ޗެނަލް13ގެ ނޫސްވެރިއަކަށް ފުލުހުން އަނިޔާ ކުރި ކަމަށް ބުނާ މައްސަލައެއް ފެންމަތިވެއްޖެ އެވެ.
ޗެނަލް13 ގެ ޗީފް އޮޕަރޭޓިން އޮފިސަރު މުހައްމަދު ސަމާހު "އަދަދު"އަށް ވިދާޅުވީ އެ ނޫސްވެރިޔާ އައިޖީއެމްއެޗަށް ރޭ ދިޔައީ އިއްޔެ އިދިކޮޅުން ބޭއްވި އެއްވުމުގެ ތެރެއިން ހައްޔަރުކުރި މީހަކަށް ފުލުހުން ވަރަށް ބޮޑަށް އަނިޔާކޮށްގެން ޑޮކްޓަރަށް ދައްކަން ގެންދިއުމުން އެކަން ރިޕޯޓްކުރުމަށް ކަމަށެވެ.
ހޮސްޕިޓަލަށް ނޫސްވެރިޔާ ދިއުމުން ފޮޓޯ، ވީޑިއޯ އަދި އެކަމާ ގުޅޭ އެެއްވެސް މައުލޫމާތެއް ނުހޯދޭނެ ކަމަށް ބުނެ ފުލުހުން ހުރަސް އެޅި ކަމަށް ސަމާހު ވިދާޅުވި އެވެ.
"އަޅުގަނޑުމެންގެ ނޫސްވެރިޔާ އެދެމުން ދިޔައީ ކީއްވެތޯ މައުލޫމާތު ނުހޯދޭނީ. ފުލުހުން ކަންތައް ކުރީ މުޒާހަރާގެ ބައިވެރިންނަށް ކަންތައް ކުރާ ގޮތަށް. އަތަށާއި ތަންތަނަށް ތަދުކޮށްލާ. ފަހުން ޑޮކްޓަރަށް ދެއްކީމަ ބުނީ ކޮންމެވެސް ވަރަކަށް ޓިޝޫތައް ޑެމޭޖްވެފައި ހުރި ކަމަށް،" ސަމާހު ވިދާޅުވި އެވެ.
މީގެ އިތުރުން ސަމާހު ވިދާޅުވީ ލިބުނު އަނިޔާތަކުގެ ސަބަބުން އެ ނޫސްވެރިޔާ ހަތަރު ދުވަހު ބެޑްރެސްޓް ކުރަން ޑޮކްޓަރު ބުނެފައިވާ ކަަމަށެވެ.
"އަންހެން ނޫސްވެރިއަކަށް ފިރިހެން ފުލުހުން އަނިޔާކުރީ. ތަކުރާރުކޮށް ކާޑު އެބަ ދައްކާ މިއީ ނޫސްވެރިއެއްކަން ބުނެދޭން. ފިރިހެން ފުލުހުން އަންހެން ނޫސްވެރިންނަށް އަނިޔާ ކުރާތީ އެންމެ ބޮޑު މައްސަލައަކީ," އޭނާ ވިދާޅުވި އެވެ.
ސަމާހު ވިދާޅުވީ އެ ހާދިސާ ހިނގިއިރު ފުލުހުންގެ މީޑިއާ ހޮސްޕިޓަކުގައި ނެތް ކަމަށެވެ. މިކަމާ ގުޅިގެން ފުލުހުންގެ ބަހެއް ނުލިބުނެވެ.
ޕީޕީއެމާއި ޕީއެންސީން އިއްޔެ ބޭއްވި "އިންޑިއާ އައުޓް" ހަރަކާތުގެ ތެރެއިން، ފުލުހުންގެ ދައުރު އަދާކުރުމަށް ހުރަސް އެޅިކަމުގެ ތުހުމަތުގައި ހައްޔަރުކުރި 29 މީހުންގެ ތެރެއިން ދެ މީހަކު ފިޔަވައި އެންމެން މިހާރު ވަނީ ދޫކޮށްލާފަ އެވެ.
