ކުރީގެ ރައީސް އަބްދުﷲ ޔާމީން އަބްދުއްގައްޔޫމު ރާއްޖޭން ބޭރަށް ފުރުން މަނާކޮށް ނެރުނު އަމުރަކީ ބޭކާރު އަމުރެއް ކަމަށާއި އެ މަނިކުފާނު ރާއްޖޭން ބޭރަށް ވަޑައިގަތުމަށް އަދި ފިއްލަވާކަށް ވެސް ނޫޅުއްވާ ކަމަށް، މިރޭ އިދިކޮޅު ޕްރޮގްރެސިވް ކޯލިޝަނުން ކުރިޔަށްގެންދާ ޖަލްސާގައި ޕީއެންސީގެ ރައީސް އަބްދުރަހީމް އަބްދުﷲ ވިދާޅުވެއްޖެ އެވެ.
ޖަލު ހުކުމުން މިނިވަންވުމާއެކު ވަގުތުން ޔާމީން ފުރުން މަނާކުރުމަށް އަންގާރަ ދުވަހު ނެރުނު އަމުރަކީ "ތާކުންތާކު ނުޖެހޭ ބޭކާރު އަމުރެއް" ކަމަށް ކަމަށް އަބްދުއްރަހީމް ވިދާޅުވި އެވެ.
ރާއްޖެ ދޫކޮށް އެ މަނިކުފާނު ވަޑައިނުގަންނަވާނެކަން ސަރުކާރުގައި ތިއްބެވި ބޭފުޅުންނަށް ވެސް ރަނގަޅަށް އެނގިވަޑައިގަންނަވާނެ ކަމަށް އަބްދުއްރަހީމް ވިދާޅުވި އެވެ.
ޖަލު ހުކުމް ތަންފީޒުކުރަން މާފުށީ ޖަލުގައި ޔާމީން ހުންނެވި ދުވަސްވަރު ހޯމް މިނިސްޓަރު އިމްރާން އަބްދުﷲ ޖަލަށް ވަޑައިގެން ބައްދަލުކުރެއްވި ކަމަށާއި، ބޭސްފަރުވާ އަށް ރާއްޖޭން ބޭރަށް ވަޑައިގަތުމަށް ފުރުސަތު ލިބިވަޑައިގަންނަވާނެ ކަމަށް ދެންނެވި ކަމަށް އަބްދުއްރަހީމް ވިދާޅުވި އެވެ. އެ ފުރުސަތުގެ ބޭނުން ވެސް އެ މަނިކުފާނު ނުކުރެއްވި ކަމަށް ވިދާޅުވި އެވެ.
އަބަދުވެސް ޔާމީން ވިދާޅުވަމުން ގެންދެވީ މައުސޫމުކަން ހާމަކުރައްވާނެ ކަމަށާއި، ވޭތުވެދިޔަ ދެ އަހަރަށް ވުރެ ގިނަ ދުވަހު ޖަލު ހުކުމުގައި ހުންނަވައި ވެވަޑައިގެންނެވީ ވަރަށް ބޮޑު ގުރުބާނީއެއް ކަމަށާއި، އެ އަގު އަދާކުރާނީ 2023 ގެ ރިޔާސީ އިންތިހާބުގެ ވޯޓުން ކަމަށް ކަމަށް ވެސް އަބްދުއްރަހީމް ވިދާޅުވި އެވެ.
ޔާމީން ރާއްޖޭން ބޭރަށް ފުރުން މަނާކުރުމުގެ އަމުރު އަންގާރަ ދުވަހު ކުރިމިނަލް ކޯޓުން ނެރުނީ ޝަރީއަތުގައި ހުރި މައްސަލަތަކާ ގުޅިގެން ފުރުން މަނާކުރުމުގެ އަމުރަކަށް ފުލުހުން އެދުމާ ގުޅިގެންނެވެ. ފުރުން މަނާކުރުމުގެ އަމުރު ކޯޓުން ނެރެދީފައި ވަނީ ހަތް ދުވަހަށެވެ.
އެ އަމުރު ހޯދަން ފުލުހުން ހުށަހެޅީ، ކުރިމިނަލް ކޯޓުގައި މިހާރު އޮތީ ޔާމީންގެ ދެ މައްސަލައާ ގުޅިގެންނެވެ. އެއީ ރ. ފުއްގިރި އާއި ވ. އާރަށު މައްސަލާގައި އުފުލާފައިވާ މަނީލޯންޑްރިން އާއި ރިޝްވަތުގެ ދައުވާގެ މައްސަލައެވެ.
