ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ކުޅުނު މެޗުގައި ސުޕަ ޔުނައިޓެޑް ސްޕޯޓްސް (ސަސް) އަތުން 2-1 އިން ކްލަބް ގްރީން ސްޓްރީޓްސް އިން މުހިންމު މޮޅެއް ހޯދައިފި އެވެ.
ޕްރެޒިޑެންޓްސް ކަޕްގެ ލީގު ބުރުގައި ކޮންމެ ޓީމެއް ހަތަރު މެޗު ކުޅެފައިވާއިރު، އެއް ވަނައިގައި އޮތް މާޒިޔާ އާއި ދެ ވަނައިގައި އޮތް ވެލެންސިއާ އަށް ވަނީ 12 ޕޮއިންޓް ލިބިފަ އެވެ. މާޒިޔާ އަށް ކުރި ލިބެނީ ފައިދާ ގޯލު އެއްވަރުވެ، ޖެހި ގޯލުގެ ތަފާތުންނެވެ. މިރޭގެ މޮޅާ އެކު ގްރީން ސްޓްރީޓްސް އިން ވަނީ ތިން ވަނައިގައި ލީޑެއް ނަގައިފަ އެވެ. ގްރީން ސްޓްރީޓްސް އަށް ނުވަ ޕޮއިންޓް ލިބިފައިވާއިރު، ހަތަރެއްގައި އޮތް ސަސްގެ އޮތީ ހަ ޕޮއިންޓެވެ.
ފަސް ވަނައިގައި އޮތް އީގަލްސް އާއި ހަ ވަނައިގައި އޮތް ޓީސީ ސްޕޯޓްސް ކްލަބަށް ވަނީ ތިން ޕޮއިންޓް ލިބިފަ އެވެ. ހަތް ވަނައިގައި އޮތް ޔުނައިޓެޑް ވިކްޓްރީ (ޔޫވީ) އާއި ފުލުގައި އޮތް ދަ ގްރާންޑޭ ސްޕޯޓްސް ކްލަބަށް ވަނީ ޕޮއިންޓެއް ލިބިފަ އެވެ.
ޕްރެޒިޑެންޓްސް ކަޕްގެ ފައިނަލުން ފުރުސަތު ލިބޭނީ ލީގު ބުރު ނިމޭއިރު އެއް ވަނަ އާއި ދެ ވަނަ ޓީމަށެވެ. ކޮންމެ ޓީމަކަށް ބާކީ ތިން މެޗު އެބައޮތެވެ.
ގްރީން ސްޓްރީޓްސްގެ ޔާނު (ކ) ސަސްގެ މުލަކޭ ކައިރިން ބޯޅަ ހިފައިގެންދަނީ.-- ފޮޓޯ: މުހައްމަދު ޝާބިން/ އަދަދު
ގްރީން ސްޓްރީޓްސް އިން މިރޭގެ މެޗަށް ނުކުތީ ކާޑު ހަމަވުމުގެ ސަބަބުން ސަސްޕެންޝަނުގައި ހުރި ޓީމުގެ ކެޕްޓަން ރިލްވާން ވަހީދު (ރިލޭ) ނުލަ އެވެ. ގްރީން ސްޓްރީޓްސްގެ ފުރަތަމަ އެގާރައިގައި ވަނީ އެ ޓީމުގެ ސްޕެއިން މިޑްފީލްޑަރު އެންހެލް ކަރަސްކޯސާ މުނޯޒް ހިމަނައިފަ އެވެ. ސަސް އިން ވަނީ މެޗަށް ނެރެން ނިންމި ފުރަތަމަ އެގާރަ އަށް ފަހު ވަގުތު ބަދަލެއް ގެނެސްފަ އެވެ. މަމްދޫހު އިބްރާހިމްގެ ބަދަލުގައި އަހުމަދު ފަރުހާން (ގައްބެ) ވަނީ ކުޅެން އަރުވައިފަ އެވެ.
މެޗު ފަށައިގެން ސަސްގެ ޔަސްފާދު ހަބީބު (މުލަކޭ) އާއި އިބްރާހިމް އަތީގް ހަސަން (އިއްބެ) ފޮނުވާލި ހަމަލާތައް ދިޔައީ ގޯލާސީދާނުވެ އެވެ. ގްރީން ސްޓްރީޓްސް އިން ވަނީ މެޗުގައި ތަނަވަސްކުރި ރަނގަޅު ފުރަތަމަ ފުރުސަތުގައި ލީޑުނަގައިފަ އެވެ. މެޗުގެ 22 ވަނަ މިނިޓްގައި އޭރިއާ ރޮނގުކައިރިން ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ދިން ބޯޅަ މުނޯޒް ވަނީ ގޯލުގެ މަތީ ކަނަށް އަމާޒުކޮށްލައިފަ އެވެ.
