އެމްޑީޕީން ތައާރަފްކުރި ގިނަ ކަންތައްތަކަކުން ރައްޔިތުންނަށް ފައިދާވަމުން އަންނަ ކަމަށާއި އެހެން ނަމަވެސް ރާއްޖެއަށް ގެންނަން ބޭނުންވާ ބަދަލު އަދިވެސް ނާންނަ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ގޮނޑިއަށް ވާދަކުރާ، އެމްޑީޕީގެ ކެންޑިޑޭޓް މުހައްމަދު ރާޝިދަށް ކެމްޕޭންކުރަން އެ ޕާޓީން މިރޭ ށ. ފޯކައިދޫގައި ބޭއްވި ޖަލްސާގައި ނަޝީދު ވިދާޅުވީ ރައީސް އިބްރާހީމް މުހައްމަދު ސޯލިހުގެ ވެރިކަމުގައި ރާއްޖެއަށް ރަނގަޅު ބަދަލެއް އަތުވެއްޖެ ކަމަށެވެ. އެއީ އެމަނިކުފާނު ވިދާޅުވި ގޮތުގައި "ހިލޭ ޑިގްރީ" ޕްރޮގްރާމެވެ. އެ ޕްރޮގްރާމްގެ ދަށުން ފޯކައިދޫގެ 54 ދަރިވަރަކު ކިޔަވަމުން އަންނަ ކަމަށާއި އެ ރަށުގައި ގްރޭޭޑް 12 އާ ހަމައަށް ކިޔެވޭ ކަމަށް ވެސް އެމަނިކުފާނު ވިދާޅުވި އެވެ.
"ކުރިއަށް އޮތް އަހަރުތަކުގައި ތިޔަ ބޭފުޅުން ދާނީ މޮޅުވަމުން، ތިޔަ ބޭފުޅުން ދާނީ ތަނަވަސްވަމުން. އަޅުގަނޑުމެންގެ މަސައްކަތަކީ އަބަދުވެސް އެ ތަނަވަސްކަން ތިޔަ ބޭފުޅުންނަށް ހޯދައިދެވޭނެ ސިޔާސަތުތަކެއް ކަނޑައަޅައިދިނުން،" ނަޝީދު ވިދާޅުވި އެވެ.
ރައްޔިތުންގެ އާމްދަނީ އިތުރުވާނެ ގޮތްތައް ހަމަޖެއްސުމަކީ އެމްޑީޕީން އަބަދުވެެސް ކުރަމުން އަންނަ މަސައްކަތެއް ކަމަށް ވިދާޅުވެ، އޭގެ މިސާލަކަށް އެމަނިކުފާނު ދެއްކެވީ ރާއްޖޭގައި ދެވޭނެ އެންމެ ކުޑަ އުޖޫރަ ނުވަތަ "މިނިމަމް ވޭޖް" ކަނޑައެޅުމެވެ. އެ ބަދަލުގެ ފައިދާ ލިބޭނެ ކަމަށް އެމަނިކުފާނު ދެެކެވަޑައިގަންނަވާ މީހުންގެ އަދަދުތަކެއް ވެސް ވިދާޅުވި އެވެ. ފޯކައިދޫ ރައްޔިތުންގެ ތެރެއިން ރިސޯޓްތަކުގައި މަސައްކަތްކުރާ މީހުންނަށް ލިބޭ އާމްދަނީ ދެގުނަވެއްޖެ ކަމަށް ވެސް އެެމަނިކުފާނު ވިދާޅުވި އެވެ.
"އެހެން ނަމަވެސް އަނެއްކާވެސް އަޅުގަނޑުމެން މި އަހާ ވާހަކައަކީ ކިހިނެތްހޭ މިވީ؟ އަޅުގަނޑުމެން ތަސައްވަރުކުރާ، އަޅުގަނޑުމެން މި އުއްމީދުކުރާ ޖަމްޕް ޖަހައިފި ހެއްޔޭ؟ އެ ބަދަލު އަތުވެއްޖެ ހެއްޔޭ؟ ނޫން، ނާދޭ،" ނަޝީދު ވިދާޅުވި އެވެ.
އެ ބަދަލު ގެނައުމަކީ ޖީލެއްގެ މަސައްކަތެއް ކަމަށާއި މިހާރު ލާ އެންމެ ވޯޓަކުން އެ ބަދަލު ނާންނާނެ ކަމަށް ވެސް އެމަނިކުފާނު ވިދާޅުވި އެވެ. ރާއްޖެ ބަދަލުވެ، ރައްޔިތުންގެ އާންމު ހާލަތު ރަނގަޅުވުމަށް ޓަކައި އެމްޑީޕީގެ ސިޔާސަތުތައް ހިންގަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑުމެން ސަރުކާރުގައި، ދިވެހިރައްޔިތުންގެ ޑިމޮކްރެޓިކް ޕާޓީ ވެރިކަމުގައި އަދި އެބަ، 10 އަހަރު ތިބޭން ޖެހޭ،" ނަޝީދު ވިދާޅުވި އެވެ.
ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ކެންޑިޑޭޓް ރާޝިދަށް ކެމްޕޭންކުރަން އެ ޕާޓީން މީގެ ކުރިން ވަނީ އެ ދާއިރާގެ މައި ރަށް، ކޮމަންޑޫގައި ވެސް ޖަލްސާއެއް ބާއްވައިފަ އެވެ. އެ ޖަލްސާގައި ރައީސް އިބްރާހީމް މުހައްމަދު ސޯލިހު ވެސް ބައިވެރިވެވަޑައިގެންނެވި އެވެ.
ފޯކައިދޫގައި މިރޭ ބޭއްވި ޖަލްސާއަށް ވެސް ކުރިން އޮތީ އެމަނިކުފާނު ވަޑައިގަންނަވާ ގޮތަށެވެ. އެހެން ނަމަވެސް ކޮވިޑް-19 އަށް ޕޮޒިޓިވްވެ، އައިސޮލޭޝަންގައި ހުންނަވަން ޖެހިވަޑައިގެންނެވުމުން ފޯކައިދޫއަށް ވަޑައިނުގެންނެވުނީ އެވެ. ފޯކައިދޫގައި މިރޭ ބޭއްވި ޖަލްސާގައި ރައީސް ފިޔަވައި، އެމްޑީޕީގެ އިސް އެހެން ބޭފުޅުން ބައިވެރިވަވަޑައިގެންނެވި އެވެ.
