މެލްބަން (ޖެނުއަރީ 16) - ދުނިޔޭގެ އެއް ވަނަ ފިިރިހެން ޓެނިސް ކުޅުންތެރިޔާ ނޮވަކް ޖޮކޮވިޗްގެ ވިސާ އޮސްޓްރޭލިއާ އިމިގްރޭޝަނުން ދެ ވަނަ ފަހަރަށް ކެންސަލްކޮށްލީ ރަނގަޅަށް ކަމަށް ކަނޑައަޅައި، ކޯޓުން އެ ނިންމުން ދަމަހައްޓައިފި އެވެ.

ކޯޓުގެ މި ނިންމުމާ އެކު ޖޮކޮވިޗަށް މި ފަހަރު އޮސްޓްރޭލިއަން އޯޕަންގައި ނުކުޅެވޭނެ އެވެ.

މި މަހު ހަތަރު ވަނަ ދުވަހު އޮސްޓްރޭލިއަން އޯޕަންގައި ވާދަކުރަން ޖޮކޮވިޗް، 34، އޮސްޓްރޭލިއާ އަށް ދިޔަ ތަނުން އެއާޕޯޓުގައި މަޑުކޮށް އޭނާގެ ވިސާ އެންމެ ފުރަތަމަ ކެންސަލްކޮށްލި މައްސަލަ ކޯޓަށް ހުށަހަޅައިގެން އޭނާ ކާމިޔާބު ހޯދިއެވެ. އެ ފަހަރު ޖޮކޮވިޗްގެ ވިސާ ކެންސަލްކޮށްލީ ޖޮކޮވިޗް ކޮވިޑް ވެކްސިން ޖެހިކަމުގެ މައުލޫމާތު ދީފައިނުވާތީ އެވެ. ކޯޓުން ޖޮކޮވިޗަށް މައްސަލަ ކާމިޔާބުވީ ވެކްސިން މައުލޫމާތު ދީފައިނުވި ނަަމަވެސް ޖޮކޮވިޗް އަށް މިދިޔަ މަހު 16 ވަނަ ދުވަހު ކޮވިޑް ޖެހިފައިވާތީ، މެޑިކަލް އެގްޒެމްޕްޝަންގެ ތެރެއިން ވިސާ ލިބޭ ގޮތަށް އޮތުމުންނެވެ.

އެކަމަކު، ޖޮކޮވިޗްގެ ވިސާ އެޕްލިކޭޝަނުގައި ދީފައި ހުރި މައުލޫމާތު ދިމާނުވާތީ މިދިޔަ ހުކުރު ދުވަހު އޮސްޓްރޭލިއާގެ އިމިގްރޭޝަން މިނިސްޓަރު އަލެކްސް ހޯކް އަށް ގާނޫނުން ލިބިވަޑައިގަންނަވާ ބާރުގެ ބޭނުންކުރައްވައި ވަނީ ޖޮޮކޮވިޗްގެ ވިސާ ކެންސަލްކޮށްފަ އެވެ.

ޖޮކޮވިޗްގެ ގާނޫނީ ޓީމުން އެ މައްސަލަ އަނެއްކާ ވެސް ކޯޓަށް ވެއްދިއިރު، މިއަދު ކޯޓުން ނިންމީ ޖޮކޮވިޗާ ދެކޮޅަށެވެ. ޖޮކޮވިޗްގެ ވިސާ ކެންސަލްކޮށްލަން އޮސްޓްރޭލިއާގެ އިމިގްރޭޝަނުގެ ނިންމުން ކޯޓުގެ ތިން ފަޑިޔާރުންގެ އިއްތިފާގުން ދެމެހެއްޓީ އެވެ. އަދި މައްސަލަ ނިންމި ގޮތުގެ ތަފްސީލް ކުރިއަށް އޮތް ދުވަސްތަކުގެ ތެރޭގައި ޖޮކޮވިޗްގެ ގާނޫނީ ޓީމަށް އަންގާނެ ކަމަށް ކޯޓުން ވަނީ ބުނެފަ އެވެ.