އެ ގޯލު ޖެހިތާ ހަ މިނިޓް ތެރޭ އަންސަރު އިބްރާހިމް (އަންކޮ) ވަނީ ގްރީން ސްޓްރީޓްސްގެ ލީޑުފުޅާކޮށްދީފަ އެވެ. މެޗުގެ 28 ވަނަ މިނިޓްގައި ގްރީން ސްޓްރީޓްސްގެ އަލީ ޝާމިއު (މައިތޯ) ބޯޅަ ހިފައިގެން އޭރިއާތެރެއަށް ވަދެ ތަނަވަސްކުރި ފުރުސަތެއްގައި އަންކޮ އަށް ލިބުނު ބޯޅަ އޭނާ ވަނީ ތިރިތިރިން ގޯލުގެ ތެރެއަށް ފޮނުވާލައިފަ އެވެ.
ސަސް އަށް ފުރަަތަމަ ހާފުގައި ގޯލެއް ޖަހައިދޭން މެޗުގެ 29 ވަނަ މިނިޓްގައި އިއްބެ އަށް ރަނުގެ ފުރުސަތެއް ލިބުނެވެ. ކުޑަ އޭރިއާތެެރެއިން ހުސްކޮށް ކަހަލަ ގޮތަކަށް އިއްބެ އަށް ލިބުނު ބޯޅަ ފޮނުވާލުމުން ގްރީން ސްޓްރީޓްސްގެ ޑިފެންޑަރު އިބްރާހިމް ހަސީބް ވަނީ ސަލާމަތްކޮށްފަ އެވެ.
ދެ ވަނަ ހާފް ފަށައިގެން ރަނގަޅު ކުޅުމެއް ދައްކަމުން ދިޔަ ސަސް އިން ވަނީ 50 ވަނަ މިނިޓްގައި ފުރަަތަމަ ގޯލު ޖަހައިފަ އެވެ. މި ލަނޑު ޖެހީ އޭރިއާތެރެއިން ލިބުނު ފުރުސަތަކުން މުލަކޭ އެވެ. މުލަކޭ ފޮނުވާލި ބާރު ބޯޅަ އަމާޒުވީ ގޯލުގެ ދުރުކަނަށެވެ.
މެޗުގެ މޮޅު ކުޅުންތެރިޔާގެ މަގާމު ހޯދި އަންކޮ (ކ) ސަސްގެ ސާމިރު ކައިރިން ބޯޅަ ހިފައިގެންދަނީ.-- ފޮޓޯ: މުހައްމަދު ޝާބިން/ އަދަދު
ގްރީން ސްޓްރީޓްސްގެ ތިން ވަނަ ގޯލު ޖަހަން މެޗުގެ 62 ވަނަ މިނިޓްގައި އަބްދުﷲ ޔާމީން (ޔާނު) ޖެހި ބޯޅަ ސަސްގެ ޑިފެންޑަރަކު ފައިގައި ޖެހިފައި ދިޔައީ ބޭރުންނެވެ. އޭގެ ތިން މިނިޓް ފަހުން އޭރިއާތެރެއިން ޗޯޓު ޖެހި ބޯޅަ ސަސްގެ ކީޕަރު މުހައްމަދު ޝަފީއު (ޗެކް) ވަނީ ރަނގަޅު ވަގުތުގައި އަރައި ބޯޅަ މަތަކޮށްފަ އެވެ.
މެޗުގެ ފަހު ވިއްސަކަށް މިނިޓްގައި ސަސް އިން ނަތީޖާ ހަމަހަމަކުރަން ވަރަށް ބޮޑަށް ކުރިއަށް ޖެހިގެން ކުޅެމުންދިޔައިރު، ލިބުނު ހިލޭ ޖެހުމެއްގައި އައިހަމް އަހުމަދު ޖެހި ބޯޅަ ދިޔައީ ދަނޑިކައިރިން ބޭރުންނެވެ.
ކައުންޓަ އެޓޭކުގައި ގްރީން ސްޓްރީޓްސް އިން ވެސް ދިޔައީ ނުރައްކާ ކުރަމުންނެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ގްރީން ސްޓްރީޓްސްގެ އަލީ ޝާމިސް (ތޮއްޕޭ) ރަނގަޅު ހުރަސްތަކެއް ކުރި ނަމަވެސް އެ ބޯޅަތައް ފޮނުވާލަން އަރާނެ ކުޅުންތެރިއަކު ނުވި އެވެ.
ސަސް އިން އިތުރު ވަގުތުގެ ގޮތުގައި ދެއްކި ހަ މިނިޓް ތެރޭގައި ނަތީޖާ ހަމަހަމަކުރެވޭތޯ ގިނަ މަސައްކަތްތަކެއް ކުރި ނަމަވެސް ކާމިޔާބުވާ ގޮތެއްނުވި އެވެ. ގްރީން ސްޓްރީޓްސްގެ ގޯލްކީޕަރު އަހުމަދު ރަމީޒް ވަނީ އެ ބޯޅަތައް ހުއްޓުވަން ރަނގަޅު ކުޅުމެއް ދައްކައިފަ އެވެ.
