މެޑްރިޑް (ޑިސެމްބަރު 27) - ބެލްޖިއަމްގެ ކެޕްޓަން އެެޑެން ހަޒާޑްގެ އަސްލު ފެންވަރުގެ ކުޅުން ރެއާލް މެޑްރިޑްގައި ފެންނާނެ ކަމުގެ ޔަގީންކަން އެބައޮތް ކަމަށް ބެލްޖިއަމް ގައުމީ ޓީމުގެ ކޯޗު ރޮބާޓޯ މާޓީނޭޒް ބުނެފި އެވެ.
ޗެލްސީ ދޫކޮށް ހަޒާޑް ރެއާލަށް ބަދަލުވީ 2019 ވަނަ އަހަރު 100 މިލިއަން ޔޫރޯ އަށެވެ. ހަޒާޑް ރެއާލްގައި ދައްކާ ކުޅުމަށް ބަލައި އިތުރު 40 މިލިއަން ޔޫރޯ ދޭ ގޮތަށް އެ އެއްބަސްވުމުގައި ހިމަނާފައިވެ އެވެ.
މިހާތަނަށް ދެ ސީޒަނު ރެއާލްގައި ހޭދަކުރިއިރު، ހަޒާޑަށް އަނިޔާގެ ގިނަ މައްސަލަތަކެއް ވަނީ ކުރިމަތިވެފަ އެވެ. އަސްލު ކުޅުމެއް މިހާތަނަށް ދެއްކިފައިނުވި ނަމަވެސް ފަހަކަށް އައިސް ރެއާލްގެ ކޯޗު ކާލޯ އަންޗެލޮޓީ އަންނަނީ ހަޒާޑްގެ ފޯމު ރަނގަޅު ކުރަން އޭނާ އަށް ގިނަ ފުރުސަތުތަކެއް ދެމުންނެވެ.
އިލެވެން ސްޕޯޓްސް އަށް ދިން އިންޓަވިއުއެއްގައި މާޓީނޭޒް ބުނީ ހަޒާޑްގެ ކްލަބް ފޯމު ރަނގަޅުކުރަން ދިމާވެފައި އޮތް މައްސަލަ އަކީ އެކަށީގެންވާ ވަރަކަށް ގާތްގާތުގައި މެޗު ނުލިބުން ކަމަށެވެ. އެކަމަކު، ރެއާލްގެ ކޯޗު ކަމާ އަންޗެލޮޓީ ހަވާލުވި ފަހުން ހަޒާޑަށް ދޭ ފުރުސަތުތަކާ މެދު މާޓީނޭޒް ހުރީ ހިތްހަމަޖެހިފަ އެވެ.
"މެޗު ނުލިބުމުގެ މައްސަލަ އަށް ހައްލު ލިބުނުއިރު، ހަޒާޑްގެ އަނިޔާގެ ގޮންޖެހުންތަކަށް ވެސް އަންނަނީ ހައްލެއް ލިބެމުން. އަހަރެން ދެކޭ ގޮތުގައި ހަޒާޑްގެ އަސްލު ކުޅުން ރެއާލްގައި ފެންނާނެ. އޭނާގެ ފެންވަރު ރެއާލްގައި ސާބިތު ކޮށްދޭތަން ދެކެން ބޭނުން. އެކަން ވާނެކަމުގެ އަލިމަގެއް އެބަފެނޭ،" މާޓީނޭޒް ބުންޏެވެ.
ރެއާލުން އެންމެ ފަހުން ކުޅުނު ދެ މެޗުގައި ކާޑިޒް އާއި އެތުލެޓިކް ބިލްބާއޯއާ ދެކޮޅަށް ހަޒާޑް ވަނީ ފުރަތަމަ އެގާރައިގައި ހިމެނިގެން ކުޅެފަ އެވެ. މިއީ ރެއާލަށް ބަދަލުވެ، ޖެހިޖެހިގެން ދެ މެޗުގައި މިހާ ގިނަ ވަގުތު ހަޒާޑް ކުޅުނު ފުރަތަަމަ ފަހަރެވެ.
