މިދިޔަ އޯގަސްޓް މަހު އެމެރިކާ ސިފައިން އޮޅިގެން ދިން ޑްރޯން ހަމަލާއެއްގައި އެއް އާއިލާއެއްގެ 10 މީހުން މަރުވި ހާދިސާއާ ގުޅިގެން އެއްވެސް މީހަކާ މެދު ފިޔަވަޅު ނާޅާނެ ކަމަށް ޕެންޓަގަން އިން ބުނެފި އެވެ.
ކާބުލްގައި ދިން ހަމަލާގައި މަރުވި 10 މީހުންގެ ތެރޭގައި ހަތް ކުޑަކުދިން ވެސް ހިމެނެ އެވެ. އެ އާއިލާ އިން ވަނީ އިންސާފަށް އެދި، ފައިސާގެ ބަދަލާއި އެމެރިކާ އިން މައާފަށް އެދުމަށް ޑިމާންޑުކޮށްފަ އެވެ.
ޕެންޓަގަންގެ ތަރުޖަމާނު ޖޯން ކާބީ ވިދާޅުވީ ހަމަލާއާ ގުޅޭ ތަހުގީގީ ރިޕޯޓު ޑިފެންސް ސެކެޓްރީ ލޮއިޑް އޯސްޓިން އަށް ލިބިވަޑައިގެންފައި ވާއިރު، ފިޔަވަޅެއް އެޅުމަށް ލަފާދީފައި ނުވާ ކަމަށެވެ.
"ވަކިވަކި އޮފިޝަލުން ނުވަތަ ސިފައިން ޖަވާބުދާރީ ކުރުވަން ޖެހޭ ވަރުގެ ކަމެއް ހިނގި ކަމަށް ފެނިފައެއް ނުވޭ،" ކާބީ ވިދާޅުވި އެވެ.
އެ ހަމަލާގައި ތިން އަހަރުގެ އަންހެން ދަރިފުޅާއި، ބޭބެ އާއި ބޮޑުބޭބެ ކިޔާ ހަ ކުދިން މަރުވި 32 އަހަރުގެ އައިމަލް އަހްމަދީ ވަނީ އެމެރިކާގެ ނިންމުމާ ގުޅިގެން ނުރުހުން ފާޅުކޮށްފަ އެވެ.
"ބަދަލުދެއްވާނީ މާތް ﷲ. މިއީ އެމެރިކާގެ ކުއްޖަކު ގެއްލުނު ހާދިސާއެއް ނަމަ ކަން ވާނީ ކިހިނެއް؟،" އޭނާ ސުވާލުކުރި އެވެ.
ތާލިބާނުން ވެސް އެމެރިކާ ސަރުކާރަށް ގޮވާލީ އެ ނިންމުން ބަދަލު ކުރުމަށެވެ. ތާލިބާނުން ބުނީ ހަމަލާގެ ޒިންމާ އުފުލަން ޖެހޭ މީހުންނާ މެދު އެމެރިކާ އިން ފިޔަވަޅު އަޅައި، އަފްގާން އާއިލާ އަށް ބަދަލު ފޯރުކޮށްދޭން ޖެހޭނެ ކަމަށެވެ.
އިޒްމަރާއީ އަހްމަދަކީ އިސްލާމިކް ސްޓޭޓް (އައިއެސް) މެމްބަރެއްގެ ގޮތުގައި އެމެރިކާ އިން ޓާގެޓު ކުރީ ނުބައި ޖާސޫސީ މައުލޫމާތެއްގެ މައްޗަށް ބިނާކޮށްގެންނެވެ. އޯގަސްޓު 29 ވަނަ ދުވަހު އޭނާގެ ކާރު ފަހަތުން އަށް ގަޑިއިރު ޓްރެކް ކުރުމަށް ފަހު، އެއަށް އަމާޒުކޮށް މިސައިލް ހަމަލާއެއް އެމެރިކާ އިން ދިނެވެ. އެ ހަމަލާގައި އަހްމަދީ އާއިލާގެ ހަތް ކުދިންނާއި ތިން މީހުން މަރުވި އެވެ.
އަހްމަދީ މަރުވިއިރު، އޭނާ މަސައްކަތް ކުރަމުން ދިޔެއީ އެމެރިކާގެ އެހީދޭ ޖަމިއްޔާއަކާ ގުޅިގެންނެވެ.
އެއީ އޮޅިގެން ދެވުނު ހަމަލާއެއް ކަމަށް އެމެރިކާގެ އިސް އަސްކަރީ ޖެނެރަލަކު ވަނީ އެއްބަސްވެފަ އެވެ. އެމެރިކާގެ ޑިފެންސް ސެކެޓްރީ ލޮއިޑް އޯސްޓިން ވަނީ މަރުވި މީހުންގެ އާއިލާގެ ކިބައިން މައާފަށް އެދޭ ކަމަށް ވެސް ވިދާޅުވެފަ އެވެ.
