މާލޭގެ ރައްޔިތުންނަށް "ގޯތި ކަނޑާފައި ދޭން ޖެހޭ ކަމަށް" ތަކުރާރުކޮށް ވިދާޅުވަމުން ގެންދަވަނިކޮށް، ހުޅުމާލޭގެ ދެވަނަ ފޭސް އިން ބިން ވިއްކަން އެޗްޑީސީން ހުޅުވައިލުމުން ރައްޔިތުންގެ މަޖިލީހުގެ ރައީސް މުަހައްމަދު ނަޝީދު އެކަމާ ދެކޮޅަށް ނުކުންނަވައިފި އެވެ.
ހުޅުމާލޭން ބިން ވިއްކަން އެޗްޑީސީން މިއަދު ބީލަމަށް ހުޅުވައިލުމުން ނަޝީދު މިރޭ ކުރެއްވި ޓްވީޓެއްގައި ވިދާޅުވީ އެއީ ބަލައިގަނެވޭނެ ކަމެއް ނޫން ކަމަށާއި އެ ސިޔާސަތު ބަދަލުކުރަން ގޮވައިލައްވާ ކަމަށެވެ.
"މާލެ ސަރަހައްދުގައި ދިރިއުޅޭ އާމްދަނީ މަދު މީހުންނަށް ބިން ލިބޭނެ ގޮތެއް ނެތި ހުޅުމާލެެއިން ބިން ވިއްކުަމަކީ ބަލައިގަނެވޭނެ ކަމެއް ނޫން. މި ސިޔާސަތު ބަދަލުކުރުމަށް ސަރުކާރަށް ގޮވާލަން،" ޓްވީޓްގައި ނަޝީދު ވިދާޅުވި އެވެ.
މިދިޔަ އަންގާރަދުވަހު ސަލްޓަން ޕާކްގައި އެމްޑީޕީން ބޭއްވި ބައްދަލުވުމުގައި އެމަނިކުފާނު ވިދާޅުވީ މާލޭގެ ރައްޔިތުންނަށް ބޯހިޔާވަހިކަން ހޯދައިދޭން ވައުދުވަމުން އަންނަތާ ތިރީހަކަށް އަހަރު ވެއްޖެ ކަމަށެވެ. އެ ވައުދު ނުފުއްދޭ ކަމަށް ވާދަވެރިންގެ އިތުރުން ސަޕޯޓަރުން ވެސް ބުނާ ކަމަށާއި އެކަމާ ދެބަސް ވެވަޑައިގެންނެވެން ނެތް ކަމަށް ވެސް އެ ދުވަހު ވިދާޅުވި އެވެ.
"އެހެން ނަމަވެސް ހަމަ އެޔާ އެކީގައި އަޅުގަނޑު ތަކުރާރުކޮށް ދަންނަވާން އޮތް ވާހަކައަކީ މިގޮތަށް ހަމަނޭވާ ލެވި، މިމާލޭގައި މިރާއްޖޭގައި އަޅުގަނޑުމެންނަށް ތެދުވެ ހިނގާ ބިނގާވެ އުޅެވޭހާ ހިނދަކު މިވާހަކަ ދެއްކުން ވެސް އަދި މިސައްކަތްކުރުން ވެސް އަޅުގަނޑުމެން ހުއްޓައެއް ނުލާނަމޭ. ކަނޑާފައި މާލޭ ރައްޔިތުންނަށް ގޯތި، އިތުރު ވާހަކައެއް ވެސް ނޫން ގޯތި، ހުޅުމާލެއިން ލިބެން ޖެހޭނޭ،" ނަޝީދު މިއަދު ވިދާޅުވި އެވެ.
އެމަނިކުފާނު މިހެން ވިދާޅުވެފައި ވަނިކޮށް އެޗްޑީސީން މިއަދު ކުރި އިއުލާނުގައިވާ ގޮތުން ދެވަނަ ފޭސް އިން ވިއްކަން ހުޅުވައިލި ބިމުގެ އަކަފޫޓަކަށް އެންމެ ކުޑަ އަގަކަށް ވެސް އޮތީ 3،500ރ. އެވެ. މިފަހަރު ވިއްކާ އެންމެ ކުޑަ ބިމަކަށް ވެސް އެހެންވީމާ އެންމެ ކުޑަކޮށް ހުށަހެޅޭނެ އަގަކީ 5.6 މިލިޔަން ރުފިޔާ އެވެ.
ހުޅުމާލެއިން ބިން ވިއްކުމާ ދެކޮޅު މީހުން ބުނަމުން އަންނަނީ ބިން ވިއްކުމަކީ ހުޅުމާލެ ހިއްކި ބޭނުން ކަމުގައިވާ ބޯހިޔާވަހިކަން ފޯރުކޮށްދިނުމުގެ މަގުސަދާ ހިލާފަށް ކުރާ ކަމެއް ކަމަށެވެ. އަދި ބިމުގެ ދަތިކަން އިންތިހާއަށް އޮތް މާލެ ސަރަހައްދުގައި މިހެން ބިން ވިއްކުމަކީ ކަންބޮޑުވުމެއްގެ ގޮތުގައި އެ މީހުން އަންނަނީ ބުނަމުންނެވެ.
އެ ކަންބޮޑުވުންތަކާ ގުޅޭގޮތުން މިދިޔަ އޮގަސްޓް މަހު "އަދަދު"ގެ "ވިޔަ" ޕްރޮގްރާމުގައި ވާހަކަ ދައްކަވަމުން އެޗްޑީސީޑީ ޑެޕިއުޓީ މެނޭޖިން ޑިރެކްޓަރު އަހުމަދު އާތިފް ވިދާޅުވީ ހުޅުމާލެ ޑިޒައިންކުރީ އެކި ފަންތީގެ ރައްޔިތުން ގެދޮރުވެރިކުރުމަށް ވިސްނައިގެން ކަމަށެވެ. އަދި ސިޓީއެއްގެ ގޮތުގައި އެންމެ ފުރިހަމައަށް ތަރައްގީވާން ހުރިހާ ފަންތިއެއްގެ ރައްޔިތުން އެތަނެއްގައި ދިރިއުޅުމަކީ މުހިންމު ކަމެއް ކަމަށް ވިދާޅުވި އެވެ.
