މެޑްރިޑް، ސްޕެއިން (ޖެނުއަރީ 20) - ކޮވިޑް ބަލިމަޑުކަމުގެ ކުރިން ދުނިޔޭގެ ފަތުރުވެރިކަން އޮތް ހާލަތަށް އަނބުރާ ދާނީ އެންމެ އަވަހަށް ވެސް 2024 ވަނަ އަހަރުގައި ކަމަށް ވޯލްޑް ޓޫރިޒަމް އޯގަނައިޒޭޝަނުން ލަފާކޮށްފި އެވެ.
އދ. ގެ ފަތުރުވެރިކަމާ ބެހޭ އެޖެންސީން ބުނީ ހަލުވިކަމާ އެކު ފެތުރޭ އޮމިކްރޯން ވޭރިއެންޓުން ބަލިވާ މިންވަރު ކުޑަ ނަމަވެސް އެ ވޭރިއެންޓްގެ ސަބަބުން 2022 ވަނަ އަހަރުގެ ކުރީކޮޅު ފަތުރުވެރިކަމަށް ބުރޫއަރާނެ ކަމަށެވެ.
ދެހާސް ނަވާރަ ވަނަ އަހަރާ އަޅާ ބަލާއިރު 2020 ވަނަ އަހަރު ފަތުރުވެރިކަމުގެ އާމްދަނީ 72 ޕަސެންޓް ދަށްވި އެވެ. ނަމަވެސް 2020 ވަނަ އަހަރާ އަޅާ ބަލާއިރު 2021 ވަނަ އަހަރު ފަތުރުވެރިކަމަށް ހަތަރު ޕަސެންޓްގެ ކުރިއެރުމެއް އައެވެ.
"ފަތުރުވެރިކަމުގެ ސިނާއަތް އަލުން އަރައިގަތުމުގެ ދުވެލި ވަރަށް ލަސް. އެއީ ދަތުރު ކުރުމުގައި ހުރި ހުރަސްތަކާއި، ވެކްސިން ޖެހުމުގެ ރޭޓާއި، ދަތުރު ކުރާ މީހުންގެ ޔަގީންކަން ކުޑަވުން ފަދަ ކަންކަމާ ހެދި،" ޔޫއެންޑާބްލިއުޓީއޯ އިން ނެރުނު ބަޔާނެއްގައި ބުންޏެވެ.
ދެހާސް ވިހި ވަނަ އަހަރާ އަޅާ ބަލާއިރު، މިދިޔަ އަހަރު ޔޫރަޕަށް ފަތުރުވެރިން ޒިޔާރަތް ކުރި އަދަދު 19 ޕަސެންޓުން އަދި އެމެރިކާއަށް ޒިޔާރަތް ކުރި އަދަދު 17 ޕަސެންޓުން އިތުރުވި އެވެ.
ނަމަވެސް މިދިޔަ އަހަރު މެދުއިރުމައްޗަށް ދިޔަ ފަތުރުވެރިންގެ އަދަދު 24 ޕަސެންޓު އަދި އޭޝިއާ ޕެސިފިކަށް ދިޔަ ފަތުރުވެރިންގެ އަދަދު 65 ޕަސެންޓް ދަށްވި އެވެ.
ފަތުރުވެރިކަމާ ބެހޭ އެޖެންސީން ލަފާކުރާ ގޮތުގައި 2021 ވަނަ އަހަރާ އަޅާ ބަލާއިރު، މި އަހަރު ފަތުރުވެރިކަން 30-78 ޕަސެންޓް ރަނގަޅު ވާނެ އެވެ.
އެކަމަކު ގިނަ ތަޖުރިބާކާރުން ދެކޭ ގޮތުގައި ބަލިމަޑުކަމުގެ ކުރިން ފަތުރުވެރިކަން އޮތް ހާލަތަށް އަނބުރާ ރުޖޫއަ ވާނީ އެންމެ އަވަހަށް ވެސް 2024 ވަނަ އަހަރު އެވެ.
