ތެހްރާން، އިރާން (ޑިސެމްބަރު 24) - އިރާނުން ކުރިއަށް ގެންދިޔަ ފަސް ދުވަހުގެ އަސްކަރީ ތަމްރީންތައް ނިންމާލުމުގެ ގޮތުން އިޒްރޭލަށް އިންޒާރެއްގެ ގޮތުގައި ބެލިސްޓިކް މިސައިލްތަކެއް ފޮނުވައިފި އެވެ.
"މިއީ ޒަޔޮނިސްޓް ސަރުކާރުން ފަހަކަށް އައިސް ކުރަމުންދާ އިންޒާރުތަކަށް ރައްދެއްގެ ގޮތުގައި ކުރިއަށް ގެންދިޔަ ތަމްރީންތަކެއް،" އިރާނުގެ އަސްކަރީ ފައުޖުގެ ޗީފް އޮފް ސްޓާފް މޭޖާ ޖެނެރަލް މުހައްމަދު ބަގޭރީ ދައުލަތުގެ ޓީވީ އަށް ވިދާޅުވި އެވެ.
"ޓާގެޓަށް ފޮނުވި 16 މިސައިލް ވެސް ވަރަށް ބަރާބަރަށް މަސައްކަތް ކުރި. އިރާނަށް ހަމަލާދޭން ކެރޭ ކަމަށް ހެދިގެން އުޅޭ ގައުމެއް ސުންނާފަތިކޮށްލެވޭ ވަރުގެ އެތައް ސަތޭކަ މިސައިލްގެ ތެރެއިން މަދު މިންވަރެއް މި ތަމްރީނުގައި ބޭނުން ކުރިން."
"އަސްކަރީ ތަމްރީނަކީ ޒަޔޮނިސްޓް ސަރުކާރަށް ސީރިއަސް އިންޒާރެއް،" އިސްލާމިކް ރިވޮލޮއިޝަނަރީ ގާޑް ކޯޕްސްގެ ޗީފް މޭޖާ ޖެނެރަލް ހުސެއިނީ ސަލާމީ ވިދާޅުވި އެވެ.
"ކުޑަ މިސްޓޭކެއް ހެދި ނަމަވެސް، އެ މީހުންގެ އަތްތައް ކަނޑާނަން."
އިރާނުން އިޒްރޭލަށް އިންޒާރުތަކެއް ދީފައި ވާއިރު، މި ހަފުތާގައި އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން ވަނީ އިޒްރޭލުގެ ބޮޑު ވަޒީރު ނަފްތާލީ ބެނެޓްއާ ބައްދަލުކުރައްވާފަ އެވެ.
ބުދަ ދުވަހު ބޭއްވި ބައްދަލުވުމުގައި ދެއްކީ އިރާނުގެ ވާހަކަ އެވެ. އިރާނުގެ ނިޔުކްލިއާ މަޝްރޫއާ ގުޅޭ 2015 ވަނަ އަހަރުގެ އެއްބަސްވުން އަލުން އިއާދަކުރުމުގެ މަޝްވަރާތައް ފަށައިގެން އުޅޭ މި ދަނޑިވަޅުގައި، އިޒްރޭލުން އަންނަނީ އެއްބަސްވުން އިއާދަނުކުރަން ބާރު އަޅަމުންނެވެ.
