އަނިޔާވެރިކޮށް މަރާލާފައިވާ ބްލޮގަރު ޔާމީން ރަޝީދުގެ ދައްތަ، އާއިޝަތު ރަޝީދު ފުލުހުންގެ ވަޒީފާއިން ވަކިކުރީ ރަނގަޅަށް ކަމަށް ނިންމައި، އޭނާއަށް ބަދަލު ދޭން ނުޖެހޭ ކަމަށް ސިވިލް ކޯޓުން ހުކުމް ކޮށްފި އެވެ.
ފުލުހުންގެ ވަޒީފާއިން އާއިޝަތު ވަކި ކުރީ ގެއްލުވާލާފައިވާ ނޫސްވެރިޔާ އަހުމަދު ރިލްވާނުގެ ހަނދާނުގައި އޮގަސްޓު 8، 2017 ގައި ބޭއްވި "ސުވާލު މާޗު"ގެ މައްސަލައިގަ އެވެ. އެ ހިނގާލުން ބޭއްވީ ރިލްވާނު ގެއްލުނު ފަހުން ތިން އަހަރު ފުރުމާ ދިމާކޮށް، އޭނާއަށް ވީނުވީއެއް ނޭނގޭތީ އާއި ތަހުގީގު ކުރިޔަށް ނުދާތީ އަޑުއުފުލާށެވެ.
ހިނގާލުމުގައި އާއިޝަތު ބައިވެރިވި މައްސަލަ ފުލުހުންގެ ޑިސިޕްލިނަރީ ބޯޑުން ބަލަން ފެށީ އެއީ ގާނޫނާ ހިލާފަށް، ހުއްދަ ނުހޯދާ ބޭއްވި ހިނގާލުމަކަށް ވާތީ އެވެ.
ބޯޑުން މައްސަލަ ބެލުމަށް ފަހު ނިންމީ، ފުލުހުންގެ ޑިސިޕްލިނަރީ ގަވާއިދާ ހިލާފު ކަމަށް ތަހުގީގަށް ސާބިތު ވާތީ އޭނާ ވަޒީފާއިން ވަކިކުރާށެވެ. އެއީ އޮގަސްޓު 16، 2017 ގަ އެވެ. އޭރު އޭނާ ހުރީ ފުލުހުންގެ އެސިސްޓެންޓް ޑިރެކްޓަރުގެ މަގާމުގަ އެވެ.
ވަޒީފާއިން ވަކިކުރި މައްސަލައިގައި ފުލުހުން އަމަލު ކުރީ ގާނޫނާ ހިލާފަށް ކަމަށް ބުނެ، ވަޒީފާއިން ވަކިކުރުމުގެ މާލީ ބަދަލު ނަގައިދޭން އާއިޝަތުގެ ފަރާތުން ސިވިލް ކޯޓަށް ހުށަހެޅީ އޮކްޓޫބަރު 26، 2020 ގަ އެވެ.
އޭނާ ހުށަހެޅީ ވަޒީފާއިން ވަކިކުރި ތާރީހުން ފެށިގެން ސިވިލް ކޯޓުން މައްސަލަ ބަލައި ނިމޭ ތާރީހާ ހަމައަށް ހައްގުވާ މުސާރަ އާއި އިނާޔަތް ހޯދުމަށް ކަމަށެވެ. ކޯޓުން މި މައްސަލައިގައި ހުކުމް ކުރީ ޑިސެމްބަރު 8، 2021 ގައި ކަމުން، ބަދަލުގެ އަދަދަކީ 441،111.14ރ. ކަމަށް މައްސަލައިގައި ހުކުމުގައި ފާހަގަކުރި އެވެ.
ބަދަލު ދޭން އިންކާރު ކުރަމުން ދައުލަތުން ކޯޓުގައި ބުނީ، އާއިޝަތު ވަކިކުރީ ފުލުހުންގެ ގާނޫނުގެ ދަށުން ބާރު ލިބިގެން ހަދާފައިވާ ގަވާއިދުތަކުގެ ތެރެއިން އޭނާއާ ދެކޮޅަށް ހުށަހެޅުނު މައްސަލަ އިދާރީ މިންގަނޑުން ސާބިތުވާތީ ކަމަށެވެ. ދައުލަތުން އެދުނީ ބަދަލުގެ އެއްވެސް މިންވަރެއް ނަގައިދޭން ނުޖެހޭ ކަމަށް ކަނޑައަޅައި ދިނުމަށެވެ.
މައްސަލައިގެ ހުލާސާ
- މި މައްސަލައިގެ ތަހުގީގަށް ޑިސިޕްލިނަރީ ބޯޑަށް ދިން ބަޔާނުގައި އަމިއްލަ އިއުތިރާފުންނާއި، ފޮޓޯތަކުން އާއިޝަތު އެއްވުމުގައި ބައިވެރިވީކަން އެނގޭ.
