ކޯޓުތަކުގައި މަސައްކަތް ކުރާ އަންހެން މުވައްޒަފުންނަށް ފިރިހެން ފަނޑިޔާރުންގެ ފަރާތުން ޖިންސީ ފުރައްސާރަ ކުރުމުގެ ދަށުދަރަޖައިގެ އަމަލުތަކެއް ފާހަގަކުރެވިފައިވާ ކަމަށް ޖުޑީޝިއަލް ސާވިލް ކޮމިޝަން (ޖޭއެސްސީ)އިން ބުނެފި އެވެ.
އެ ކޮމިޝަންގެ 2020 ވަނަ އަހަރުގެ އަހަރީ ރިޕޯޓް އާންމުކުރަމުން ބުނީ، އެފަދަ މައްސަލަތައް ދިމާވާ މިންވަރު ދެނެގަތުމަށްޓަކައި ދިރާސާއެއް ހެދުމަށް ނިންމާ، އެ މަސައްކަތް ކުރަމުންދާ ކަމަށެވެ.
މިކަން ތަފްސީލުކޮށްދެމުން އެ ކޮމިޝަންގެ ތަރުޖަމާން އިޒްމީރާ ޝިހާމް "އަދަދު" އަށް ވިދާޅުވީ 2019 ވަނަ އަހަރު ތެރޭގައި ކޯޓުތަކުގައި ޖިންސީ ފުރައްސާރަ ކުރުމުގެ އަމަލުތައް ހިނގާކަން ދެނެގެވިގެން އެމެރިކާގެ ބާ ކައުންސިލާއެކު އެކަން ތަހުގީގު ކުރުމުގެ މަސައްކަތް ފެށިގެން ދިޔަ ކަމަށެވެ. އަދި އެ މަސައްކަތަށް ބޭރުގެ އެހެން ކޮންސެލްޓެންޓުންގެ ވެސް އެހީ ހޯދުމުގެ މަސައްކަތް ޖޭއެސްސީން ކުރިކަން އޭނާ ފާހަގަކުރެއްވި އެވެ.
"މިކަހަލަ މައްސަލަތައް އޭރު އޮތީ ނުދައްކާ ވާހަކައެއްގެ ގޮތުގައި، މުވައްޒަފުން ޖެހިލުންވޭ އޭރު މިކަހަލަ ވާހަކަ ދައްކަން،" ޖިންސީ ގޯނާއާއި ފުރައްސައިރައިގެ ސީރިއެސް ތުހުމަތުތަކެއް ފަނޑިޔާރުންނަށް ފުރަތަމަ ފަހަރަށް ކުރެވިގެން ދިޔަ ގޮތް އިޒްމީރާ ކިޔައިދެއްވި އެވެ.
މިހާތަނަށް ޖިންސީ ގޯނާގެ ތުހުމަތުތަކުގައި ތިން ފަނޑިޔާރެއް މަގާމުން ވަކިކޮށްފައިވާއިރު، އެ ތިން ބޭފުޅުންގެ މައްސަލަ ބަލައިދިނުމަށް ޖޭއެސްސީން ވަނީ ފުލުހުންނަށް ވެސް ހުށަހަޅާފަ އެވެ.
އެއީ ތުލުސްދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އައިނާން އަލީ މުހައްމަދާއި ރ. މާކުރަތު މެޖިސްޓްރޭޓް ކޯޓުގެ އިސް މެޖިސްޓްރޭޓް އަދުނާން ހުސެއިން އަދި ގއ. ކަނޑުހުޅުދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް ހަސަން ދީދީ އެވެ.
އަދުނާންގެ މައްޗަށް ތުހުމަތުކުރަނީ މާކުރަތު ކޯޓުގެ މުވައްޒަފުންގެ ތެރެއިން ދެ އަންހެނަކަށް އެކި ފަހަރު މަތިން ޖިންސީ ގޯނާކޮށް، ޖިންސީ ފުރައްސާރަ ކުރި މައްސަލަ އެވެ. ޖޭއެސްސީއަށް މިކަން އެނގުނީ އަށް އަހަރު ފަހުންނެވެ. އެކަން ކަމާބެހޭ ފަރާތްތަކާ ހަމައަށް ނުގޮސް ސިއްރުކޮށްފައިވަނީ ދެ އަންހެނުންނަށް އަދުނާން ބިރުދައްކާ ނުފޫޒު ފޯރުވާތީ ކަމަށް ޖޭއެސްސީގެ ތަހުގީގަށް ފާހަގަކުރެވިފައިވެ އެވެ.
ހަސަން ދީދީއާ ގުޅިގެން ޖޭއެސްސީން ފުލުހަށް ހުށަހެޅި ހަތް މައްސަލައިގެ ތެރޭގައި ހިމެނެނީ އޮރިޔާން ވީޑިއޯ މުވައްޒަފުންނަށް ދައްކާ ކަމަށް ބުނާ މައްސަލައަކާއި، މުވައްޒަފުންނަށް ޖިންސީ ގޯނާ ކުރާކަމުގެ ޝަކުވާއާއި، މުވައްޒަފުންނަށް މަޖުބޫރުކުރުވާ ކަމަށް ބުނާ މައްސަލައެކެވެ.
މި ތިން ފަނޑިޔާރުންގެ ތަހުގީގުގެ ތަފްސީލެއް އަދި ފުލުހުން ނުދެ އެވެ. ދައުވާ ކުރި ކަމެއް ވެސް އަދި ސާފު ނުވެ އެވެ.
ޖޭއެސްސީން ބުނީ މިހާރު ވެސް ފަނޑިޔާރަކަށް ޖިންސީ ގޯނާގެ ތުހުމަތެއް އަމާޒުވެގެން ތަހުގީގުކުރަމުންދާ ކަމަށެވެ. އެއީ ގއ. ދާންދޫ އިސް މެޖިސްޓްރޭޓް ލުއައްޔު އިބްރާހީމްގެ މައްޗަށް ތުހުމަތު ކުރެވޭ ޖިންސީ ގޯނާގެ މައްސަލައެއް ކަމަށް އެ ކޮމިޝަނުން ބުންޏެވެ.
