ކުރީގެ ރައީސުލްޖުމްހޫރިއްޔާ އަދި ރައްޔިތުންގެ މަޖިލީހުގެ މިހާރުގެ ރައީސް މުހައްމަދު ނަޝީދަކީ އިސްލާމް ދީނުގެ އަދުއްވެއްކަމުގައި ސިފަކޮށް އެމަނިކުފާނުގެ ހަށިފުރާނައިގެ ރައްކާތެރިކަން ނަގައިލުމަށް ބަޔަކު ހަރަކާތްތަކެއް ހިންގާ ކަމަށް ބުނެ އެކަމާ ދެކޮޅަށް ފިޔަވަޅު އެޅުމަށް އެމްޑީޕީން ގޮވާލައިފި އެވެ.
ނަޝީދު ރައީސްކަންކުރައްވާ އެމްޑީޕީން މިހެން ބުނީ އެމަނިކުފާނު އިސްލާމް ދީން ފިޔަވައި އެހެން ދީންތަކުގެ ޝިއާރު އެމަނިކުފާނު ފާޅުކުރަމުންދާ ކަމަށް ބުނެ ބަޔަކު އެ މައްސަލަ ސިޓީއަކުން ފުލުހުންނަށް ހުށަހަޅާފައިވަނިކޮށެވެ.
ފުލުހުން އިއްޔެ ބުނީ އެ މައްސަލައިގައި ދީނާ ހިލާފުކަމެއް ނެތް ކަމަށާއި އެކަމުގައި ޖިނާއީ ތަހުގީގެއް ހިންގާނެ ތަނެއް ނެތް ކަމަށެވެ.
އެމްޑީޕީން މިއަދު މެންދުރުފަހު ނެރުނު ބަޔާނުގައި ބުނީ، ނަޝީދު ގައިރު ދީންތައް ޕްރޮމޯޓުކުރާ ކަމަށް ބުނެ ދޮގު ވާހަކަތަކެއް މެދުވެރިކޮށް އެ މަނިކުފާނުގެ ހަށިފުރާނައިގެ ރައްކާތެރިކަން ނަގައިލުމަށް ވާގިވެރިވަމުންދާ ހަރަކާތާމެދު ގާނޫނީ ފިޔަވަޅު އެޅުމަށް އެ ޕާޓީން ސަރުކާރަށް ގޮވާލާ ކަމަށެވެ.
އެ ޕާޓީން ވަނީ ދައުލަތުގެ މުއައްސަސާތައް މެދުވެރިކޮށްގެން އެ މަނިކުފާނުގެ އިސްތަށިފުޅުގައި ލާދީނީ ލޭބަލް އެޅުވުމަށް އެ ހަރަކާތުން މަސައްކަތްކުރަމުންދާކަމީ ހާއްސަ ކަންބޮޑުވުމެއްގެ ގޮތުގައި ފާހަގަކޮށްފަ އެވެ.
އެމްޑީޕީން ބުނީ ނަޝީދު އަވަހާރަކޮށްލަން ދިން ޓެރަރިސްޓް ހަމަލާއަށް އަހަރެއް ނުފުރު އުޅެނިކޮށް، އަމުދުން އެ ހަމަލާގެ އަޑީގައިވި ފަރާތްތައް އަދިވެސް ހޯދިފައިނުވާއިރު، ނަޝީދަކީ ކާފަރެއްކަމުގައި ސިފަކުރުމުގެ ފިތުނަވެރި ހަރަކާތެއް އަނެއްކާ އުފައްދާ، އިންތިޒާމުވެ، ހިންގާން ދޫކުރުމަކީ އެ މަނިކުފާނުގެ ފުރާނަފުޅު ނުރައްކަލަށް ހުށަހެޅުން ކަމަށެވެ.
"ޓެރަރިސްޓް ޙަމަލާތަކަށް ދިވެހި މުޖުތަމަޢު ހުށަހެޅުމަށް ތައްޔާރަށް ތިބި ހައްދުފަހަނައެޅި ދީނީ ހަރުކަށި ވިސްނުމުގެ މީހުން ތިބިކަން ސަލާމަތީ ހިދުމަތްތަކުން ހާމަކުރަމުންދާ ހިނދު، ރައީސް ނަޝީދަކީ ކާފަރެއްކަމުގައި ސިފަކުރުމުގެ ފިތުނަވެރި ހަރަކާތެއް އަނެއްކާ އުފައްދާ، އިންތިޒާމުވެ، ހިންގާން ދޫކުރުމަކީ އެ މަނިކުފާނުގެ ފުރާނަފުޅުގެ އިތުރުން، ދިވެހި ގައުމުގެ ސަލާމަތާއި ރައްކާތެރިކަމަށް ލޮޅުން އަރުވާފަދަ ނުރައްކާތެރި ކަމެއްކަމުގައި މެނުވީ މި ޕާޓީއިން ނުދެކޭކަމުގައިވެސް ދެންނެވީމެވެ،" ބަޔާނުގައިވެ އެވެ.
