައިނަލުގައި އޭނާ އަތުން ބަލިވި ކެނަޑާގެ ޑެނިސް ޝަޕަވަލޯފް ތުހުމަތެއް ކޮށްފި އެވެ.
އޮސްޓްރޭލިއަން އޯޕަންގެ ކުއާޓާ ފައިނަލުގައި ޝަޕަވަލޯފް ވަނީ ނަޑާލާ ވާދަކޮށް ފަސް ސެޓު ކުޅެގެން ބަލިވެފަ އެވެ. އެ މެޗުގެ ސެޓުތައް ދިޔައީ 6-3 6-4 4-6 3-6 6-3 އިންނެވެ.
މި މެޗުގެ ދެ ވަނަ ސެޓު ފެށުނު ތަނުން ޝަޕަވަލޯފް ވަނީ ނަޑާލް ގަސްދުގައި މެޗު ލަސްކުރަން މަސައްކަތް ކުރާ ކަމަށް ބުނެ، އޭނާ އަށް ފިޔަވަޅު އަޅަން އަމްޕަޔަރަކަށް ހުރި ކާލޯސް ބަނާޑޭސް ކައިރީގައި އެދިފަ އެވެ. އެ އެޕީލަށް އަމްޕަޔަރު ކާލޯސް ފިޔަވަޅު ނާޅަން ނިންމުމާ އެކު ޝަޕަވަލޯފް ރުޅިގަނޑު ފަޅައިގެން ގޮސް "ތި އެންމެން ތިބެނީ ކޮރަޕްޓްވެފައި" ކަމަށް ވަނީ ބުނެފަ އެވެ.
ޝަޕަވަލޯފް (ވ) މެޗުގެ ތެރެއިން އަމްޕަޔަރާ ވާހަކަދައްކަނީ.-- ފޮޓޯ: އޭއެފްޕީ
މެޗަށް ފަހު އޮތް ނޫސްވެރިންގެ ބައްދަލުވުމުގައި ޝަޕަވަލޯފް ވަނީ މެޗުގެ ތެރޭގައި އެ ގޮތަށް ޖަޒުބާތީ ވެގެން ވާހަކަ ދެކެވުނީތީ މާފަށް އެދިފަ އެވެ. އެކަމަކު، ހަގީގަތަކީ ނަޑާލަށް އަމްޕަޔަރުންގެ ފަރާތުން އަބަދުވެސް ހާއްސަ އަހައްމިއްޔަތެއް ލިބުން ކަމަށް ޝަޕަވަލޯފް ވަނީ ބުނެފަ އެވެ.
"ތިއީ 100 ޕަސެންޓް ޔަގީންކަމެއް. ނަޑާލަށް އަމްޕަޔަރުންގެ ފޭވާ ލިބޭ. މިއީ އަބަދުވެސް އަހަންނަށް ފެންނަ މަންޒަރެއް. ކޮންމެ ފަހަރަކު ވެސް މެޗުގެ ޕޭސް (ސްޕީޑު) އަވަސްވާއިރު ނަޑާލަށް ނުކުޅެވޭނެ ހާލަތު ދިމާވާ ފަހަރެއްގައި އަލުން ފަށަން ނަގާ ވަގުތު އާންމު އުސޫލަށް ވުރެ ލަސްވާނެ. މިއީ ނަޑާލަށް ފޭވާކުރަން ކުރެވޭ ކަމެއް،" އުމުރުން 22 އަހަރުގެ ޝަޕަވަލޯފް ބުންޏެވެ.
އޭނާ ބުނީ ނަޑާލަށް އަބަދުވެސް އިހުތިރާމްކުރާ ކަމަށާއި އެކަމަކު، އުސޫލާ ހިލާފަށް ކަންކަން ދާނަަމަ ބަސްބުނާނެ ކަމަށެވެ.
އުުމުރުން 35 އަހަރުގެ ނަޑާލް ބުނީ ޝަޕަވަލޯފަށް ހީވެފައި އޮތީ ގޯސްކޮށް ކަމަށެވެ. ޓެނިސް ކެރިއަރުގައި އެއްވެސް ވަގުތެއްގައި ރެފްރީގެ ފަރާތުން އޭނާ އަށް ހާއްސަ އަހައްމިއްޔަތެއް ލިބިފައިވާ ކަމަށް ގަބޫލުކުރެވެން ނެތް ކަމަށް ނަޑާލް ބުންޏެވެ. އަދި ޕޮއިންޓަކަށް ފަހު މެޗު ފަށާ އުސޫލާއި އަމްޕަޔަރު އަމަލުކުރަން ޖެހޭ ގަވާއިދު ލިޔެވިފައި ހުއްޓައި ވަކި ކުޅުންތެރިއަކަށް ވަކި ގޮތެއް ހެދިދާނެ ކަމަށް ނުބެލެވޭ ކަމަށް ނަޑާލް ވަނީ ބުނެފަ އެވެ.
ނަޑާލް، އެންމެ ފަހުން އޮސްޓްރޭލިއަން އޯޕަން ކާމިޔާބުކުރީ 2009 ވަަނަ އަހަރު އެވެ. ބަނޑަށް ލިބިފައިވާ އަނިޔާ އަކަށް ފަރުވާ ހޯދަމުން އަންނަ ނަޑާލް މި ފަހަރުގެ މުބާރާތުގެ ސެމީ ފައިނަލުގައި ކުޅޭނީ އިޓަލީގެ މަޓެއޯ ބެރެޓީނީއާ ދެކޮޅަށެވެ.
މި ފަހަރުގެ އޮސްޓްރޭލިއަން އޯޕަން ކާމިޔާބު ކުރެވިއްޖެނަމަ ނަޑާލަށް ގްރޭންޑް ސްލޭމް ރެކޯޑެއް ހެދޭނެ އެވެ. އެންމެ ގިނަ ގްރޭންޑް ސްލޭމް ހޯދުމުގެ ލިސްޓުގައި މި ވަގުތު ނަޑާލާއި ސާބިއާގެ ނޮވަކް ޖޮކޮވިޗާއި ސްވިޒަލެންޑްގެ ރޮޖާ ފެޑެރާ އޮތީ 20 ތަށްޓާ އެކު އެއްވަރުވެފަ އެވެ.
ފެޑެރާ އަނިޔާގެ ސަބަބުން މި ފަހަރުގެ އޮސްޓްރޭލިއަން އޯޕަންގައި ނުކުޅެ އެވެ. ޖޮކޮވިޗަށް ވާދަނުކުރެވުނީ ވިސާ މައްސަލައިގައި އޭނާ ޑިޕޯޓްކޮށްލަން އޮސްޓްރޭލިއާ ސަރުކާރުން ނިންމުމުންނެވެ.
