ކާބުލް، އަފްގާނިސްތާން (ޖެނުއަރީ 19) - މިދިޔަ ބުރާސްފަތި ދުވަހު އަފްގާނިސްތާނުގެ ވެރިރަށް ކާބުލްގައި އަންހެނެއްގެ ގަޔަށް ބަޑި ޖަހައި މަރާލި ކަމަށް ތުހުމަތު ކުރެވޭ ތާލިބާން މެމްބަރަކު ހައްޔަރުކޮށްފި އެވެ.
އަފްގާނިސްތާނުގެ މައިނޯރިޓީ ހަޒާރާ ދަރިކޮޅަށް ނިސްބަތްވާ އަންހެން މީހާގެ ގަޔަށް ބަޑި ޖެހީ ކައިވެނި ޕާޓީއަކަށް ގޮސް، އެނބުރި ގެޔަށް ދިޔަ މަގުމަތީގައި ޗެކްޕޮއިންޓެއްގައި ހުއްޓުވުމަށް ފަހު އެވެ.
އުމުރުން 25 އަހަރުގެ ޒައިނަބް އަބްދުﷲ މަރާލި މައްސަލަ ހިނގީ ޝިއައީ މަޒްހަބުގެ ހަޒާރާ މީހުން ދިރިއުޅޭ ހިސާބުގަނޑެއްގަ އެވެ.
ތާލިބާން ތަރުޖަމާނު މުހައްމަދު ނައީމް ޓްވިޓާ މެދުވެރިކޮށް ބުނީ އަންހެން މީހާ މަރާލީ "އޮޅުމަކުން" ކަމަށާއި އެކަން ކުރި މެމްބަރު ހައްޔަރުކޮށް އަދަބު ދޭނެ ކަމަށެވެ.
އިންޓީރިއާ މިނިސްޓްރީން ބުނީ ޒައިނަބްގެ މަރުގެ ބަދަލުގެ ގޮތުގައި އެ އާއިލާއަށް 5700 ޑޮލަރު ހުށަހަޅާފައިވާ ކަމަށެވެ. ޒައިނަބްގެ މަރަށް ފަހު ބައެއް އެކްޓިވިސްޓުން ވަނީ ކާބުލްގައި މުޒާހަރާކޮށް، އިންސާފަށް ޑިމާންޑުކޮށްފަ އެވެ.
