ރިޔާސީ އިންތިހާބުގައި ވާދަކުރައްވަން އަބަދުވެސް އެދިވަޑައިގަންނަވާ ކަމަށާއި އެހެން ނަމަވެސް ރައީސް އިބްރާހީމް މުހައްމަދު ސޯލިހާ ވާދަ ނުކުރައްވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސްރީލަންކާއަށް މިހާރު ކުރައްވާ ރަސްމީ ދަތުރުފުޅުގައި އިންޑިއާގެ "ދަ ހިންދޫ" ނޫހަށް ދެއްވި އިންޓަވިއުއްގައި ނަޝީދު ވިދާޅުވީ އެމްޑީޕީ ވެރިކަމުގައި ދެމެެެހެއްޓުމަށް "ކޮންމެ ކަމެއް ވެސް ކުރަން" ތައްޔާރަށް ހުންނެވި ކަމަށެވެ. ނުސީދާ ގޮތެއްގައި އެމަނިކުފާނު ވިދާޅުވީ އެމްޑީޕީ ވެރިކަމުގައި ދެމެހެއްޓުމަށް ރިޔާސީ ޓިކެޓް ދޫކޮށްލައްވަން ވެސް ތައްޔާރަށް ހުންނެވި ކަމަށެވެ.
"އަޅުގަނޑުމެން އެކަކު އަނެކަކާ ވާދަކުރާތަނެއް އަޅުގަނޑަކަށް ނުފެނޭ. [ރިޔާސީ އިންތިހާބުގައި ] ވާދަކުރާނީ ދެލީޑަރުންގެ ތެރެއިން އެކަކު ނުވަތަ އެކަކުވެސް ވާދަ ނުކުރާނީ،" ނަޝީދު ވިދާޅުވި ކަމަށް ނޫހުން ބުންޏެވެ.
ދަ ހިންދޫގެ ހަބަރުގައިވާ ގޮތުން، "ޕާޓީ ވެރިކަމުގައި ދެމެހެއްޓުމަށް ކުރަންޖެހޭ ކޮންމެ ކަމެއް ކުރައްވާނެ" ކަމަށް އެމަނިކުފާނު ވިދާޅުވީ އެވާހަަކަފުޅާ ގުޅުވައިގެންނެވެ. އެމަނިކުފާނާ ހާވާލާދީ ނޫހުން ބުނީ އެމްޑީޕީއަށް އިތުރު ދައުރެއް ލިބުމަކީ އެންމެ މުހިންމު ކަންތައް ކަމަށެވެ.
ރިޔާސީ އިންތިހާބުގައި ވާދަކުރައްވާނަންތޯ އެ ނޫހުން ކުރި ސުވާލަށް ޖަވާބު ދެއްވަމުން ނަޝީދު ވިދާޅުވީ އެއީ އަބަދުވެސް ގެންގުޅުއްވާ ވިސްނުމެއް ކަމަށެވެ. އެހެން ނަމަވެސް ވެރިކަމުގެ ނިޒާމު ބަރުލަމާނީ ނިޒާމަށް ބަދަލުކުރަން އެމަނިކުފާނު ގެންގުޅުއްވާ ވިސްނުންފުޅު ވެސް ދުލެއް ނުކުރައްވަ އެވެ. ރާއްޖޭގައި އެއް ޕާޓީއަކުން އިންތިހާބެއް ކާމިޔާބުކުރުމަކީ ވާނެކަމެއް ނޫން ކަމަށް ވިދާޅުވާ ވިދާޅުވުން އެ އިންޓަވިއުގައި ވެސް ތަކުރާރުކުރެއްވި އެވެ.
"އިންޑިއާ އައުޓް ކެމްޕޭނަކީ ނުބައި އިހުސާސެއް"
ރާއްޖޭގައި އިންޑިއާ ސިފައިން ތިބުމާ ދެކޮޅަށް އިދިކޮޅުން ކުރިއަށް ގެންދާ "އިންޑިއާ އައުޓް" ކެމްޕޭނަކީ އިންޓަވިއުގައި ނަޝީދު ވިދާޅުވި ގޮތުގައި ވަރަށް "ނުބައި އިހުސާސެެކެވެ".
"އަޅުގަނޑު ދެކޭ ގޮތުގައި އެމްޑީޕީ ވެރިކަމުގައި އޮތުމުގެ މުހިއްމުކަން އަންނަނީ ބޮޑުވަމުން. ނުބައި އިހުސާސްތައްް [ރާއްޖޭގައި] ވަރަށް ބޮޑަށް އެބަ އޮތް. ރައީސް [އަބްދުﷲ] ޔާމީނާއި އެމަނިކުފާނު އިންޑިއާއާ މެދު ގެންގުޅުއްވާ ރައުޔާއި ކުރައްވާ ކެމްޕޭނާ ހެދީ މީހުން ވަރަށް ނުތަނަވަސް އެބަ ކުރުވާ،" ނަޝީދު ވިދާޅުވި ކަމަށް ނޫހުން ބުންޏެވެ.
ޗައިނާގެ ފޮރިން މިނިސްޓަރު ވާންޔީ ދާދި ފަހުން ރާއްޖެއަށް ކުރެއްވި ދަތުރުފުޅާ މެދު ދެކެވަޑައިގަންނަވާ ގޮތާ ބެހޭ ގޮތުން ވެސް ދަ ހިންދޫ ނޫހުން ނަޝީދާ ސުވާލުކުރި އެވެ. އެ ސުވާލަށް ޖަވާބުދެއްވަމުން އެމަނިކުފާނު ވިދާޅުވީ އެއް ގައުމަކާ ދެެކޮޅަށް އަނެއް ގައުމުލައްވާ "ކުޅުވުމަކީ" ކުރެވޭނެކަމެއް ނޫން ކަމަށް އެމަނިކުފާނު އަބަދުވެސް ގަބޫލުކުރައްވާ ކަމަށެވެ.
އިންޑިއާއަކީ ރާއްޖޭގެ އަަވަށްޓެރި އަދި ޖެހޭ ކޮންމެ ކަމެއްގައި އެންމެ ފުރަތަމަ ދާން އޮތް ބަނދަރުކަމަށާއި އެގައުމުން ރާއްޖެއަށް ވެދޭ އެހީތެެރިކަމަށް އެއްވެސް އެހެން ކަމަކުން ހިޔަނި އެޅެން ޖެހޭ ކަމަށް ދެކެވަޑައިނުގަންނަވާ ކަމަށް ވެސް ނަޝީދު ވިދާޅުވި އެވެ.
ރައީސް ސޯލިހާ ރިޔާސީ އިންތިހާބެއްގައި ވާދަ ނުކުރައްވާނެ ކަމަށް ނަޝީދު ވިދާޅުވެފައި މި ވަނީ ރައީސްއާއެކު އިތުރަށް ސިޔާސީ މަސައްކަތް ނުކުރައްވާނެ ކަމަށް މިިދިޔަ އަހަރު އިއުލާން ކުރައްވާފައި އޮއްވަ އެވެ.
