އެމެރިކާގެ ސެކެޓްރީ އޮފް ސްޓޭޓް ދެކުނު އިރުމަތީ އޭޝިއާ އަށް ކުރައްވާ މުހިއްމު ދަތުރެއްގައި އިންޑޮނީޝިއާގެ ވެރިރަށް ޖަކާޓާއަށް ވަޑައިގެންފި އެވެ.
އިނގިރޭސިވިލާތުގައި އޮތް ޖީ7 ބައްދަލުވުމަށް ފަހު ދެކުނު އިރުމަތީ އޭޝިއާ އަށް ބްލިންކެން ކުރައްވާ ދަތުރުގެ ފޯކަސް އޮތީ ޗައިނާގެ ނުފޫޒު ކުޑަ ކުރުމަށެވެ.
އިންޑޮނީޝިއާގެ ރައީސް ޖޯކޯ ވިޑޯޑޯއާ ބައްދަލުކުރެއްވުމަށް ފަހު "އިންޑޯ-ޕެސިފިކް" އާ ގުޅޭ ގޮތުން އެމެރިކާގެ ވިސްނުން އޮތް ގޮތް ބްލިންކެން ހާމަކުރެއްވި އެވެ.
ރައީސް ޖޯ ބައިޑެންގެ ސަރުކާރުގެ ވިސްނުމަކީ އެ ސަރަހައްދު އޮންނަން ވާނީ މިނިވަންކަމާ އެކު ޗައިނާގެ ނުފޫޒުން ދުރުގައި ކަމަށެވެ. އެއާއެކު ޗައިނާއާ ދެކޮޅަށް އެއްބައިވާނެ ގައުމުތަކެއް ހޯދުމަކީ އިސްކަންދޭ ސިޔާސަތެކެވެ.
އިންޑޮނީޝިއާ އަށް ފަހު މެލޭޝިއާ އާއި ތައިލޭންޑަށް ވެސް ބްލިންކެން ވަޑައިގަންނަވާނެ އެވެ. އެމެރިކާ އިން އެ ގައުމުތަކުގައި އިސްކަން ދޭނީ ދެކުނު ޗައިނާ ކަނޑުގައި ޗައިނާގެ "ބުލީކުރުމާ" ދެކޮޅަށް ތެދުވާނެ ގޮތްތައް ހޯދަން ކަމަށެވެ.
ޗައިނާ އިން ދެކޭ ގޮތުގައި މުޅި ދެކުނު ޗައިނާ ކަނޑު ނިސްބަތް ވަނީ އެ ގައުމަށެވެ. ނަމަވެސް އެ ސަރަހައްދުގެ އެހެން ގައުމުތަކުން ވެސް އެ ކަނޑުގެ އެކި ހިސާބުތަކަށް ދައުވާ ކުރެ އެވެ.
