ފްނޮމް ޕެން، ކެމްބޯޑިއާ (ޑިސެމްބަރު 10) - ކެމްބޯޑިއާ އަށް ހަތިޔާރު ވިއްކުން އެމެރިކާ އިން މަނާކުރުމާ އެކު އެ ގައުމުގައި ބޭނުންކުރާ އެމެރިކާގައި އުފައްދާފައިވާ ހުރިހާ ހަތިޔާރެއް ނައްތާލަން ބޮޑު ވަޒީރު ހުން ސެން އަމުރު ކުރައްވައިފި އެވެ.
މިދިޔަ ބުދަ ދުވަހު އެމެރިކާ އިން ބުނީ ކެމްބޯޑިއާ އަށް ހަތިޔާރު ވިއްކުން މަނާކުރަން ނިންމީ އިންސާނީ ހައްގުތަކުގެ ހާލަތު ގޯސްވެ ކޮރަޕްޝަން ފެތުރިފައި ވުމާއެކު ޗައިނާ އިން ކެމްބޯޑިއާއާ ގުޅިގެން ހިންގާ ހަރަކާތްތަކާ ހެދި ކަމަށެވެ.
އެމެރިކާގެ ސްޓޭޓް ޑިޕާޓްމަންޓާއި ކޮމާސް ޑިޕާޓްމަންޓުން އެޅި ފިޔަވަޅުގެ އަމާޒަކީ ކެމްބޯޑިއާގެ ސިފައިންނާއި ޖާސޫސީ އިދާރާތަކަށް "ދިފާއީ ތަކެއްޗާއި ހިދުމަތް" ނުލިބޭނެ ގޮތް ހެދުމެވެ.
ނަމަވެސް ކެމްބޯޑިއާގެ ބޮޑު ވަޒީރު ހުން ސެން ހުކުރު ދުވަހު ވިދާޅުވީ އެމެރިކާގެ ހަތިޔާރާއި އަސްކަރީ އާލާތްތަކުގެ ކޮލިޓީ ނުހުންނަ ކަމަށާއި އެއީ މުހިއްމު އެއްޗެއް ނޫން ކަމަށެވެ.
"އަސްކަރީ ހުރިހާ ޔުނިޓަކަށް އަޅުގަނޑު މި އަމުރު ކުރަނީ މި ވަގުތު ކެމްބޯޑިއާގެ އަތުގައި ހުރި ހަތިޔާރާއި އަސްކަރީ ސާމާނު ރިވިއު ކުރަން. އެމެރިކާގެ އެއްވެސް ހަތިޔާރެއް ހުރި ނަމަ އެ ބޭނުން ކުރުން ވަގުތުން ހުއްޓާލަން ޖެހޭ - ގުދަންތަކުގައި ބަންދުކޮށް ނޫނީ އެކަށީގެންވާ ގޮތަކަށް ނައްތާލަން ޖެހޭ،" ފޭސްބުކްގައި ލިޔުއްވި ޕޯސްޓެއްގައި ސެން ވިދާޅުވި އެވެ.
"އެމެރިކާ އިން ހަތިޔާރު ނުވިއްކަން ނިންމި ނިންމުމަކީ ކެމްބޯޑިއާ ސަރުކާރުގައި ތިބި އަރަމުން އަންނަ ޖީލުގެ ފަރާތްތަކަށް މެސެޖެއް. އެ މެސެޖަކީ މިނިވަންކަމާ އެކު ދިފާއީ ބާރު ބާއްވަން ބޭނުން ނަމަ، އެމެރިކާގެ ހަތިޔާރު ބޭނުން ނުކުރާށޭ."
އަފްގާނިސްތާނަށް އިޝާރާތްކޮށް ސެން ވިދާޅުވީ "އެމެރިކާގެ ހަތިޔާރު ބޭނުން ކުރި ވަރަށް ގިނަ މީހުން ހަނގުރާމަތަކުން ވީ ބަލި،" ކަމަށެވެ.
އެމެރިކާ އިން ފަންޑުކުރި ކަނޑުގެ އަސްކަރީ މަރުކަޒަކާ ގުޅޭ ކޮރަޕްޝަނާ ހެދި މިދިޔަ ނޮވެމްބަރު އެ ގައުމުން ކެމްބޯޑިއާގެ ދެ އޮފިޝަލުންނާ ދެކޮޅަށް ދަތިކުރުމުގެ ފިޔަވަޅު އެޅި އެވެ.
ޗައިނާގެ ރައީސް ޝީ ޖިންޕިން އަދި ކެމްބޯޑިއާގެ ބޮޑު ވަޒީރު ހުން ސެން. -- ފޮޓޯ: ޝިންހުއާ
ކެމްބޯޑިއާގެ ލީޑަރަކީ އޭޝިއާގައި ޗައިނާގެ އެންމެ ބޮޑު އެއް ޕާޓްނަރެވެ. އެމެރިކާ އިން ފަންޑުކޮށްގެން ހަދާ ފައިޒާ "ރީމް" އަސްކަރީ މަރުކަޒުގެ ފެސިލިޓީތައް ކެމްބޯޑިއާ ސަރުކާރުން އުވާލަމުންދާތާ ދުވަސްތަކެއް ވެއްޖެ އެވެ. އެ މަރުކަޒަކީ މީގެ ކުރިން އެމެރިކާގެ އަސްކަރީ ތަމްރީނުތައް ވެސް ކުރިއަށް ގެންދިޔަ ތަނެކެވެ.
އޭގެ އިތުރުން ގަލްފް އޮފް ތައިލޭންޑުގައި ހިންގާ "ސިހަނުކްވިލް" އަސްކަރީ މަރުކަޒާ ހެދި އެމެރިކާ އާއި ކެމްބޯޑިއާގެ ގުޅުން ފަހަކަށް އައިސް ވަނީ ވަރަށް ބޮޑަށް ގޯސްވެފަ އެވެ. އެމެރިކާ އިން ޝައްކު ކުރާ ގޮތުގައި ކެމްބޯޑިއާ އިން މަސައްކަތް ކުރަނީ ޗައިނާ އިން ބޭނުންކުރަން އެ ތަން ދިނުމަށެވެ.
ނަމަވެސް ހުން ސެން ތަކުރާރުކޮށް ވިދާޅުވަމުން ދަނީ އެ އަސްކަރީ މަރުކަޒުގައި ޗައިނާ ސިފައިން ތިބުމުގެ ހުއްދަ ނުދޭނެ ކަމަށެވެ.