ދެ ވަނަ ފަހަރު ވިސާ ކެންސަލްކޮށްލީ ކީއްވެ؟

މި ފަހަރު ޖޮކޮވިޗްގެ ވިސާ ކެންސަލްކުރީ ވިސާ އަށް ހުށަހެޅިއިރު، ސައްހަ ނޫން މައުލޫމާތެއް ދީފައިވާތީ އެވެ. އޮސްޓްރޭލިއާގެ ވިސާ އެޕްލިކޭޝަން ހުށަހެޅިއިރު، ޖޮކޮވިޗް ވަނީ އޮސްޓްރޭލިއާ އަށް އައުމުގެ ކުރިއަށް އޮތް 14 ދުވަހުގެ ތެރޭގައި އެއްވެސް ގައުމަކަށް ދަތުރުކުރަން ހަމަޖެހިފައިވޭތޯ މައުލޫމާތު ދޭން ބުނެފައިވާ ބައިގައި އެއްވެސް ގައުމަކަށް ދަތުރުކުރަން ހަމަޖެހިފައިނުވާ ކަމަށް ބުނެފަ އެވެ.

އެކަމަކު، މޮންޓެ ކާލޯގައި ދިރިއުޅޭ ޖޮކޮވިޗް ވަނީ ޑިސެމްބަރު މަހު 25 ވަަނަ ދުވަހު ސާބިއާގެ ވެރިރަށް ބެލްގްރޭޑަށް ގޮސްފަ އެވެ. އަދި އޭގެ ފަހުން ޑިސެމްބަރު މަހު 31 ވަނަ ދުވަހު ޖޮކޮވިޗް ސްޕެއިނުގެ މާބެލާ އަށް ވެސް ވަނީ ގޮސްފަ އެވެ.

ބެލްގްރޭޑާއި މާބެލާ އަށް ޖޮކޮވިޗް ދިޔަ ފޮޓޯތައް ސޯޝަލް މީޑިއާގައި ވެސް އޭނާ ހިއްސާކޮށްފައިވާއިރު، މިއީ އޭނާ އޮސްޓްރޭލިއާގެ ވިސާ އެޕްލިކޭޝަނަށް މައުލޫމާތު ދިން ފަހުން ކޮށްފައިވާ ދަތުރުތަކެކެވެ. ޖޮކޮވިޗް ވަނީ ވިސާ އެޕްލިކޭޝަނުގައި އެ ގޮތަށް މައުލޫމާތު ހިމެނުނީ އޭނާގެ ސަޕޯޓް ޓީމަށް އޮޅުމަކުން ކަމަށް ބުނެފަ އެވެ. އަދި އެކަން އޮސްޓްރޭލިއާގެ ސަރުކާރަށް ވެސް ފަހުން އަންގައިފަ އެވެ.

ލަދުވެތި ކަންތައްތަކެއް، ޖޮކޮވިޗަށް ގެއްލުނީ ބޮޑު ފުރުސަތެއް

ޖުމްލަ ދެ ފަހަރެއްގެ މަތިން އޮސްޓްރޭލިއާ އިމިގްރޭޝަންގެ ޑިޓެންޝަން ޑިޕާޓްމަންޓުން ހަަމަޖެއްސި ހޮޓަލެއްގައި ޖޮކޮވިޗް ވަނީ ނުވަ ވަރަކަށް ދުވަސް ހޭދަކޮށްފަ އެވެ. ޖޮކޮވިޗް އުފަން ސާބިއާގެ ސަރުކާރުން ސިފަކުރާގޮތުގައި މިއީ ސިޔާސީ ކަމެކެވެ. އޮސްޓްރޭލިއާ ސަރުކާރުގެ ޖަވާބަކީ މިއީ ސިއްހީ ރައްކާތެރިކަން ކަށަވަރުކުރަން ކުރާ ކަމެއް ކަމަށެވެ.

އޮސްޓްރޭލިއާ އޯޕަން މާދަމާ ފަށާއިރު، ޖޮކޮވިޗް އެ މުބާރާތުގައި ކުޅެން އޮތް ފުރަތަމަ ބުރުގެ މެޗު އޮތީ ތާވަލުކޮށްފަ އެވެ. އެކަމަކު، ކޯޓުން މިއަދު ނިންމި ނިންމުން ތަންފީޒުކުރާއިރު، ޖޮކޮވިޗް ޖެހޭނީ މުބާރާތް ނުކުޅެ އެނބުރި ގައުމަށް ދާށެވެ. މިއީ ޖޮކޮވިޗް ފަދަ ކުޅުންތެރިއަކަށް ލަދުވެތި ކަމެއް ކަމަށް މީޑިއާތަކުން އަންނަނީ ސިފަކުރަމުންނެވެ.

