ސަރުކާރުގެ އެކިއެކި އިދާރާތަކުން ފޯރުކޮށްދެމުން އަންނަ ހިދުމަތްތައް އެއްތަނަކުން ރައްޔިތުންނަށް ފަސޭހައިން ލިބޭނެ ގޮތް މަގުފަހިކުރުމަށްޓަކައި "ނޭޝަނަލް ވަން ސްޓޮޕް ސާވިސް" ގާއިމުކުރަން ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.
ސަރުކާރުގެ އިދާރާތަކުން އާންމުންނަށާއި ވިޔަފާރިތަކަށް ފޯރުކޮށްދޭ ހިދުމަތްތައް އެއް ފުރާޅެއްގެ ދަށަށް ބަދަލުކުރަން ރައީސް ސޯލިހު ނިންމެވީ އިއްޔެ ބޭއްވި ކެބިނެޓް ބައްދަލުވުމެއްގައި އިކޮނޮމިކް މިނިސްޓްރީން ހުށަހެޅި ކަރުދާހަކަށް މަޝްވަރާކުރުމަށްފަހު، ކެބިނެޓުގެ ލަފަޔާއެކު އެވެ.
މި ހިދުމަތް ގާއިމުކުރެވުމުުން ސަރުކާރުގެ އިދާރާތަކަށް ހިދުމަތްތައް ހޯދަންދާ މީހުންނަށް އެކި ބޭނުންތަކުގައި، އެކި އޮފީސްތަކަށް ދިޔުމުގެ ބަދަލުގައި އެއް ތަނަކުން ހުރިހާ ހިދުމަތެއް ލިބިގެން ދާނެ އެވެ. މި ހިދުމަތް ތައާރަފުކުރެވެމުން އެއް ކަމަކާ ގުޅޭ އެކި ހިދުމަތްތައް ހޯދަން އެކި އޮފީސްތަކަށް ދާން ޖެހުމުން ދިމާވާ ދަތިތަަކަށް ދާއިމީ ހައްލެއް ލިބިގެން ދާނެ އެވެ.
އަންނަ އަހަރަށް ފާސްކުރި ބަޖެޓުގައި "ނޭޝަނަލް ވަން ސްޓޮޕް ސާވިސް" ގާއިމުކުރުމަށް 42 މިލިއަން ރުފިޔާ ހިމަނާފައިވެ އެވެ.
މި ހިދުމަތް ތައާރަފުކުރުމާ ގުޅިގެން އިކޮނޮމިކް މިނިސްޓަރު ފައްޔާޒު އިސްމާއިލު ކުރިން ވިދާޅުވީ، ވަން ސްޓޮޕް ސާވިސްއާއެކު މެދުނުކެނޑި ސަރުކާރުގެ ހުރިހާ ހިދުމަތްތަކެއް ރައްޔިތުންނަށް ލިބޭނެ މަގުފަހިވާނެ ކަމަށެވެ. އަދި މީގެ ސަބަބުން ރައްޔިތުންނަށް ބޮޑެތި ލުއިފަސޭހަތަކެއް ލިބިގެން ދާނެ ކަމަށް އޭނާ ވިދާޅުވި އެވެ.
ފައްޔާޒު ވިދާޅުވެފައި ވަނީ، މި ހިދުމަތް ފޯރުކޮށްދޭނީ އިކޮނޮމިކް މިނިސްޓްރީއާ ޓްރޭޑްނެޓާ ދެމެދު ސޮއިކުރެވޭ އެއްބަސްވުމެއްގެ ދަށުންނެވެ.
ޓްރޭޑްނެޓަކީ ވިޔަފާރިކުރުމާ ގުޅޭ އެކިއެކި ހިދުމަތްތައް އެއް ވިޔުގައަކުން ފޯރުކޮށްދިނުމަށްޓަކައި "ސިންގަލް ވިންޑޯ” އޮޕަރޭޓަރުގެ ޒިންމާ އަދާކުރާ، ސަރުކާރުގެ ސައްތައިންސައްތަ ހިއްސާވާ ކުންފުންޏެކެވެ.
"ސިންގަލް ވިންޑޯ" އަކީ ވެސް "ނޭޝަނަލް ވަން ސްޓޮޕް ސާވިސް" ފަދައިން، އެއް ޕޯޓަލެއްގެ ތެރެއިން ގުޅޭ ވުޒާރާތައް ގުޅުވާލައި، އިމްޕޯޓް-އެކްސްޕޯޓާ ގުޅޭ ހިދުމަތްތައް ގާއިމުކުރުމަށް ފެށި މަޝްރޫއެކެވެ. އެކަމަކު އަދި އެ ހިދުމަތް ދޭން ނުފަށަ އެވެ.
