ރަޝިއާގައި ގޫގްލް އާއި މެޓާ އަށް ރެކޯޑް ޖޫރިމަނާއެއް

މޮސްކޯ، ރަޝިއާ (ޑިސެމްބަރު 25) - ރަޝިއާގެ ކޯޓަކުން ހުކުރު ދުވަހު ގޫގްލް އާއި މެޓާ ރެކޯޑް އަދަދުތަކުން ޖޫރިމަނާކޮށްފި އެވެ.

ގޫގްލް އަށް 98 މިލިއަން ޑޮލަރުގެ ޖޫރިމަނާ ދައްކަން އެންގި އިރު، ފޭސްބުކްގެ ކުންފުނި މެޓާ އަށް އެންގީ 27 މިލިއަން ޑޮލަރު ދެއްކުމަށެވެ.

ފަހަކަށް އައިސް ރަޝިއާ އިން ވަނީ ހުޅަނގުގެ ސޯޝަލް މީޑިއާ ކުންފުނިތަކަށް ޕްރެޝަރު ކުރަން ފަށާފަ އެވެ. ރައީސް ލެޑިމިއަ ޕުޓިން ވިދާޅުވީ އެ ކުންފުނިތަކަކީ އިންތިހާބީ މަންދޫބުންހާ ނުފޫޒު ގަދަ ބަޔަކަށް ވަމުންދާ ކަމަށެވެ.

ސޯޝަލް މީޑިއާގެ ކޮންޓެންޓް މޮޑަރޭޓް ނުކުރުމާއި ދާހިލީ ކަންކަމަށް ނުފޫޒު ފޯރުވާ ކަމަށް ތުހުމަތުކޮށް ރަޝިއާ އިން ވަނީ އެ ކުންފުނިތައް ތަކުރާރުކޮށް ޖޫރިމަނާކޮށްފަ އެވެ. ނަމަވެސް މީގެ ކުރިން މިހާ ބޮޑު އަދަދުތަކުން ޖޫރިމަނާކޮށްފައެއް ނުވެ އެވެ.

ގާނޫނާ ހިލާފު ކޮންޓެންޓް ޑިލީޓު ނުކުރާ މައްސަލައިގައި ކޯޓުން އިއްޔެ ކުރި ޖޫރިމަނާތަކަކީ ރަޝިއާ ފައިސާ އިން ބިލިއަނަކަށް ވުރެ ބޮޑު އަދަދަކުން ޖޫރިމަނާ ކުރި ފުރަތަމަ ފަހަރެވެ.

އެގޮތުން ގޫގުލް އަށް ދައްކަން ޖެހުނު 98 މިލިއަން ޑޮލަރަކީ 7.2 ބިލިއަން ރުބަލް އެވެ. މެޓާ އަށް ދައްކަން ޖެހުނު 27 މިލިއަން ޑޮލަރަކީ 1.9 ބިލިއަން ރުބަލް އެވެ.

"މި ކުންފުނިތަކަށް ރަޝިއާ އިން އަހަރަކު ލިބޭ އާމްދަނީގެ ހިއްސާއެއް އަދާކުރަން ޖެހޭ ވަރުގެ ޖޫރިމަނާއެއް ފުރަތަމަ ފަހަރަށް މި ވަނީ ކޮށްފައި،" ރަޝިއާގެ ކޮމިއުނިކޭޝަންސް ރެގިއުލޭޓަރީ އިދާރާ އިން ބުންޏެވެ.

އެ އިދާރާ އިން ބުނީ ގޫގުލް އާއި މެޓާ އިން ތަކުރާރުކޮށް ޝަކުވާތަކަށް ބެލުމެއް ނެތި، އެންގުންތަކާ ހިލާފަށް ކުރިއަށް ދިޔަ ކަމަށެވެ. ނަމަވެސް އެ ކުންފުނިތަކުން ބުނަނީ ގަވާއިދާ ހިލާފު އެއްވެސް އަމަލެއް ނުހިންގާ ކަމަށެވެ.

މިދިޔަ ބުރާސްފަތި ދުވަހު ޓްވިޓާ ވެސް ޖޫރިމަނާ ކުރި އެވެ. އެގޮތުން 40،000 ޑޮލަރު ނުވަތަ ތިން މިލިއަން ރުބަލްގެ ޖޫރިމަނާއެއް ދައްކަން އެ ކުންފުންޏަށް އަންގާފައި ވެ އެވެ.