އާ އަހަރާ ދިމާކޮށް، ޑްރަގާއި ދެކޮޅަށް ފުލުހުން ހިންގި ތިން އޮޕަރޭޝަނަކުން ބިޔަރާއެކު ގިނަ ޑްރަގު ޕީސްތަކެއް އަތުލައިގަނެފި އެވެ.
މިދިޔަ ޑިސެމްބަރު 29 ވަނަ ދުވަހު ވިލިމާލެއިން 33 އަހަރުގެ ދިވެހި ފިރިހެނެއްގެ އަތުން ޑްރަގް ކަމަށް ޝައްކުކުރެވޭ އެއްޗެއް ހުރި ސެލޯފިން ކޮތަޅެއް ފެނިގެން ހައްޔަރު ކުރި ނަމަވެސް އޭނާ ވަނީ ކޯޓުން ދޫކޮށްލާފަ އެވެ.
ޖެހިގެން އައި ދުވަހު ކ. ދިއްފުށިން ޑްރަގް ކަމަށް ޝައްކުކުރެވޭ އެއްޗެއް ހުރި 21 ކަރުދާސްކޮޅާއި ރަބަރު ޕެކެޓާއި އެކު 38 އަހަރުގެ ދިވެހި ފިރިހެނެއް ފުލުހުން ހައްޔަރު ކުރި އެވެ. އޭނާ ދިރިއުޅޭ ގެ ބަލާ ފާސްކުރިއިރު އިތުރު 50 ކޮތަޅު ފުލުހުންނަށް ފެނުމުން އެރަށު މެޖިސްޓްރޭޓް ކޯޓުން ވަނީ ތަހުގީގުގެ ބޭނުމަށް އޭނާ 15 ދުވަހުގެ މުއްދަތަށް ބަންދުކޮށްފަ އެވެ.
ދިއްފުށިން ފުލުހުން އަތުލާގަތް ޑްރަގް ކަރުދާސް ކޮތަޅުތައް ފޮޓޯ: ފުލުހުން
ލޯކަލް ޓުއަރިޒަމް އެންމެ ފުޅާ، އަދި އާ އަހަރާ ދިމާކޮށް، އެންމެ ބާރު ބޮޑު އެއް އެރަށް ކަމަށްވާ މާފުށިން މިދިޔަ އަހަރުގެ އެންމެ ފަހު ދުވަހު ފުލުހުން ވަނީ ދެ ކޭސް ބިޔަރު ދަޅުވެސް އަތުލާގަނެފަ އެވެ. އެ މައްސަލާގައި އަދި މީހަކު ހައްޔަރެއް ނުކުރެ އެވެ.
މިދިޔަ އަހަރު ފުލުހުން ވަނީ މަސްތުވާތަކެއްޗާ ގުޅޭ 1577 މައްސަލައެއް ތަހުގީގުކޮށްފަ އެވެ. އެ މަސައްކަތް އިތުރު ހަރުފަތަކަށް ގެންދިއުމަށްޓަކައި ރައިސުލްޖުމްހޫރިއްޔާ ރިޔާސަތު ބަލަހައްޓަވާ ގޮތަށް ޓާސްކް ފޯސްއެއްވެސް މިހާރު ވަނީ އެކުލަވާލާފަ އެވެ. އަދި ގޭންގްތަައް ރޫޅާލުމަށާއި، މަސްތުވާތަކެތީގެ ވިޔަފާރީތައް ހުއްޓުވުމަށްވެސް ޓާސްކްފޯސްއެއް އެކުލަވާލާފައި ވެއެވެ.
މީގެ އިތުރުން މަސްތުވާތަކެތީގެ ގާނޫނަށް ބޮޑު އިސްލާހެއް މިއަހަރު ތެރޭގައި ގެނައުމަށްޓަކައި ފުލުހުންނާއި އެޓާނީ ޖެނެރަލް އޮފީހާއި ގުޅިގެން މަސައްކަތް ކުރަމުން ގެންދާ ކަމަށާ، ކުރިއަށް އޮތް ހަ މަސް ދުވަސްތެރޭ މަސްތުވާތަކެއްޗާއި ދެކޮޅަށް ކުރާ މަސައްކަތުގެ ބޮޑު ނަތީޖާއެއް ފެނިގެން ދާނެ ކަމަށް ހޯމް މިނިސްޓަރު އިމްރާން އަބްދުﷲ އާއި ފުލުސް ކޮމިޝަނަރު މުހައްމަދު ހަމީދުއާއި ދެބޭފުޅުންވެސް ވިދާޅުވި އެވެ.
މި މަސައްކަތަށް ސިޔާސީ ނުފޫޒާއެކު ގިނަ ހުރަސްތައް ހުރިކަން ސީޕީ ފާހަގަކުރެއްވި އެވެ. ނަމަވެސް "އެންމެ އިންޗިއެއްވެސް ދޫނުދޭނެ" ކަމަށާއި، "ނުރައްކަލަށް ހުށަހެޅިގެންވެސް" މަސްތުވާތަކެތީގެ މައްސަލަތައް ހުއްޓުވުމަށް މަސައްކަތް ކުރައްވާނެ ކަމުގެ ޔަގީންކަން ސީޕީ އެރުވި އެވެ.
