ވޮޝިންޓަން، އެމެރިކާ (ޖެނުއަރީ 12) - ފަގީރު ގައުމުތަކުގެ ދަރަންޏަށް ލުއި ދޭން ކުރާ މަސައްކަތުގައި ޗައިނާއިން ފުރިހަމައަށް ބައިވެރިވުމަށް ވޯލްޑް ބޭންކްގެ ރައީސް ޑޭވިޑް މެލްޕާސް ގޮވާލައްވައިފި އެވެ.
"އިންޓްރެސްޓް ރޭޓުތައް މަތިވާން ފެށުމާ އެކު ގިނަ ގައުމުތަކަށް މިހާރު ކުރިމަތިވެފައި ވަނީ ރެކޯޑު މިންވަރުގެ ބޭރުގެ އަދި އެތެރޭގެ ދަރަނި،" ވޯލްޑް ބޭންކްގެ ރައީސް ވިދާޅުވި އެވެ.
އޭނާ ވިދާޅުވީ އާމްދަނީ ދަށް ގައުމުތަކުގެ 60 ޕަސެންޓަށް ދަރަނި ދެއްކޭނެ ގޮތެއް ނެތް އިރު، ތަރައްގީވަމުން އަންނަ ގައުމުތަކަށް ވެސް ދަރަނި ދެއްކުން ވަނީ ބުރައަކަށް ވެފަ އެވެ.
"މި ފެށި 2022 ވަނަ އަހަރު އެކަނިވެސް ގައުމުތަކުން ދަރަނީގެ ގޮތުގައި 35 ބިލިއަން ޑޮލަރު ދައްކަން އެބަ ޖެހޭ ބައިލެޓަރަލް އަދި ޕްރައިވެޓް ސެކްޓާގެ ކްރެޑިޓަރުންނަށް. އޭގެ 40 ޕަސެންޓު ދާނީ ޗައިނާއަށް،" މެލްޕާސް ވިދާޅުވި އެވެ.
"ދަރަނީގެ ލުއިދޭން ކުރާ ބައިނަލްއަގްވާމީ މަސައްކަތުގައި ޗައިނާއިން ފުރިހަމައަށް ބައިވެރިވުން ވަރަށް މުހިއްމު،" ޕްރައިވެޓް ސެކްޓާ އާއި ކޮމާޝަލް ކްރެޑިޓަރުން ވެސް ބައިވެރިވުން މުހިއްމު ކަމަށް ފާހަގަކުރައްވަމުން އޭނާ ވިދާޅުވި އެވެ.
މެލްޕާސް ގޮވާލެއްވީ ނޮވެމްބަރު 2020 ވަނަ އަހަރު ޗައިނާ ހިމެނޭ ގޮތަށް ޖީ20 ގައުމުތަކުން އެއްބަސްވި ދަރަނި ރީސްޓްރަކްޗާ ކުރުމާ ބެހޭ "އާއްމު ފްރޭމްވޯކް" ތަންފީޒު ކުރުމުގެ މަސައްކަތް ހަލުވި ކުރުމަށެވެ.
"އާއްމު ފްރޭމްވޯކް"ގެ ދަށުން ދަރަނީގެ ލުޔަށް އެދޭ ގައުމުތަކުގެ ދަރަނި ކެންސަލް ކުރުމާއި ލުއި ދެވޭނެ ގޮތްތައް މަގުފަހިވެ އެވެ. އެއީ ކޮވިޑް ބަލިމަޑުކަން ފެށުމުން ގައުމުތަކުގެ ދަރަނި ފަސްކޮށްދިނުމުގެ ގޮތުން އެކުލަވާލި ޑެޓް ސާވިސް ސަސްޕެންޝަން އިނީޝިއޭޓިވްގެ ފަހުން އެކުލަވާލި އޮނިގަނޑެކެވެ.
ޑެޓް ސާވިސް ސަސްޕެންޝަން އިނީޝިއޭޓިވްގެ ދަށުން ދަރަނިތައް އެންމެ ފުރަތަމަ ފަސްކޮށްދިނީ 2020 ވަނަ އަހަރުގެ ނިޔަލަށެވެ. އޭގެ ފަހުން 2021 ވަނަ އަހަރުގެ ނިޔަލަށް ފަސްކޮށްދޭން މުއްދަތު އިތުރުކުރި އެވެ.