އޮސްޓްރޭލިއާ އޯޕަންގެ ނުވަ ފަހަރު ކާމިޔާބުކޮށް މުބާރާތުގެ އެންމެ ކާމިޔާބު ކުޅުންތެރިޔާގެ ރެކޯޑް އޮތް ޖޮކޮވިޗަށް މި ފަހަރުގެ އޮސްޓްރޭލިއަން އޯޕަންގައި ނުކުޅެވޭއިރު، ގްރޭންޑްސްލޭމްގެ ރެކޯޑް ހަދަން އޭނާ ކުރަން ޖެހޭ އިންތިޒާރު ދިގުވީ އެވެ. މި ފަހަރުގެ އޮސްޓްރޭލިއަން އޯޕަން ކާމިޔާބު ކުރިނަމަ ޖޮކޮވިޗަށް ޓެނިސް ތާރީހުގައި އެންމެ ގިނަ ގްރޭންޑްސްލޭމް ކާމިޔާބު ކުރުމުގެ ރެކޯޑް ގާއިމް ކުރެވޭނެ އެވެ. ގްރޭންޑް ސްލޭމްގެ ކާމިޔާބީގައި ޖޮކޮވިޗް މި ވަގުތު އޮތީ ރޮޖާ ފެޑެރާ އާއި ރަފައެލް ނަޑާލާ އެއްވަރުވެފަ އެވެ. ތިން ކުޅުންތެރިން ވެސް ވަނީ 20 ގްރޭންޑް ސްލޭމް ކާމިޔާބު ކޮށްފަ އެވެ.

ޖޮކޮވިޗްގެ ވިސާ މައްސަލައިގެ ޓައިމްލައިން

ޖެނުއަރީ 4: ކޮވިޑް ވެކްސިން ދެ ޑޯޒު ޖެހިކަމުގެ މައުލޫމާތު ނުދިން ނަމަވެސް ޖޮކޮވިޗަށް އޮސްޓްރޭލިއަން އޯޕަންގައި ވާދަކުރަން ސިއްހީ ހާއްސަ ހުއްދަ ލިބިފައިވާކަން އިއުލާނުކުރި. އެއީ މެޑިކަލް އެގްޒެމްޕްޝަންގެ ދަށުން.

ޖެނުއަރީ 5: ޖޮކޮވިޗަށް އޮސްޓްރޭލިއާ ސަރުކާރު ގަބޫލުކުރާ ވަރަށް ސިއްހީ މައުލޫމާތު ފޯރުކޮށްނުދެވޭނަމަ އަލުން އަނބުރާ ގައުމަށް ފޮނުވާލެވޭނެ ކަމަށް އޮސްޓްރޭލިއާގެ ބޮޑު ވަޒީރު ސްކޮޓް މޮރިސަން ވިދާޅުވި. ޖޮކޮވިޗް، ވެކްސިންގެ މައުލޫމާތު ނުދޭނަމަ އޭނާ އަށް ވިސާ ދޭން ތާއީދުނުކުރާ ކަމަށް އޮސްޓްރޭލިއާގެ އެކްޓިން ސްޕޯޓް މިނިސްޓަރު ޖާލާ ޕުލްފޯޑް ވިދާޅުވި.

ޖެނުއަރީ 5: އޮސްޓްރޭލިއާގެ މެލްބަން އަށް ޖޮކޮވިޗް ދިއުމާ އެކު ކޮވިޑް ވެކްސިން ދެ ޑޯޒު ޖެހިކަމުގެ މައުލޫމާތު ކަށަވަރުނުވާތީ ޖޮކޮވިޗްގެ ވިސާ ފުރަތަމަ ފަހަރަށް ކެންސަލްކޮށްލި. ޖޮކޮވިޗް އޮސްޓްރޭލިއާގެ އިމިގްރޭޝަން ޑިޓެންޝަނަށް ގެންދިއުމާ އެކު އޭނާގެ ގާނޫނީ ޓީމުން އޮސްޓްރޭލިއާ ކޯޓުގައި ވިސާ މައްސަލަ އެޕީލްކުރި. މި މަހު 10 ވަނަ ދުވަހު ކޯޓުގައި މައްސަލަ ނިމެންދެން ޖޮކޮވިޗް އޮސްޓްރޭލިއާގައި މަޑުކުރަން ކޯޓުން އެންގި.

