ވޮޝިންޓަން، އެމެރިކާ (ޑިސެމްބަރު 30) - އަފްގާނިސްތާން އަންހެނުންގެ ހައްގުތައް ދިފާއު ކުރަން ހާއްސަ އެމެރިކާގެ މަންދޫބެއް ކަނޑައަޅައިފި އެވެ.
އެ މަގާމަށް ހަމަޖެއްސީ އަފްގާނިސްތާނަށް އުފަން އެމެރިކާގެ ތަޖުރިބާކާރު ރީނާ އާމިރީ އެވެ. އޭނާ ވަނީ ކުރީގެ ރައީސް ބަރަކް އޮބާމާގެ ސަރުކާރުގައި ސްޓޭޓް ޑިޕާޓްމަންޓުގައި މަސައްކަތް ކުރައްވާފަ އެވެ.
ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވީ އާމިރީ ފުރުއްވާނީ އަފްގާން އަންހެނުންނާއި، އަންހެން ކުދިން އަދި އިންސާނީ ހައްގުތަކާ ބެހޭ މަންދޫބުގެ މަގާމު ކަމަށެވެ.
އެމެރިކާ އިން އަފްގާނިސްތާނުގައި ކުރި 20 އަހަރުގެ ހަނގުރާމަ މިދިޔަ އޯގަސްޓު މަހު ނިންމާލާފައި ވާއިރު، ބްލިންކެން ވިދާޅުވީ ރީނާ އާމިރީގެ މަސައްކަތަކީ ރައީސް ޖޯ ބައިޑެންގެ ސަރުކާރަށް މުހިއްމު މަސައްކަތެއް ކަމަށެވެ.
"އަޅުގަނޑުމެން ބޭނުން ވަނީ ސުލްހަވެރި، ހަމަޖެހުން އޮތް ރައްކާތެރި އަފްގާނިސްތާނަށް ފެންނަން. ހުރިހާ އަފްގާން ރައްޔިތުންނަށް ވެސް ހަމަޖެހުމާ އެކު ދިރިއުޅުމުގެ ފުރުސަތު އޮތް، ސިޔާސީ އަދި އިޖުތިމާއީ ބައިވެރިވުން ޔަގީންވާ މާހައުލެއް،" ބްލިންކެން ވިދާޅުވި އެވެ.
ތާލިބާނުން 1996 އިން 2001 އަށް ވެރިކަން ކުރި އިރު އަންހެނުންގެ ހައްގުތައް އޮތީ ހިފަހައްޓާފަ އެވެ. އެގޮތުން ވަޒީފާ އަށް ދިޔުމާއު ކިޔެވުން މަނާކުރި އެވެ.
މިދިޔަ އޯގަސްޓު މަހު އަލުން ވެރިކަމަށް އައި ތާލިބާނުން މި ފަހަރު ހައްގުތައް ދޭން ވައުދުވި ނަމަވެސް، އެ ވައުދު ފުއްދާ މަންޒަރެއް ނުފެނެ އެވެ.
މިހާރު ގިނަ އަންހެނުން ވަޒީފާ އަށް ދިޔުން މަނާކޮށްފައި ވާއިރު، ގިނަ އަންހެން ކުދިން ވަނީ ސާނަވީ ތައުލީމުން މަހްރޫމުކޮށްފަ އެވެ.
މިދިޔަ އާދީއްތަ ދުވަހު ތާލިބާނުން ބުނީ އާއިލާގެ ފިރިހެން މެމްބަރަކާ އެކު ނޫނީ އަންހެނުންނަށް ގެއިން ބޭރަށް ނުކުމެ، ދުރު ތަނަކަށް ނުދެވޭނެ ކަމަށެވެ.
