ސިޔާސީ ދަހިވެތިކަމުގައި އަވައްޓެރި ގައުމުތަކާ މެދު ނަފުރަތު އުފައްދައި އެ ގައުމުތަކާ އޮތް ގުޅުން ހީނާރުވާފަދަ ނޭއްގާނީ އަމަލުތައް ނުކުރުމަށް ދިވެހި ރައްޔިތުންނަށް މޯލްޑިވްސް ރިފޯމްމޫވްމަންޓް (އެމްއާރްއެމް) އިން ގޮވާލައިފި އެވެ.
ކުރީގެ ރައީސް މައުމޫން އަބްދުލްގައްޔޫމް އިސްކޮށް ހުންނަވައި އުފައްދަވާފައިވާ އަދި ސަރުކާރު ހިންގާ ކޯލިޝަނުގެ ބައިވެރިވާ ޕާޓީން މިއަދު ފާހަގަކުރާ އެއްބައިވަންތަކަމުގެ ދުވަހުގެ މުނާސަބަތުގައި ނެރުނު ބަޔާނުގައި ނުސީދާކޮށް އެ އިޝާރާތްކުރީ އިދިކޮޅު ޕީޕީއެމް/ޕީއެންސީ އިން ހިންގާ "އިންޑިއާ އައުޓް" ހަރަކާތަށެވެ.
ރާއްޖޭގައި އިންޑިއާ ސިފައިން ތިބި ކަމަށް ބުނެ ސިފައިން ބޭރުކުރަން އެ ދެ ޕާޓީން ކުރިއަށް ގެންދާ ހަރަކާތާ ސަރުކާރު ކޯލިޝަނުގެ އެމްޑީޕީން ފާޅުގައި ދެކޮޅު ހަދާއިރު، އަނެއް ދެ ޕާޓީ ކަމަށްވާ އަދާލަތު ޕާޓީ އާއި ޖުމްހޫރީ ޕާޓީން ވެސް ވަނީ އެކަމާ ދެކޮޅަށް ބަޔާން ނެރެފަ އެވެ.
އެމްއާރްއެމްގެ ބަޔާނުގައި ބުނީ ސުނާމީ ކާރިސާއަކީ އަވައްޓެރި ގައުމުތަކާ އޮތް ގުޅުމާ އެ ގުޅުން ހީނަރުވިޔަނުދީ ދެމެހެއްޓުމުގެ މުހިއްމުކަން ހާމަވެގެންދިޔަ ފަހަރުތަކުގެ ތެރެއިން އެއް ފަހަރު ކަމަށެވެ. އެހެންވެ ސިޔާސީ ދަހިވެތިކަމުގައި އަވަށްޓެރި ގައުމުތަކާ މެދު ނަފުރަތު އުފައްދައި އެ ގައުމުތަކާ އޮތް ގުޅުން ހީނާރުވާފަދަ ނޭއްގާނީ އަމަލުތައް ނުކުރުމަށް ރައްޔިތުންނަށް ގޮވާލީ ކަމަށް ބަޔާނުގައިވެ އެވެ.
މީގެ އިތުރުން އަވައްޓެރި ގައުމުތަކުގެ ރައްޔިތުންނަށް، ހާއްސަކޮށް ރާއްޖޭގެ ތަރައްގީގެ މުހިއްމު ހިއްސާދާރުންތަކެއް ކަމަށްވާ ބިދޭސީ މަސައްކަތްތެރިންނަށް އިހުތިރާމުކޮށް އިސްލާމް ދީން ދަސްކޮށްދީފައިވާ ރިވެތި އުސޫލުތަކުގެ ތެރެއިން އަހުވަންތަކަމާއި އޯގާތެރިކަމާ އެކު އެ މީހުންނާ މެދު އަމަލުތައް ބެހެއްޓުމަށް ވެސް އެ ޕާޓީން އިލްތިމާސްކުރި އެވެ.
"ސުނާމީ ކާރިސާ ފަދަ ކޮންމެ ދަނޑިވަޅެއްގައި، ފަސް ޖެހުމެއް ނެތި އަވައްޓެރި ގައުމުތަކުންނާއި ބައިނަލްއަގްވާމީ މުޖުތަމައުން ދިވެހިރާއްޖެ އަށް ފޯރުކޮށްދޭ އެހީތެރިކަން ބަލައިގަނެ، މި ޕާޓީން އެ ފަރާތްތަކަށް މި ފުރުސަތުގައި ޝުކުރު ދަންނަވަމެވެ،" ބަޔާނުގައިވެ އެވެ.
އެމްއާރްއެމް އިން ބުނީ މިފަދަ ދުވަހެއް ފާހަގަކުރާއިރު ސުނާމީ ކާރިސާގައި ދިވެހި ރައްޔިތުން ދެއްކެވި މަތިވެރި ގައުމީ ރޫހުގެ ހަނދާން އާކޮށް އެއިން، އިބުރަތް ލިބިގަންނަން ޖެހޭ ކަމަށެވެ. އެ ދުވަހު ދިވެހިން އިސްކުރީ ގައުމީ މަސްލަހަތާއި ގައުމީ އެއްބައިވަންތަކަން ކަމަށް ވެސް ބުނެފައިވެ އެވެ.
"ކޮވިޑް 19 ގެ ހާލަތުގައި ވެސް ސަރުކާރާ އެކު ދިވެހި ރައްޔިތުން ދައްކުވައިދެއްވާފައިވަނީ ގައުމީ އެއްބައިވަންތަކަމެވެ." މިހާރުގެ ހާލަތަށް އިޝާރާތްކޮށް ބަޔާނުގައި ބުނެފައިވެ އެވެ.
