ފުރަތަމަ ޑިވިޝަނުގައި ފުޅާކޮށް ފުޓްބޯޅައިގެ އެކި މަސައްކަތްތައް ކުރުމުގެ ވިސްނުމުގައި ކްލަބް އީގަލްސް އިން އިސްނަގައިގެން އަންހެން ފުޓްބޯޅަ ކޭމްޕެއް ބޭއްވުމަށް ނިންމައިފި އެވެ.
އީގަލްސް އިން ޖުމްލަ ނުވަ ދުވަހަށް ކުރިއަށް ގެންދާ މި ކޭމްޕަކީ އެ ކްލަބްގެ އަންހެން ޓީމެއް އެކުލަވާލަން ކުރާ މަސައްކަތުގެ ބައެކެވެ. ކޭމްޕް ފަށަން ނިންމާފައިވަނީ އަންނަ އާދިއްތަ ދުވަހު އެވެ. އަންނަ މަހުގެ 13 ވަނަ ދުވަހުގެ ނިޔަލަށް އަންހެން ކުދިންނަށް ހާއްސަކޮށް ބާއްވާ މި ފުޓުބޯޅަ ކޭމްޕްގައި ބައިވެރިވުމުގެ ފުރުސަތު މިހާރު ވަނީ ހުޅުވާލައިފަ އެވެ.
މި ކޭމްޕްގައި ބައިވެރިވާން ފުރުސަތު ދޭނީ އުމުރުން ހަތަރު އަހަރުން 12 އަހަރާ ދެމެދުގެ ކުދިންނަށެވެ. ކޭމްޕްގައި ކުދިން ބައިވެރިކުރަން 7908335 އަށް ގުޅުމަށް ކަންކަން ހަމަޖެހިގެންދާނެ އެވެ. މި ކޭމްޕްގައި ބައިވެރިވާ ކުދިންގެ އަތުން 500 ގެ ފީއެއް ނެގުމަށް އީގަަލްސް އިން ވަނީ ނިންމައިފަ އެވެ.
އީގަލްސް އިން އަންނަނީ ފިރިހެން ކުދިންނަށް ހާއްސަ އެކެޑަމީއެއް ހިންގަމުން.
ކޭމްޕްގެ ކަންކަން ރާވައި ހިންގަން އީގަލްސް އިން ވަނީ ކުރީގެ ފުޓްބޯޅަ ކުޅުންތެރިޔާ އަދި އެފްއޭއެމްގައި އަންހެން ފުޓްބޯޅައިގެ ގިނަ މަސައްކަތްތަކެއް މީގެ ކުރިން ކުރި މަރިޔަމް މުހައްމަދު (މާޔަން)ގެ ބެލުމުގެ ދަށުންނެވެ. އަންހެން ފުޓްބޯޅަ ކުރިއަރުވަން މާޔަން އަންނަނީ ވިމެންސް ފުޓްބޯލް ކްލަބް (ޑަބްލިއުއެފްސީ)ގެ ނަމުގައި ކްލަބެއް ހިންގަމުންނެވެ. އެ ކްލަބުން އެކެޑަމީއެއް ވެސް ކުރިއަށް ގެންދެ އެވެ.
އީގަލްސްގައި މިހާރު ހުރި އަންހެން ޗެއާޕާސަނެއް ހުރިއިރު، އެ މަގާމުގައި ހުރި ފާތިމަތު ސައުދު (ތާތު)ގެ ތަސަައްވުރަކީ އެ ކްލަބްގައި ރަނގަޅު އަންހެން ޓީމެއް ވެސް ބޭއްވުމާއި އެ ކްލަބްގެ ކަންކަން ވީހާވެސް ފުޅާކޮށް ކުރިއަށް ގެންދިއުން ކަމަށް މީގެ ކުރިން ވަނީ ވިދާޅުވެފަ އެވެ.
އީގަލްސް އިން ވަނީ ދާދި ފަހުން ގައުމީ ބިލިއާޑް މުބާރާތުގެ ޓީމު އިވެންޓްގެ ޗެމްޕިއަންކަން ވެސް ހޯދައިފަ އެވެ.
