އެމަނިކުފާނަކީ ލާދީނީ ބޭފުޅަށް ކަމަށް ތުހުމަތުކޮށް އެފަދަ އިލްޒާމްތައް އަޅުވަމުންދާ ހަމައެކަނި މަގްސަދަކީ ޖާނަށް ނުރައްކާ ދިނުން ކަމަށާއި އެކަމާމެދު ފިޔަވަޅު އެޅުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު އެދިވަޑައިގެންފި އެވެ.
ނަޝީދު އެގޮތަށް ވިދާޅުވީ، އިސްލާމް ދީން ފިޔަވައި އެހެން ދީންތަކުގެ ޝިއާރު އެމަނިކުފާނު ފާޅުކުރަމުންދާ ކަމަށް ބުނެ ބަޔަކު އެ މައްސަލަ ސިޓީއަކުން ފުލުހުންނަށް ހުށަހަޅާފައި އޮއްވަ އެވެ. އެ ސިޓީ ފުލުހުންނަށް ހުށަހެޅި ކަމަށް ބުނެ ރާއްޖޭގެ ބައެއް މީޑިއާތަކުން އޮތީ އެކަން ރިޕޯޓު ވެސް ކޮށްފަ އެވެ.
"އޭގެ ހަމައެކަނި މަގްސަދަކީ އަޅުގަނޑުގެ ޖާނަށް ނުރައްކާ ދިނުން،" ނަޝީދު ވިދާޅުވެފައިވެ އެވެ.
ރާއްޖޭގެ ސިޔާސީ މަސްރަހުގައި އެމަނިކުފާނުގެ ޒާތަށް ކުޑައިމީސް ބަހެއް ރައްދުނުކޮށް ސިޔާސީ ބަހުސް ނުކުރެވޭ ދަރަޖައަށް ކަންކަން ގޮސްފައިވާ ކަމަށް ވިދާޅުވެ ނަޝީދު ވަނީ އެ ބަޔާނުގައި ވަނީ ކަންބޮޑުވުން ފާޅު ކުރައްވައިފަ އެވެ.
"އަޅުގަނޑާ ދެކޮޅަށް އެއްލާ އެތިފަހަރުތަކުގެ ބަސްމަގު، ހަރުކަށި ފިކުރުގެ މީހުން ހިތާވާ ރާގަށް އަނބުރަމުންދާތީ ކަންބޮޑުވާތާ ދުވަސްކޮޅެއް ވެއްޖެ," ނަޝީދު ވިދާޅުވި އެވެ.
އެފަދަ އަސާސެއް ނެތް މައްސަލަތައް ފުލުހުންނަށް ހުށަހެޅެނީ ގާނޫނުލްއުގޫބާތަށް ފަސްވަނަ އިސްލާހު ގެނައުމުގެ ބިލުގައި "އިސްލާމީ އަގީދާއާ ގުޅުވައި، މުޖުތަމައުގެ މީހަކާ މެދު ނަފްރަތު އުފެއްދުން" ކުށެއްގެ ގޮތުގައި ކަނޑައެޅިފައި ނުވާތީ ކަމަށް ނަޝީދު ފާހަގަ ކުރެއްވި އެވެ. ނަމަވެސް އެ މައްސަލަތައް ތަހުގީގުކޮށް ފިޔަވަޅު އެޅުމަށް އެދިވަޑައިގަންނަވާ ކަމަށް ނަޝީދު ވިދާޅުވި އެވެ.
ލާދީނީ މީހެއް ކަމަށް ބުނެ ފަތުރާ އިލްޒާމްތަކަށް ފިޔަވަޅު އަޅާނެކަމުގެ އުއްމީދުގައި ހުރިން،" ނަޝީދު އެ ބަޔާނުގައި ވިދާޅުވެފައިވެ އެވެ.
އެ ބިލު އެންމެ ފުރަތަމަ މަޖިލީހަށް ހުށަހެޅިއިރު އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ހިމަނާފައި އޮތެވެ. އެހެން ނަމަވެސް މިދިޔަ އަހަރުގެ ނޮވެމްބަރު މަހުގެ 28 ވަނަ ދުވަހު އެ ބިލް ގާނޫނަކަށް ވެގެން އައިއިރު އެބައި ހިމަނާފައެއް ނުވެއެވެ.
ޖާނަށް ނުރައްކާ އޮތްކަމުގެ ބިރު ނަޝީދު ފާޅުކުރެއްވިއިރު، އެމަނިކުފާނު އަވަހާރަކޮށްލުމަށް މެއި 6، 2021 ގައި ޓެރަރިސްޓު ޖަމާއަތް އައިސިސްއަށް ތާއީދު ކުރާ ބަޔަކު ވަނީ މާލޭގައި ވަރުގަދަ ބޮމެއް ގޮއްވާލައިފަ އެވެ. އެ ހަމަލާގައި ނަޝީދު އަވަހާރަނުވީ ހަމަ ކިރިޔާ އެވެ.
ސައިކަލެއްގައި ބޮމެއް ހަރުކޮށް ދިން އެ ހަމަލާގައި ނަޝީދުގެ އިތުރުން ހަތަރު މީހަކު ޒަހަމްވި އެވެ. ބޮން ގޮއްވީ އާންމުންގެ މީހަކު ގުރްބާންކޮށްފައި ވެސް ނަޝީދު އަވަހާރަކޮށްލުމުގެ މަގްސަދުގައި ކަމަށް ފުލުހުން ވަނީ ބުނެފަ އެވެ.
އޭގެ އިތުރުން، ނަޝީދަކީ ލާދީނީ ބޭފުޅެއް ކަމަށް ވިދާޅުވެ، ދީން ކިޔަވައިގެން ތިބި ބައެއް މީހުންނާއި އިސްލާމް ދީން ފަތުރަން އުޅޭ ކަމަށް ބުނާާ ބައެއް ޖަމިއްޔާތަކުން ދަނީ އެމަނިކުފާނާ ދެކޮޅަށް ކެމްޕެއިނުތަކެއް ކުރަމުންނެވެ. އެގޮތުން ނަޝީދަކީ މުސްލިމެއް ނޫން ކަމަށް ވަރަށް ފާޅުގައި ބައެއް އިލްމުވެރިން ވަނީ އިއުލާންކޮށްފަ އެވެ. ނަމަވެސް މިހާތަނަށް އެކަންތައްތަކާމެދު އެއްވެސް ފިޔަވަޅެއް އަޅާފައެއް ނުވެ އެވެ.
