ކޮލޮމްބޯ، ސްރީލަންކާ (ޖެނުއަރީ 8) - ޗައިނާގެ ކުންފުންޏަކަށް ދިން ފާޓިލައިޒާ ޝިޕްމަންޓުގެ ކޮލިޓީ ދަށްކަމުން އަނބުރާ ފޮނުވާލުމަށް ފަހު ވެސް، ޕްރެޝަރު ބޮޑުވެ ސްރީލަންކާ އިން 6.8 މިލިއަން ޑޮލަރު ދައްކައިފި އެވެ.
ޕީޕަލްސް ބޭންކް އޮފް ސްރީލަންކާ އިން ބުނީ ފާޓިލައިޒާ ޝިޕްމަންޓްގެ މައްސަލައިގައި ޗައިނާގެ ގިންގްޑާއޯ ސީވިން ބަޔޯޓެކް ގްރޫޕުން ކޯޓަށް ހުށަހެޅި މައްސަލަ ކޯޓުން ބޭރުގައި ހައްލު ކުރުމުގެ ގޮތުން 6.87 މިލިއަން ޑޮލަރު ދައްކާފައިވާ ކަމަށެވެ.
ސްރީލަންކާ އަށް ފާޓިލައިޒާގެ ދަތިކަން ދިމާވަމުން ދިޔަ ނަމަވެސް އެ ކުންފުނިން ގެންދިޔަ ޝިޕްމަންޓް އަނބުރާ ފޮނުވާލަން ނިންމީ މިދިޔަ އޮކްޓޯބަރު މަހު ހެދި ޓެސްޓުތަކުން ފާޓިލައިޒާ ތަގައްޔަރުވެފައިވާ ކަމަށް ދެއްކުމުންނެވެ.
ރައްދުގައި ޗައިނާ އިން ވަނީ ޕީޕަލްސް ބޭންކް އޮފް ސްރީލަންކާ ބްލެކްލިސްޓުކޮށް، ކޯޓަށް މައްސަލަ ހުށަހަޅާފަ އެވެ. ކޯޓުން ބޭރުން މައްސަލަ ހައްލު ކުރަން ފައިސާ ދައްކާފައި ވާއިރު، ޗައިނާގެ ފޮރިން މިނިސްޓަރު ވާންގް ޔީ ހޮނިހިރު ދުވަހު ވަނީ ސްރީލަންކާ އަށް ވަޑައިގެންފަ އެވެ.
ޗައިނާގެ ފޮރިން މިނިސްޓަރުގެ ދަތުރުގައި ރައީސް ގޮތަބަޔަ ރާޖަޕަކްސަ އާއި އެހެން ލީޑަރުންނާ ބައްދަލުކުރައްވާނެ އެވެ. މިއީ ދެ ގައުމުގެ ޑިޕްލޮމެޓިކް ގުޅުމަށް 65 އަހަރު ފުރުމާ ދިމާކޮށް ކުރައްވާ ދަތުރެކެވެ.
ސްރީލަންކާ އަށް ފާޓިލައިޒާ އެކްސްޕޯޓް ކުރަން ޗައިނާގެ ކުންފުންޏަކާ އެކު އެކުލަވާލީ 49.7 މިލިއަން ޑޮލަރުގެ އެއްބަސްވުމެކެވެ. ޕްރެޝަރު ބޮޑުވެ 6.8 މިލިއަން ޑޮލަރު ދައްކާފައި ވާއިރު، ބޭރު ފައިސާގެ ރިޒާވް ވަރަށް ބޮޑަށް ދަށްވެ ސްރީލަންކާ އަށް ވަނޯ ޑޮލަރުގެ ތާށިކަމާ ކުރިމަތިވެފަ އެވެ.
