ނުރައްކާތެރިކޮށް ސައިކަލް ދުއްވަަމުން ދަނިކޮށް ހުއްޓުވަން މަސައްކަތް ކުރި ޓްރެފިކް ޕޮލިހަށް ހަމަލާ ދިން ބަޔަކު ހައްޔަރުކޮށްފި އެވެ.
މޯލްޑިވްސް ޕޮލިސް ސާވިސްއިން މިރޭ ބުނި ގޮތުގައި މާލޭގައި ހަރަކާތްތެރިވާ ގްރޫޕަކަށް ނިސްބަތްވާ ހަތަރު މީހަކު ބުދަ ދުވަހުގެ ރޭގެ ވަގުތެއްގައި، މަޖީދީމަގާއި ދިލްބަހާރުމަގު ގުޅުނު ސަރަހައްދުގައި އާންމުންގެ ހިތްތަކުގައި ބިރުވެރިކަން އުފެދޭ ގޮތަށް ބާރު ސްޕީޑްގައި ދެ ސައިކަލެއްގައި ދުއްވަމުން ދަނިކޮށް އެ މީހުން ހުއްޓުވަން މަސައްކަތް ކުރި ފުލުހަށް ހަމަލާ ދިނުމަށް ފަހު ބިރު ދައްކާފައިވާ ކަމަށެވެ.
އެ މައްސަލައާ ގުޅިގެން ހައްޔަރުކޮށްފައި ވަނީ އައްޑޫ ސިޓީ ފޭދޫ، ވީނަސްވިލާ، މުހައްމަދު ވިއާމް، 27، އާއި އައްޑޫ ސިޓީ ހިތަދޫ، ފާނަފިލާގެ، ހަސަން އަލީމް، 22 އަދި ދަފްތަރު ނަންބަރު 2841، ޝާން އަބްދުﷲ، 20 އެވެ.
އެ ތިން މީހުން އިއްޔެ ހައްޔަރުކޮށް ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން، ހަތް ދުވަހުގެ މުއްދަތަށް ކަސްޓޯޑިއަލް ޖަލެއްގައި ބޭތިއްބުމަށް ވަނީ އަމުރުކޮށްފައެވެ.
އެ އެންމެންނަކީވެސް ކުށުގެ ރެކޯޑް އޮންނަ ބައެއް ކަމަށް ފުލުހުން ބުނެ އެވެ.
މާލޭގެ މަގުތަކުގެ އަމާންކަން ގެއްލުވާލައި ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ގްރޫޕް ހަދައިގެން އެ ފަދަ އަމަލުތައް ހިންގާ މީހުންނާމެދު ގާނޫނީ ހަރުކަށި ފިޔަވަޅު އަޅައި، އެ ފަދަ ކުށްތައް ހުއްޓުވުމަށް ގާނޫނީ ގޮތުން ކުރެވެންހުރި ހުރިހާ މަސައްކަތްތަކެއް ކުރާނެ ކަމަށް ފުލުހުން ބުނެ އެވެ.
