އދ. އަތޮޅުގައި އޮންނަ ހިމާޔަތްކޮށްފައިވާ ކުޑަ ފަޅު ރަށް ހުރަސްދޫ ބަލަހައްޓައިދޭނެ ބަޔަކު ހޯދުމަށް އެ އަތޮޅު ކައުންސިލުން މިއަދު އިއުލާނެއްކޮށްފި އެވެ.
ހުރަސްދޫއަކީ ގާތްގަނޑަކަށް 3.9 ހެކްޓަރުގެ ރަށެކެވެ. އެރަށަށް އާންމުކޮށް ގޮސް އުޅެނީ ކައިރި ރަށްތަކުގެ ޓުއަރިސްޓުންނެވެ. އެ ރަށް ބޭނުން ކުރަނީ ޕިކްނިކް އައިލެންޑެއްގެ ގޮތުގަ އެވެ. އެ ރަށަށް ގޮސްފައިވާ ބައެއް މީހުން އިންޓަނެޓުގައި ލިޔެފައިވާ ރިވިއުތަކަށް ބަލާއިރު އެއީ ގޮނޑުދޮށް ރީތި، ދޫނި ޖައްސާ ރަށެކެވެ.
ހުރަސްދޫ ހިމާޔަތް ކުރީ މީގެ 16 އަހަރު ކުރިންނެވެ. ރަށް ހިމާޔަތް ކުރީ އޮންނަ ލޮކޭޝަނުގެ މުހިންމުކަމުން ބައެއް އިލްމީ ދިރާސާތަކަށް ބޭނުން ކުރެވިދާނެތީ އެވެ.
"އދ. ހުރަސްދޫ އަކީ ޖޯގްރަފީ ގޮތުން ވަރަށް އާދަޔާ ހިލާފު ރަށެއް. ތަފާތު ދިރާސާތައް ކުރުމަށް ވަރަށް މުހިންމު ރަށެއް،" އެ ރަށް ހިމާޔަތް ކުރުމަށް ޖޫން 15، 2006 ގައި ބޭއްވި ރަސްމިއްޔާތުގައި ވާހަކަ ދައްކަވަމުން ތިމާވެއްޓާ ބެހޭ މިނިސްޓްރީގެ ބަޔޯޑައިވާސިޓީ ޑިޕާޓްމަންޓުގެ އެއިރުގެ ޑިރެކްޓަރު މުހައްމަދު ޒާހިރު (މީމު ޒަވިޔަނި) ވިދާޅުވެފައިވެ އެވެ.
ހުރަސްދޫ ވަކިން ފާހަގަކޮށްފައި: ރަށުގެ ބޮޑުމިނަކީ އެންމެ 3.9 ހެކްޓަރު އެކަމަކު އޮންނަ ލޮކޭޝަން މުހިންމު -- ފޮޓޯ: ގޫގްލް ކެޕްޗާ
ހުރަސްދޫ އޮންނަނީ ރާއްޖޭގެ މެދުތެރެއިން ހުޅަނގުގަ އެވެ. އެ ރަށާ އެންމެ ކައިރީގައި އޮންނަނީ ރާއްޖޭގެ އެންމެ ހުޅަނގުން އޮންނަ ރަށްތަކުގެ ތެރޭގައި ހިމެނޭ އދ. މަންދޫ އާއި ކޮންރެޑް މޯލްޑިވްސް ރަންގަލި އައިލެންޑެވެ.
މަންދޫން ހުޅަނގުން ރާއްޖެ ހުރަސްކޮށް ގޮސްފި ނަމަ ސީދާ ސޯމާލިއާއަށް ދެވޭނެ އެވެ. އެ ދެމެދުގެ ދުރުމިނަކީ ގާތްގަނޑަކަށް 2800 ކިލޯމީޓަރެވެ. މަންދޫގެ ކައިރިން ރާއްޖެ ސަރަހައްދުން ބޭރުވާއިރު ސޯމާލިއާއަށް ވުރެ ކައިރީގައި އެކަމަކު ތަންކޮޅެއް ތިރީގައި ސިޝެލް އޮންނާނެ އެވެ. މަންދޫއާ ސިޝެލްސްއާ ދެމެދު އޮންނަނީ ގާތްގަނޑަކަށް 2000 ކިލޯމީޓަރެވެ.
