ތުރުކީގައި ޖެހިޖެހިގެން ހަތަރު ވަނަ މަހު އިންޓްރެސްޓް ރޭޓް ކުޑަކުރުމާ އެކު ލީރާގެ އަގު ރިކޯޑް މިންވަރަށް ދަށަށް ހިނގައްޖެ އެވެ.
އިންޓްރެސްޓް ރޭޓް 15 ޕަސެންޓުން 14 ޕަސެންޓަށް ތިރިކޮށްފައި ވާއިރު، މި އަހަރު އިންފްލޭޝަން ވަނީ 20 ޕަސެންޓަށް ވުރެ މައްޗަށް އުފުލިފަ އެވެ. އަހަރުގެ ބާކީ އޮތް ދުވަސްކޮޅު އިންފްލޭޝަން ރޭޓް އިތުރަށް މަތިވާނެ ކަމަށް ބެލެވެ އެވެ.
އިންޓްރެސްޓް ކުޑަކުރިކަން މަރުކަޒީ ބޭންކުން އިއުލާން ކުރުމާ އެކު ލީރާގެ އަގު ހަތަރު ޕަސެންޓު ވެއްޓުނެވެ. މި އަހަރުގެ ތެރޭގައި ލީރާގެ އަގުގެ ދެބައިކޮށްފައި އެއްބަޔަށް ވުރެ ބޮޑުކޮށް ވަނީ ދަށްވެފަ އެވެ. މިދިޔަ މަހު އެކަނިވެސް ފައިސާގެ އަގު 30 ޕަސެންޓު ވެއްޓުނެވެ.
މަރުކަޒީ ބޭންކުން އިންޓްރެސްޓް ކުޑަކުރަމުން ދަނީ ރައީސް ތައްޔިބް އުރުދުގާންގެ އެންގެވުމަށެވެ. އޭގެ ސަބަބުން އާއްމުން ރައްކާކޮށްފައި ހުރި ފައިސާގެ އަގު ދަށްވެ، ގިނަ ބަޔެއްގެ އާމްދަނީ ވަނީ ދަށްވާން ފަށާފަ އެވެ.
ދެހާސް ސޯޅަ ވަނަ އަހަރު ޑޮލަރަކަށް ޖެހުނީ ތިން ލީރާ އެވެ. ނަމަވެސް މި އަހަރުގެ ކުރީކޮޅު ޑޮލަރަކަށް ޖެހުނީ 7.43 ލީރާ އެވެ. މިދިޔަ ބުރާސްފަތި ދުވަހާ ހަމައަށް ދިޔައިރު ޑޮލަރަކަށް ޖެހުނީ 15.35 ލީރާ އެވެ.
އެކަމަކު ރައްޔިތުން "ކެތްތެރިވުމަށް" ނަސޭހަތްތެރިވުމަށް ފަހު އުރުދުގާން ވިދާޅުވީ ގެންނަމުންދާ ބަދަލުތަކުގެ ނަތީޖާ ފަހުން ރަނގަޅުވާނެ ކަމަށެވެ. އޭގެ އިތުރުން އެންމެ ދަށް އުޖޫރައިގެ ގޮތުގައި ދޭ މިންވަރު ވަރަށް ބޮޑަށް އިތުރު ކުރާނެ ކަމަށް ވައުދުވެވަޑައިގެންނެވި އެވެ.
އާއްމުކޮށް އިންފްލޭޝަން މަތިވާ ހާލަތްތަކުގައި އެކަން ހައްލު ކުރުމަށް ގައުމުތަކުން އަޅާ ފިޔަވަޅަކީ "ބޮރޯވިން ކޮސްޓް" މަތިކުރުމެވެ. ނަމަވެސް އުރުދުގާންގެ ސިޔާސަތަކީ "ބޮރޯވިން ކޮސްޓް" ދަށްކުރުމެވެ. ބައެއް އެނެލިސްޓުން ދެކޭ ގޮތުގައި މިއީ ކުރިއަށް އޮތް އިންތިހާބާ ދިމާކޮށް މަގްބޫލުކަން އިތުރު ކުރުމުގެ ބޭނުމުގައި ހިންގާ ސިޔާސަތެކެވެ.
އެ ސިޔާސަތަކީ ކާމިޔާބު ސިޔާސަތަކަށް ވާނެ ކަމަށް ވިދާޅުވެ، އުރުދުގާން މިސާލު ނަންގަވަނީ ޗައިނާ އިންނެވެ. އެގޮތުން ޗައިނާ ފައިސާގެ އަގު ދަށްކުރުމާ އެކު އެކްސްޕޯޓް އިތުރުވެ، 20 އަހަރު ތެރޭގައި އިގްތިސާދު ބޮޑުތަނުން ފުޅާވި އެވެ.
އެއާއެކު ޗައިނާގެ މެދު ފަންތީގެ މީހުންގެ އާމްދަނީ ރަނގަޅުވެ، ކޮންޒިއުމަރުން ހަރަދު ކުރާ މިންވަރަށް ބިނާކޮށް އިގްތިސާދީ ކުރިއެރުން އަންނަން ފެށި އެވެ. މިދިޔަ ޖުލައި މަހާ ސެޕްޓެމްބަރު މަހާ ދެމެދު ތުރުކީގެ އިގްތިސާދު ވެސް 7.4 ޕަސެންޓުން ފުޅާވި އެވެ.
