ޕެރިސް، ފްރާންސް (ޑިސެމްބަރު 28) - ފްރާންސްގެ އުތުރުގައި ހުންނަ މިސްކިތެއްގައި ދޭ ދީނީ ދަރުސްތަކުގައި ހަރުކަށި ފިކުރު ހިމެނޭ ކަމަށް ބުނެ، މިސްކިތް ބަންދުކޮށްފި އެވެ.
ޕެރިހުގެ އުތުރުން 100 ކިލޯމީޓަރު ދުރުގައި 50،000 މީހުން ދިރިއުޅޭ ބިޔުވައި އަވަށުގެ މިސްކިތް ބަންދު ކުރީ ހަ މަހުގެ މުއްދަތަކަށެވެ. ކަމާ ބެހޭ އިދާރާތަކުން ބުނީ މިސްކިތުން ދެނީ ނަފުރަތާއި އަނިޔާވެރިކަމަށް ހިތްވަރުދޭ ދަރުސްތައް ކަމަށެވެ.
މީގެ ދެ ހަފުތާ ކުރިން އިންޓީރިއާ މިނިސްޓަރު ޖެރަލްޑް ޑާމަނިން ވިދާޅުވީ އެ މިސްކިތް ބަންދު ކުރުމުގެ މަސައްކަތް ފަށާފައިވާ ކަމަށެވެ. މިސްކިތުގައި ޔަހޫދީންނާއި ނަސާރާއިންނާ ދެކޮޅު ދަރުސްތައް ދޭ ކަމަށް އޭނާ ވިދާޅުވި އެވެ.
ފްރާންސްގައި މިސްކިތެއް ބަންދުކުރެވެނީ ޝަކުވާ ލިބުމާ އެކު 10 ދުވަސް ވަންދެން މައުލޫމާތު ސާފު ކުރުމަށް ފަހު އެވެ. ނަމަވެސް އޭއެފްޕީ އިން ބުނީ ކުރިއަށް އޮތް ދެ ދުވަސް ތެރޭގައި އެ މިސްކިތް ބަންދު ކުރާނެ ކަމަށެވެ.
ކުރިއާ ޕިކާޑް ނޫހުން ބުނީ އެ މިސްކިތުގެ އިމާމަކީ ދާދި ފަހުން އިސްލާމްވި މީގެއް ކަމަށެވެ. މިސްކިތުގެ ކަންކަން ބަލަހައްޓާ ޖަމިއްޔާގެ ވަކީލު ބުނީ އިދާރާތަކުގެ ނިންމުން އިސްތިއުނާފު ކުރާނެ ކަމަށެވެ.
ޝަކުވާ ބޮޑުވި ދަރުސްތައް ދިން އިމާމު މިހާރު ވަނީ ސަސްޕެންޑުކޮށްފައި ކަމަށް ވަކީލު ބުންޏެވެ. މިސްކިތް ބަންދުކުރި މައްސަލައިގެ އިސްތިއުނާފު މި ހަފުތާގައި އޮންނާނެ އެވެ.
މި އަހަރުގެ ކުރީކޮޅު ފްރާންސްގެ ސަރުކާރުން ބުނީ ހަރުކަށި ފިކުރު ފަތުރާ ތަންތަން ދެނެގަތުމަށް ކުރާ މަސައްކަތް ހަރުދަނާ ކުރާނެ ކަމަށެވެ.
އެގޮތަށް ނިންމީ ކީރިތި ރަސޫލާ އަށް ފުރައްސާރަ ކުރި ޓީޗަރަކަށް ސޯޝަލް މީޑިއާގައި ފުރައްސާރަ ކުރުމަށް ފަހު 2020 ވަނަ އަހަރުގެ އޮކްޓޯބަރު މަހު އޭނާ މަރާލުމާ ގުޅިގެންނެވެ.
މި މަހު އިންޓީރިއާ މިނިސްޓްރީން ބުނީ ފްރާންސްގެ 2،600 އަށް ވުރެ ގިނަ މިސްކިތުގެ ތެރެއިން 100 ތަން ބަލައި ފާސްކޮށްފައިވާ ކަމަށެވެ. އޭގެ ތެރެއިން ހަ މިސްކިތެއް ބަންދު ކުރުމަށް ދަނީ ވިސްނަމުންނެވެ.
