ކާބުލް، އަފްގާނިސްތާން (ޑިސެމްބަރު 22) - ނޭޓޯގެ ފަރާތުން ކާބުލްގައި ތުރުކީ އިން ހިންގި ހަރަކާތްތަކަށް މުވައްޒަފުންގެ ގޮތުގައި ނަގާފައި ތިބި 30 މީހުން މުޒާހަރާކޮށްފި އެވެ.
އެ މީހުން ތުހުމަތު ކުރީ މިދިޔަ އޯގަސްޓު މަހު ތާލިބާނުން ވެރިކަމަށް އައުމާ އެކު ތުރުކީ އިން ކުއްލި އަކަށް އެ މީހުން ދޫކޮށްލާފައިވާ ކަމަށެވެ. އެ އެންމެންނަކީ ވެސް ކާބުލްގެ އަސްކަރީ އެއާޕޯޓުގައި ތަރުޖަމާނުންނާއި ޓެކްނިކަލް ސްޓާފުންގެ ގޮތުގައި އުޅުނު މީހުންނެވެ.
"އަހަރުމެން ބޭނުމީ އިންސާފު،" ކާބުލްގައި ހުންނަ ތުރުކީ އެމްބަސީ ކައިރި އަށް ޖަމާވެ މުޒާހަރާ ކުރަމުން ދިޔަ މީހުން އަޑު އުފުލި އެވެ.
އެ މީހުން ބުނީ ތާލިބާނުން ވެރިކަމަށް އައުމާ އެކު އަވަސް އަރުވާލައިގެން ނޭޓޯގެ ފައުޖުތައް އަފްގާނިސްތާނުން ފުރި ފަހުން މުސާރަ ވެސް ދީފައި ނުވާ ކަމަށެވެ. ނަމަވެސް އެ މީހުންނާ އެކު އެއްބަސްވީ ޑިސެމްބަރު 31 ވަނަ ދުވަހުގެ ނިޔަލަށް މުވައްޒަފުންގެ ގޮތުގައި ބޭތިއްބުމަށެވެ.
އާއްމު ތަންތަނުގައި މުޒާހަރާ ކުރުން ތާލިބާނުން ވަނީ މަނާކޮށްފަ އެވެ. އެކަމަކު ބުދަ ދުވަހު ތުރުކީ އެމްބަސީ ކައިރި އަށް އެއްވި މީހުންނަށް ހުރަސް އަޅާފައެއް ނުވެ އެވެ.
މުޒާހަރާ ކުރަމުން ދިޔަ މީހުން ބުނީ ތުރުކީ އެމްބަސީ އިން އެ މީހުންގެ އަޑު އަހަން ބޭނުން ނުވާ ކަމަށެވެ. ތުރުކީ އެމްބަސީ އިން ބުނީ އެ މައްސަލައިގައި ވަކި އެއްޗެއް ބުނަން ބޭނުން ނުވާ ކަމަށެވެ.
