ކުއަލަ ލަމްޕޫރް، މެލޭޝިއާ (ޑިސެމްބަރު 16) - މެލޭޝިއާ ކައިރިން ބޯޓެއް ބަންޑުން ޖަހާލައި ހިނގި ހާދިސާއެއްގައި މަރުވި މީހުންގެ އަދަދު 16 އަށް އަރައިފި އެވެ.
އިންޑޮނީޝިއާގެ 50 މީހުންނާ އެކު ދަތުރު ކުރި ބޯޓު މަސައްކަތް ކުރީ ގަވާއިދާ ހިލާފަށް އަވައްޓެރި މެލޭޝިއާ އަށް ވަންނާށެވެ. ބުދަ ދުވަހު ކަނޑު ގަދަވެފައި ވަނިކޮށް ބޯޓު ބަންޑުން ޖަހާލީ ދެކުނު ޖޮހޯރް ސްޓޭޓް ކައިރިންނެވެ.
ހާދިސާ އަށް ފަހު ބުދަ ދުވަހު 11 މީހެއްގެ ހަށިގަނޑު ފެނިފައި ވާއިރު، އިތުރު ފަސް ހަށިގަނޑު ފެނިފައި ވަނީ ބުރާސްފަތި ދުވަހު ކަމަށް ކޯސްޓްގާޑުން ބުންޏެވެ. ވިހި މީހަކު ގެއްލިގެން ހޯދުމުގެ މަސައްކަތް ދަނީ ކުރަމުންނެވެ.
އެ ހާދިސާ އިން ސަލާމަތްވި 14 މީހުން މި ވަގުތު ތިބީ ބަންދުކޮށްފަ އެވެ. ވަޒީފާ ހޯދުމުގެ ބޭނުމުގައި ބައެއް ފަހަރު އިންޑޮނީޝިއާ ރައްޔިތުން ގަވާއިދާ ހިލާފަށް މެލޭޝިއާ އަށް އެތެރެވެ އެވެ. ނަމަވެސް އެފަދަ މީހުން ދަތުރު ކުރަނީ ކުދި ބޯޓުތަކުގައި ރައްކާތެރިކަމުގެ ފިޔަވަޅުތައް ނެތި ކަމަށް ވާތީ، ނުރައްކާތެރި ހާދިސާތައް ވަރަށް ގިނައިން ހިނގަ އެވެ.
