މާލެ ސަރަަހައްދު އެއްފަސްކުރުމުގެ ސިޔާސަތަށް އިސްކަން ދެއްވާ ކަމަށް ވިދާޅުވެ, ކުރީގެ ރައީސް އަބްދުالله ޔާމީން ދެއްކެވި ވާހަކަތަކަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފާޑުވިދާޅުވެއްޖެ އެވެ.
މާލެއަށް މީހުން ޖަމާކޮށް ތޮއްޖެއްސުމަކީ އެމްޑީޕީގެ ސިޔާސަތެއް ނޫންކަން ފާހަގަކުރަމުން ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕެއިން ލޯންޗު ކުރުމަށް ރޭ ބޭއްވި ޖަލްސާއަށް ދިން އޯޑިއޯ މެސެޖެއްގައި ނަޝީދު ވިދާޅުވީ "އެއްހޮރަކުން ދެފަހަރު ކަށި ޖެހިޔަ ދީގެން ނުވާނެ" ކަމަށެވެ.
ޖަޒީރާ ތަރައްގީއަށާއި، ލާމަރުކަޒީ ނިޒާމަކަށް ފެށުނީއްސުރެ ވަކާލާތުކުރައްވަމުން ގެންދަވާ ނަޝީދު ވަނީ އެމްޑީޕީގެ ފަލްސަފާއާ ދެކޮޅަށް، ވޯޓުދޭން ހެޔޮ ނުވާނެ ކަމަށް ވިދާޅުވެފަ އެވެ.
"މާލެ ސަރަހައްދަށް އެންމެން ޖަމާކުރުމަށް ވިސްނާ ބަޔަކު ރަށްރަށް ތަރައްގީ ކުރުމަށް ހަމަކަށަވަރުން ވެސް ނުވިސްނާނެ." ނަޝީދު ވިދާޅުވި އެވެ.
އެމަނިކުފާނު ދެކެވަޑައިގަންނަވާ ގޮތުގައި އިދިކޮޅު ޕީޕީއެމްގެ ލީޑަރު، ރައީސް ޔާމީންގެ ވިސްނުންފުޅުގައި އަތޮޅުތައް ތަރައްގީ ކުރުމެއް ނެތެވެ. އެހެންކަމުން ޕީޕީއެމްގެ ކެންޑިޑޭޓަކަށް އެ ގޮނޑި ދިނުމަކީ "ބޭކާރު ކަމެއް" ކަމަށް ރައީސް ނަޝީދު ގަބޫލުކުރައްވަ އެވެ.
"އަޅުގަނޑުމެންގެ ވާދަވެރިން ވައުދުވަމުން އެ އަންނަނީ ކޮމަންޑޫވެސް އުވާލާނެ ކަމަށް، ރާއްޖެ ތެރެ އުވާލާ މުޅި ހުރިހާ އެންމެން ހުޅުމާލެއަށް ޖަމާކުރާނެ ކަމަށް." ނަޝީދު ވިދާޅުވި އެވެ.
"ކޮމަންޑޫގެ ތަރައްގީއަށް، އަދި ފޯކައިދޫ ވިޔަސް މަރޮށި ވިޔަސް، މިރަށްރަށުގެ ތަރައްގީއަށް އެ ބޭފުޅުންގެ ސިޔާސަތެއް އެކުލަވާލާނެ ގޮތެއް ވެސް ނެތްކަން އަޅުގަނޑުމެން އެންމެންނަށް ސާފު," ކޮމަންޑޫ ދާއިރާއަށް ޕީޕީއެމުން ވާދަކުރަނީ އެއްވެސް އަމާޒެއް، އަދި މިސްރާބެއް ނެތި ކަމަށް ނަޝީދު ވިދާޅުވި އެވެ.
ޕާޓީގެ މަގުސަދަކީ އާންމު ރައްޔިތުންނަށް ވިޔަފާރި ކުރަން މަގުފަހިކުރުން ކަމަށާއި ކޮމަންޑޫއަށް މިއަދު ލިބިފައިވާ ތަނަވަސްކަމަކީ އެ ރަށުގެ ރައްޔިތުން އަމިއްލައަށް ހޯދައިގަތް ތަނަވަސް ކަމެއް ކަމަށް ނަޝީދު ވިދާޅުވި އެވެ. އަދި އެމްޑީޕީގެ ފަލްސަފާއަށް ތާއީދު ބޮޑީ ދޮށީގެ އުމުރުގެ ގިނަ ބަޔަކު ފަހަތުގައި ތިބޭތީކަން ފާހަގަކުރެއްވި އެވެ.
ޓީވީ ޕްރޮގްރާމަކަށް ދިން އިންޓަވިއުއެއްގައި ޔާމީން ވިދާޅުވީ އެމަނިކުފާނަށް އަލުން ވެރިކަން ލިބިވަޑައިގެންފިނަމަ, ކުޅުދުއްފުށި, ތިނަދޫ އަދި އައްޑޫ ފަދަ ތަންތަން އެއްފަސްކުރެވިދާނެތޯ ބެލުމަށް ފައިސާ ބޭންކު ނުކުރައްވާނެ ކަމަށެވެ.
ޔާމީން ވިދާޅުވީ ކުރިއަށް އޮތް 10 ނުވަތަ 20 އަހަރުގައި ވެސް މިހާރު ރާއްޖޭގައި އޮތް ހިޖުރަކުރުމުގެ ޓްރެންޑަށް ބަދަލެއް ނާންނާނެ ކަމަށާއި، މީހުން ޖަމާވަމުން ދަނީ ހިދުމަތްތައް ރަނގަޅު ފެންވަރަކަށް އޮތް މާލެއަށް ކަމަށެވެ. މިހާރުވެސް ތޮއްޖެހިފައިވާ މާލެ ފުރެއްޖެ ކަމަށް އެމަނިކުފާނު ގަބޫލުނުކުރައްވަ އެވެ.
