މައުލޫމާތު ހޯދައި ލިބިގަތުމަށް އިންގިލާބީ ބަދަލެއް ގެނައުމަށްޓަކައި އޮންލައިން ޕޯޓަލެއް ތައާރަފް ކުރަން އިންފޮމޭޝަން ކޮމިޝަނަރުގެ އޮފީހުން ތައްޔާރުވެއްޖެ އެވެ.
އިންފޮމޭޝަން ކޮމިޝަނަރު، އަހުމަދު އާހިދު ރަޝީދު ވިދާޅުވީ އަންނަ ޖެނުވަރީގައި ތައާރަފުކުރަން މަސައްކަތްކުރަމުން އަންނަ އެ ޕޯޓަލް މެދުވެރިކޮށް މައުލޫމާތު ހޯދަން ދައުލަތުގެ ކޮންމެ އިދާރާ އަކަށް ވެސް ހުށަހެޅޭނެ ކަމަށެވެ.
"މިހާރު މިދަނީ އެ ޕޯޓަލް ޓެސްޓު ކުރުމުގެ މަސައްކަތް ކުރަމުން. ފުރަތަމަ ބެލީ މި މަހު ފަހުކޮޅު ޕޯޓަލް ތައާރަފުކުރަން. ނަމަވެސް ރަނގަޅު ކޮށްލަން ހުރި ކުދި ކުދި ކަންކަން ފާހަގަވުމުން އެ މައްސަލަތައް ހައްލު ކުރަން ބޭނުންވީ،" އާހިދު ވިދާޅުވި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތެއް ހޯދަން މިހާރު ހުށަހަޅަން ޖެހޭނީ އިންފޮމޭޝަން ކޮމިޝަނަރުގެ އޮފީހުން ތައްޔާރުކޮށްފައިވާ ފޯމުންނެެވެ. ޕޯޓަލް ތައާރަފް ކުރުމުން ފޯމް ފުރައިގެން ހުށަހެޅުމުގެ ބަދަލުގައި، ކޮންމެ އިދާރާއަކަށް ވެސް އޮންލައިންކޮށް ހުށަހެޅޭނެ އެވެ.
ޕޯޓަލްގައި ޖެހޭނީ ލޮގިންއެއް ކްރިއޭޓްކުރާށެވެ. މައުލޫމާތަށް އެދި ހުށަހަޅާ ކޮންމެ ފަހަރަކު މައުލޫމާތު ހޯދަން ހުށަހަޅާ ފަރާތުގެ ޒާތީ މައުލޫމާތުގެ ބައި އޮޓޯއިން ފުރިހަމަވާނެ އެވެ.
ފުރަތަމަ ފަހަރަށް ފަހު ދެން ކުރަންޖެހޭނެ ކަމަކީ މައުލޫމާތު ހޯދަން ބޭނުންވާ އިދާރާ ހިޔާރުކޮށް، އެ އިދާރާއަކުން ހޯދަން ބޭނުންވާ މައުލޫމާތު ލިޔެ، އެ މައުލޫމާތު ބޭނުންވާ ގޮތެއް ހިޔާލުކުރުމެވެ.
"މި ޕޯޓަލާއެކު މައުލޫމާތު ހޯދުން ވަރަށް ބޮޑަށް ފަސޭހަ ވާނެ. މި ވެގެންދާނީ، މި ދާއިރާއަށް އަންނަ އިންގިލާބީ ބަދަލަކަށް،" އާހިދު ވިދާޅުވި އެވެ.
ޕޯޓަލް މެދުވެރިކޮށް ފޮނުވާ ހުށަހެޅުންތަކުގެ ސްޓޭޓަސް ވެސް ބެލޭނެ ކަމަށް އާހިދު ވިދާޅުވި އެވެ.
މައުލޫމާތު ހޯދުމުގެ ޕޯޓަލް ތައްޔާރުކޮށްފައި ވަނީ އެކަމަށް ހުޅުވާލައިގެން ހުށަހެޅި ދިވެހި ކުންފުންޏަކާ ހަވާލުކޮށްގެންނެވެ. މި ޕޯޓަލް ތައްޔާރުކޮށްފައި ވަނީ އިންފޮމޭޝަން ކޮމިޝަނަރުގެ އޮފީހުގެ ބަޖެޓުންނެވެ.
