ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އިދިކޮޅު ޕީޕީއެމްގެ ކެންޑިޑޭޓުގެ ކެމްޕެއިންގައި ބައިވެރިވަޑައިގަތުމަށް އެ ޕާޓީގެ ލީޑަރު، އަދި ކުރީގެ ރައީސް އަބްދުﷲ ޔާމީން ށ. ކޮމަންޑޫއަށް ވަޑައިގަތުމަށް ނިންމަވައިފި އެވެ.
މި ހަފްތާގެ ހުކުރު ދުވަހު ސަރުކާރުގެ ކެންޑިޑޭޓުގެ ކެމްޕެއިންގައި ބައިވެރިވަޑައިގަތުމަށް ރައީސް އިބްރާހިމް ސޯލިހްވެސް އެ ރަށަށް ވަޑައިގަންނަވާނެ އެވެ.
ޔާމީން ކޮމަންޑޫއަށް ވަޑައިގަންނަވާނީ އަންނަ ހަފްތާގެ ހުކުރު ދުވަހު ކަމަށް އެމަނިކުފާނު ލީޑް ކުރައްވާ ޕްރޮގްރެސިވް ކޯލިޝަންގެ ތެރޭގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ "އަދަދު"އަށް ވިދާޅުވި އެވެ.
ޕީޕީއެމްގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ މޫސާ ފަތުހީގެ ކެމްޕެއިނަށް މިދިޔަ ޑިސެމްބަރު 29 ވަނަ ދުވަހުގެ ރޭ އިދިކޮޅު ލީޑާޝިޕްގެ ބައެއް އިސް ބައެއް ބޭފުޅުން ކޮމަންޑޫއަށް ވަޑައިގެންނެވި އެވެ.
އެ ޓީމުގައި އިސްކޮށް ހުންނެވީ އަބްދުއްރަހީމާއި ޕީއެންސީގެ ޕާލިމެންޓްރީ ގްރޫޕްގެ ލީޑަރު، އާދަމް ޝަރީފް އުމަރެވެ. މި ދަތުރު ނިންމާލުމަށް ފަހު އެ ޓީމުގެ އިސްވެރިން ވަނީ އިއްޔެ މާލެ ވަޑައިގެންފަ އެވެ.
އިދިކޮޅު ލީޑާޝިޕުން ކޮމަންޑޫއަށް ދިއުމުން މަރުހަބާ ކިޔަން ގޮސްތިއްބަ: މިހާރު އެ ދަތުރު ނިންމާލުމަށްފަހު އެ ޓީމު ވަނީ އެނބުރި މާލެ އައިސްފައި -- ފޮޓޯ: ޓްވީޓާ، އާދަމް ޝަރީފް
ޕީޕީއެމް އިން ބުނީ ކޮމަންޑޫގެ އިތުރުން އެ ދާއިރާގައި ހިމެނޭ މަރޮށި، އަދި ފޯކައިދޫއަށް ޒިޔާރަތް ކުރައްވާނެ ކަމަށާއި، އެ ތިން ރަށުގައި ޑޯޓުޑޯގެ ހަރަކާތްތައް ވެސް ކުރިއަށް ގެންދާނެ ކަމަށެވެ.
ޕީޕީއެމްގެ ޓިކެޓުގައި ކޮމަންޑޫ ދާއިރާއަށް ވާދަކުރައްވާ މޫސާ ފަތުހީއަކީ ށ.އަތޮޅު ކައުންސިލްގެ ރައީސްކަން ކުރައްވާފައިވާ ބޭފުޅެކެވެ. އަދި ކުރިން ކޮމަންޑޫ ކުޑަ ކަތީބުކަންވެސް އޭނާ ކުރެއްވި އެވެ. މީގެ އިތުރުން އޭނާއަކީ ކުރީ ސަރުކާރުގައި ހޯމް މިނިސްޓަރުގެ ނައިބުކަންވެސް ކުރެއްވި ވަކީލެކެވެ.
titledesc
އަންނަ ފެބްރުއަރީ ފަސްވަނަ ދުވަހު މި އިންތިހާބު ބާއްވަނީ ކޮމަންޑޫ ދާއިރާގެ މެމްބަރުކަން ކުރައްވަމުން ގެންދެވި ހުސެއިން ވަހީދު، 53، ކެންސަރު ބަލީގައި އަވަހާރަވުމުންނެވެ.