ޖެނުއަރީ 7: ޖޮކޮވިޗް ހުރީ ޑިޓެންޝަނުގައެއް ނޫން ކަމަށާއި ބޭނުން އިރަކު އޮސްޓްރޭލިއާ ދޫކޮށް ދެވޭނެކަމަށް އޮސްޓްރޭލިއާގެ ހޯމް އެފެއާޒް މިނިސްޓަރު ކެރަން އެންޑްރޫސް ވިދާޅުވި. އޭރު ސާބިއާ އާއި އޮސްޓްރޭލިއާގައި ޖޮކޮވިޗްގެ ސަޕޯޓަރުން އޭނާ ދޫކޮށްލަން ގޮވާލައި އެއްވުންތައް ބާއްވަމުން ދިޔަ، ސަޕޯޓަރުން ދޭ އެއްބާރުލުމަށް ޖޮކޮވިޗް ވަނީ އިންސްޓަގްރާމް މެދުވެރިކޮށް ޝުކުރު އަދާކޮށްފައި.

ޖެނުއަރީ 10: ޖޮކޮވިޗްގެ ވިސާ ކެންސަލްކުރީ އެކަށީގެންވާ ވަގުތު ނުދީ ކަމަށް ކޯޓުން ކަނޑައެޅި. ޖޮޮކޮވިޗް ދޫކޮށްލުމަށް ކޯޓުން އެންގިއިރު، އެ މައްސަލައިގައި ކޯޓުން އާންމުކުރި ލިޔެކިޔުންތަކުގައި ޖޮކޮވިޗަށް އޮސްޓްރޭލިއާ އިން ވިސާ ދިނީ މިދިޔަ މަހު 16 ވަނަ ދުވަހު ކޮވިޑަށް ޕޮޒިިޓިވްވެފައިވާތީކަން ހާމަވި.

ޖެނުއަރީ 12: އިންސްޓަގްރާމް މެދުވެރިކޮށް ޖޮކޮވިޗް ނެރުނު ބަޔާނެއްގައި އޭނާ ކޮވިޑް ޖެހިގެން ކަރަންޓީނުގެ މުއްދަތުގައި ހުރިއިރު، ފްރާންސްގެ ލެކިއުޕޭ ނޫހަށް އިންޓަވިއުއެއްދީ ކަރަންޓީނު ޕްރޮޓޮކޯލާ ހިލާފުވި ކަމަށް އެއްބަސްވި. އޭގެ އިތުރުން އޮސްޓްރޭލިއާ އަށް އެތެރެވާން ބޭނުންވާ ވިސާ އެޕްލިކޭޝަންގައި ގޯސް މައުލޫމާތުތަކެއް ހިމެނުނީ އޭނާގެ ސަޕޯޓް ޓީމަށް އޮޅުމަކުން ކަމަށް ބުނެފައިވޭ.

ޖެނުއަރީ 14: އޮސްޓްރޭލިއާގެ އިމިގްރޭޝަނުން ޖޮކޮވިޗްގެ ވިސާ އެޕްލިކޭޝަންގެ މައުލޫމާތު ތަހުގީގުކޮށް، ޖޮކޮވިޗްގެ ވިސާ ދެ ވަނަ ފަހަރަށް ކެންސަލްކޮށްލި.

ޖެނުއަރީ 15: ޖޮކޮވިޗްގެ ގާނޫނީ ޓީމުން ދެ ވަނަ ފަހަރަށް ވިސާ ކެންސަލްކޮށްލި މައްސަލަ ކޯޓަށް ހުށަހެޅި. ކޯޓުން އެންގީ މައްސަލައިގެ ގޮތެއް ނިންމަންދެން ޖޮކޮވިޗް އޮސްޓްރޭލިއާގެ އިމިގްރޭޝަންގެ ބެލުމުގެ ދަށު ހުންނަން.

ޖެނުއަރީ 16: ކޯޓުން ޖޮކޮވިޗާ ދެކޮޅަށް މައްސަލަ ނިންމައި، އޮސްޓްރޭލިއާ އިމިގްރޭޝަނުން ވިސާ ކެންސަލް ކޮށްލަން ނިންމި ނިންމުން ދަމަހައްޓައިދިިން. މި ނިންމުމާ އެކު އޮސްޓްރޭލިއާ އިން ޖޮކޮވިޗް ޑީޕޯޓްކޮށްލާނެކަން ޔަގީންވި.