- އެކަމަކު އެއީ ހުއްދަ ނުނަގާ ބޭއްވި އެއްވުމެއް ކަމެއް އޭނާއަށް ނޭނގޭ ކަމަށާއި އެއްވެސް ސިޔާސީ އެއްވުމެއްގައި ބައިވެރިވެފައި ނުވާނެ ކަމަށް އާއިޝަތު ބުނެފައިވޭ.
- ގާނޫނާ ހިލާފަށް ހުއްދަ ނުހޯދައި ބޭއްވި އެއްވުމެއްގައި ބައިވެރިވި މައްސަލަ ބެލުމަށް ފަހު ފުލުހުންގެ ޑިސިޕްލިނަރީ ބޯޑުން ނިންމީ އާއިޝަތު ވަޒީފާއިން ވަކިކުރަން.
ވަޒީފާއިން ވަކިކުރި މައްސަލައިގައި އާއިޝަތު ތުހުމަތު ކުރަނީ ފުލުހުން އަމަލުކުރީ ގާނޫނާ ގަވާއިދާ ހިލާފަށް ކަމަށެވެ. އެކަމަކު ފުލުހުންގެ ފަރާތުން ވަކާލާތުކުރަމުން ދައުލަތުން އެ ނިންމުން ދިފާއުކުރީ ގާނޫނާ އެއްގޮތަށް ނިންމާފައިވާ ނިންމުމެއް ކަމަށެވެ.
ކޯޓުން ބުރަވީ ފުލުހުން ކޮޅަށެވެ.
އެގޮތުން ޑިސިޕްލިނަރީ ބޯޑުން ފާހަގަކުރި ކަންކަމަށް ތާއީދު ކުރަމުން ހުކުމުގައި ވަނީ، ފުލުހުންގެ މެދުގައި ހަމަނުޖެހުން އުފެދޭ ފަދަ ގާނޫނާ ހިލާފު އެއްވުމެއްގައި ބައިވެރިވުމަށް ފަހު ގާނޫނު ނޭނގޭ ކަމަށް ބުނުމަކީ ދެއްކޭނެ އުޒުރެއް ނޫން ކަމަށެވެ.
އަދި ކުރިން ވެސް އޭނާއަށް އަނގަ ބަހުން އިންޒާރު ދެވިފައިވާއިރު، އާއިޝަތުގެ ފަރާތުން ފެނުނު އަމަލަކީ ފުރަތަމަ ފަހަރު ވެސް ވަޒީފާއިން ވަކިކުރުމުގެ އިހުތިޔާރު ޑިސިޕްލިނަރީ ބޯޑަށް ލިބޭ މައްސަލައެއް ކަމަށް ހުކުމުގައި ފާހަގަކުރި އެވެ.
"ފުލުހުންގެ މުއައްސަސާގައި މަސައްކަތްކުރާ ފުލުހުންގެ މެދުގައި ހަމަނުޖެހުން އުފެދިދާފަދަ އެއްވުމެއްގައި ބައިވެރިވުމަށްފަހު، ދައުވާކުރާ ފަރާތުން އެކަމުގެ ޒިންމާ އުފުލަން ނުޖެހޭނެ ކަމަށާއި، ގާނޫނު ނޭނގޭކަމަށް ބުނުމަކީ ދެއްކޭނެ އުޒުރެއް ނޫން" ސިވިލް ކޯޓުގެ ހުކުމުގައި ވެ އެވެ.
މިއީ ފުލުހުންނާ ދެކޮޅު އެއްވުމެއް ކަމަށް ބޯޑުން ކަނޑައެޅި ސަބަބުތަކުގެ ތެރޭގައި އެއްވުމުގެ ބައިވެރިން ގެންގުޅުން ބޯޑުތަކާއި ބެނާތަކުގައި ހުރި ލިޔުންތައް ފާހަގަކުރި އެވެ.
އަދި ބުނީ އެއީ "މީހަކަށް ގެއްލިގެން އުޅޭ ހައްގެއް ހޯދައިދިނުމަށް އެއްވި އެއްވުމަކަށް ވުރެ ސިޔާސީ ކުލަޖެހިގެން" ބޭއްވި އެއްވުމެއް ކަމަށެވެ.
އޭގެ އިތުރުން ފުލުހުންގެ ބޯޑުން އިޖުރާއަތްތައް ފުރިހަމަނުކުރާ ކަމަށް ބުނެ އާއިޝަތުގެ ފަރާތުން ހުށަހެޅި ނުކުތާ ވެސް ކޯޓުން ނިންމީ ޑިސިޕްލިނަރީ ބޯޑާ އެއްކޮޅަށެވެ. އަދި ޑިސިޕްލިނަރީ ބޯޑުން ތަހުގީގު ކުރުމުގައި ހުރިހާ އިޖުރާއަތްތަކެއް ފުރިހަމަކޮށްފައިވާ ކަމަށް ކޯޓު ހުކުމުގައި ބުންޏެވެ.
