ތެހްރާން، އިރާން (ޖެނުއަރީ 8) - އަފްގާނިސްތާނުގެ ވެރިކަމަށް މިދިޔަ އޯގަސްޓު މަހު ތާލިބާނުން އައި ފަހުން ފޮރިން މިނިސްޓަރުގެ ފުރަތަމަ ރަސްމީ ދަތުރުގައި އިރާނަށް ހިނގައްޖެ އެވެ.
އެހެން ގައުމުތައް ފަދައިން އިރާނުން ވެސް މިހާތަނަށް ތާލިބާން ސަރުކާރު ރަސްމީކޮށް ބަލައިގެންފައެއް ނުވެ އެވެ. ދަތުރުގެ މަގްސަދަކީ ރެފިއުޖީންނާއި އިގްތިސާދާ ގުޅޭ މަޝްވަރާ ކުރުމެވެ.
"އަމާޒަކީ ސިޔާސީ އަދި އިގްތިސާދީ މައްސަލަތަކާއި، ޓްރާންސިޓާއި ރެފިއުޖީންނާ ގުޅޭ މައްސަލަތައް އިރާނާއި އަފްގާނިސްތާނުން މަޝްވަރާ ކުރުން،" ތާލިބާން ފޮރިން މިނިސްޓްރީގެ ތަރުޖަމާނު އަބްދުލް ގަހަރް ބަލްކީ ޓްވިޓާގައި ބުންޏެވެ.
މިހާރު ވެސް އެތައް މިލިއަން އަފްގާން ރެފިއުޖީން ދިރިއުޅެނީ އިރާނުގަ އެވެ. ތާލިބާނުން ވެރިކަމަށް އައުމާ އެކު ބޯޑަރު ހުރަސްކޮށް އިރާނަށް އެތެރެވޭ ރެފިއުޖީންގެ އަދަދުތައް ވަނީ އެތައް ގުނައެއް އިތުރުވެފަ އެވެ.
ތާލިބާން ވަފުދުގައި އިސްކޮށް ހުރީ ފޮރިން މިނިސްޓަރު އާމިރް ހާން މުއްތަގީ އެވެ. އޭނާ ވަނީ މީގެ ކުރިން ވެސް ނުރަސްމީކޮށް އިރާނުގެ އޮފިޝަލުންނާ ބައްދަލުކޮށްފަ އެވެ.
ތާލިބާނުން 1996 އިން 2001 އަށް ވެރިކަން ކުރިއިރު ވެސް އިރާނުން ރަސްމީކޮށް ތާލިބާން ސަރުކާރުން ބަލައިގެންފައެއް ނުވެ އެވެ. އިރާނުން ބުނެފައި ވަނީ ތާލިބާނުން ބަލައިގަނެވޭނީ އެންމެންގެ ބައިވެރިވުން ހިމެނޭ ސަރުކާރެއް ގާއިމްކުރުމުން ކަމަށެވެ.
