ދިވެހިރާއްޖެއިން މިދިޔަ 24 ގަޑިއިރުގެ ތެރޭގައި 454 މީހުންނަށް ކޮވިޑް-19 ޖެހިފައިވާ ކަމަށް ހެލްޔު ޕްރޮޓެކްޝަން އެޖެންސީން މިރޭ ބުނެފި އެވެ.
އެޗްޕީއޭއިން އާންމު ކުރި ހިސާބުތަކުން ދައްކާ ގޮތުގައި މާލޭ ސަރަހައްދުން 192 މީހަކު މިދިޔަ 24 ގަޑިއިރުގެ ތެރޭގައި ކޮވިޑްޖެހިފައިވެ އެވެ. އަދި މީހުން ދިރިއުޅޭ އެހެން ރަށްރަށުން 165 މީހަކަށް އެ ބަލި ޖެހިފައިވެ އެވެ. އަދި ރިސޯޓުތަކުން 74 މީހަކު ބައްޔަށް ޕޮޒިޓިވްވެފައިވެ އެވެ.
ކޮވިޑްގެ ކޭސްތައް އިތުރުވަމުން އަންނާތީ އެޗްޕީއޭޭއިން އިއްޔެ ވަނީ ފިޔަވަޅުތައް އިތުރަށް ވަރުގަދަކޮށްފަ އެވެ. ވެކްސިންގެ ދެ ޑޯޒު ހަމަކޮށްފައިވާ މީހުން މާލޭ ސަރަހައްދުން ފުރުމުގެ 72 ގަޑިއިރުގެ ތެރޭގައި ޕީސީއާރް ޓެސްޓެއް ހަދަންޖެހެ އެވެ.
ވެކްސިން ނުޖަހާ މީހުންނަށް ފުރޭނީ 14 ދުވަހު ކަރަންޓީނުވުމަށްފަހު ޕީސީއާރް ޓެސްޓެއް ހަދައިގެނެވެ. އޭގެ ތެރޭގައި ވެކްސިން ނުޖެހޭ އުމުރުފުރައިގެ ކުދިން ވެސް ހިމެނެ އެވެ.
އޭގެ އިތުރުން، 50 ވުރެ ގިނަ މީހުން އެއްވެގެން ހަފްލާ ބޭއްވުން ވެސް ވަނީ މަނާކޮށްފަ އެވެ. އެއަށްވުރެ މަދުން މީހުން ބައިވެރިވެގެން ހަފްލާއެއް ބައިވެރިވާ ނަމަވެސް ގައިދުރުކުރުމާއި މާސްކު އެޅުން ފަދަ ގައިޑްލައިންތަކަށް ތަބާވާންޖެހޭނެ ކަމަށް އެޗްޕީއޭއިން ބުނެފައިވެ އެވެ.
