ކޮވިޑަށް ޕޮޒިޓިވްވާ މީހުންގެ ފަރާތުން ބަލީގެ އެއްވެސް އަލާމާތެއް ނުފެންނަ ނަމަ ކަރަންޓީންވާންޖެހޭ މުއްދަތު ހަތް ދުވަހަށް ކުރުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ނިންމައިފި އެވެ.
އެޗްޕީއޭން ބުނީ ކޮވިޑަށް ޕޮޒިޓިވްވާ މީހުންގެ ތެރެއިން ބަލީގެ އެއްވެސް އަލާމާތެއް ނެތްނަމަ، އެމީހަކު ކަރަންޓީނުގައި ހުންނަ މުއްދަތު ސާމްޕަލް ނަގާ ދުވަހުން ފެށިގެން ހަތް ދުވަހުގެ މުއްދަތައް ކުޑަ ކޮށްފައިވާ ކަމަށެވެ.
އެ ހަތް ދުވަހުގެ މުއްދަތު ހަމަވުމުން ބަލީގެ އަލާމާތެއް ހުރިނަމަ، ކަރަންޓީނު ކުރާ މުއްދަތު ނިމޭނީ އެއްވެސް އަލާމާތެއް ނެތި މަދުވެގެން 24 ގަޑިއިރުވުމުން ކަމަށްވެސް އެޗްޕީއޭން ބުނެ އެވެ.
ނަމަވެސް، އެޗްޕީއޭން ބުނީ ސާމްޕަލް ނަގާ ތާރީހުން ފެށިގެން ހަތް ދުވަސް ފުރިހަމަވުމާއެކު މަސައްކަތަށް ނުކުންނަންޖެހޭ ސިއްހީ ހިދުމަތްދޭ ތަންތަނާއި، މީހުން ބަލަހައްޓާ މަރުކަޒުތަކާއި ސްކޫލުތަކާއި ކިޔަވައިދޭ މަރުކަޒުތައްފަދަ ތަންތަނުގައި މަސައްކަތްކުރާ މުވައްޒަފުން ވަޒީފާއަށް ނުކުންނަންވާނީ އެންޓިޖަން ޓެސްޓު ހަދައި ނަތީޖާ ނެގެޓިވް ވުމުން ކަމަށެވެ.
އެންޓިޖަން ޓެސްޓު ހަދާނީ ހެލްތް މިނިސްޓްރީން ކަނޑައަޅާފައިވާ ގައިޑްލައިނާ އެއްގޮތްވާ ގޮތުގެ މަތިން އެންޓިޖަން ޓެސްޓު ހެދުމުގެ ހުއްދަ ދީފައިވާ ތަނަކުންނެވެ.
ކޮވިޑް ވެކްސިންގެ ޑޯޒްތައް ފުރިހަމަ ކޮށްފައިވާ މީހަކު ޕޮޒިޓިވްވާ މީހަކާ ކޮންޓެކްޓުވެ ކަރަންޓީނު ކުރާނީ ޕޮޒިޓިވްވި މީހާއާ ކޮންޓެކްޓުވި ތާރީހުން ފެށިގެން 10 ދުވަހުގެ މުއްދަށެވެ. އެ 10 ދުވަސް ފުރިހަމަވުމުން، ބަލީގެ އަލާމާތެއް ނެތްނަމަ އިތުރު ޓެސްޓުކުރުމަކާނުލައި ކަރަންޓީން ނިމޭނެ އެވެ.
ނަމަވެސް، އެ މީހަކު ކަރަންޓީނުވުމަށް އެޗްޕީއޭން އަންގާ ތާރީހުން ފެށިގެނެ ފަވަސް ފުރިހަމަވުމުން، ޕީސީއާ ޓެސްޓު ހަދައި ނަތީޖާ ނެގެޓިވްނަމަ ކަރަންޓީން ނިމޭނެ އެވެ. އެއީ ކޮވިޑަށް ޕޮޒިޓިވްވާ މީހުންނާ ވަކިން ކަރަންޓީނުގައި ތިބޭ ނަމަ އެވެ.
ވެކްސިން ފުރިހަމަނުވާ މީހަކު ކޮވިޑަށް ޕޮޒިޓިވް ވެއްޖެ ނަމަ ކޮންޓެކްޓުން ކަރަންޓީނު ކުރެވޭ މުއްދަތަކީ ޕޮޒިޓިވްވާ މީހާއާ ކޮންޓެކްޓުވި ތާރީހުން ފެށިގެން 14 ދުވަސް ކަމަށް އެޗްޕީއޭން ބުނެ އެވެ.
އެޗްޕީއޭން ބުނީ ވެކްސިން ފުރިހަމަ ނުވާ މީހުން ކަރަންޓީނުން ދޫކޮށްލެވޭނީ ވެސް 14 ދުވަސް ފުރިހަމަވުމުން ޕީސީއާރް ޓެސްޓު ހަދާ ނަތީޖާނެގެޓިވްވުމުން ކަމަށެވެ.
ކޮވިޑް ވެކްސިންގެ ޑޯޒްތައް ފުރިހަމަވެފައިވާ ކަމުގައި ބެލެވޭނީ ރާއްޖޭގައި ބޭނުންކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީއިން ހުއްދަދީފައިވާ ނުވަތަ ޑަބްލިޔުއެޗްއޯއިން އިމަޖެންސީ ޔޫސް ލިސްޓިންގައި ހިމަނާފައިވާ ވެކްސިނެއްގެ ކަނޑައެޅިފައިވާ ޑޯޒްތައް ފުރިހަމަކޮށް 14 ދުވަސް ފުރިހަމަވެފައިވާނަމަ އެވެ.
އެޗްޕީއޭން ބުނީ މިހާރު ޕޮޒިޓިވްވެ ކަރަންޓީނުގައި ހުރި މީހުންނާއި އެ މީހުންގެ ކޮންޓެކްޓުން މިހާރުގެ އުސޫލުގެ މަތިން ޓެސްޓުގެ ނަތީޖާ ލިބިފައިވާނަމަ ކަރަންޓީނުވުން ނިމޭނެ ކަމަށެވެ.
