ދޯހާ، ގަތަރު (ޑިސެމްބަރު 1) - އެމެރިކާ އިން ހިފަހައްޓާފައިވާ އަފްގާނިސްތާނުގެ މަލްޓި ބިލިއަން ޑޮލަރުގެ ފަންޑު ދޫކުރަން ތާލިބާނުން ގޮވާލައިފި އެވެ.
ފާއިތުވި ދެ ދުވަހު އެމެރިކާ އާއި ތާލިބާނާ ދެމެދު ދޯހާގައި ބޭއްވި މަޝްވަރާގައި އެންމެ ބޮޑުކޮށް ދެކެވުނު އެއް ވާހަކައަކީ ހިފަހައްޓާފައިވާ ފައިސާގެ ވާހަކަ އެވެ.
ބޭރުގެ ފައިސާގެ އެހީ އަށް ބަރޯސާވެފައިވާ އަފްގާނިސްތާނުގެ އިގްތިސާދު މި ވަގުތު ހުއްޓިފައި އޮތީ އެމެރިކާ އިން ފަންޑު ހިފަހައްޓައިގެން އުޅޭތީ އެވެ.
ފައިސާގެ ވާހަކަ އަށް ފަހު ތާލިބާނުން ދެން އެންމެ ބޮޑު އިސްކަމެއް ދިނީ ދަތިކުރުމުގެ ފިޔަވަޅުތަކާއި ބްލެކްލިސްޓުތައް އުވާލުމަށް އެމެރިކާ އަށް ބާރު އެޅުމަށެވެ.
ތާލިބާނުންގެ ފަރާތުން މަޝްވަރާގައި އިސްކޮށް ބައިވެރިވީ ފޮރިން މިނިސްޓަރު އާމިރް ހާން މުއްތަގީ އެވެ. އެމެރިކާގެ ފަރާތުން ބައިވެރިވީ އަފްގާނިސްތާނަށް ހާއްސަ މަންދޫބު ޓޮމް ވެސްޓް އެވެ.
މިއީ 20 އަހަރަށް ފަހު އެމެރިކާ ސިފައިން އަފްގާނިސްތާނުން ފޭބުމުން ތާލިބާނާއި އެމެރިކާއާ ދެމެދު ދޯހާގައި ބޭއްވި މަޝްވަރާގެ ދެ ވަނަ ބުރެވެ.
"ދެ ވަފުދުން މަޝްވަރާ ކުރީ ސިޔާސީ، އިގްތިސާދީ، އިންސާނީ، ސިއްހީ، ތައުލީމީ އަދި ސަލާމަތާ ގުޅޭ މައްސަލަތަކުގައި. އޭގެ އިތުރުން ބޭންކިން އަދި ފައިސާގެ ފެސިލިޓީތައް ފޯރުކޮށްދިނުމާ ގުޅޭ މަޝްވަރާތައް ވެސް ކުރެވުނު،" އަފްގާން ފޮރިން މިނިސްޓްރީގެ ތަރުޖަމާނު އަބްދުލް ގަހާރް ބަލްކީ ބުންޏެވެ.
"އަފްގާން ވަފުދުން ވާނީ އެމެރިކާ އަށް ރައްކާތެރިކަން ލިބޭނެކަމުގެ ޔަގީންކަން ދީފައި. އަދި ހިފަހައްޓާފައިވާ އަފްގާނިސްތާނުގެ ފައިސާ އެއްވެސް ޝަރުތެއް ނެތި ދޫކުރުމަށާއި، ބްލެކްލިސްޓު ކުރުމާއި ދަތިކުރުމުގެ ފިޔަވަޅު އެޅުން ހުއްޓާލުމާއި، އިންސާނީ މައްސަލަތަކާއި ސިޔާސީ މައްސަލަތައް ވަކިކުރަން އެމެރިކާ އަށް ގޮވާލި."
އެމެރިކާ އިން ހިފަހައްޓާފައި ވަނީ އަފްގާން މަރުކަޒީ ބޭންކުގެ 9.5 ބިލިއަން ޑޮލަރެވެ. އިންޓަނޭޝަނަލް މަނިޓަރީ ފަންޑު (އައިއެމްއެފް) އާއި ވޯލްޑް ބޭންކުން ވެސް ވަނީ އަފްގާނިސްތާނުގައި ހިންގާ ހަރަކާތްތައް މެދުކަނޑާލުމަށް ފަހު، ފައިސާގެ އެހީތައް ހިފަހައްޓާފަ އެވެ.
އަފްގާނިސްތާނުގެ އިގްތިސާދު ހުއްޓުމަކަށް އައިސްފައި އޮތް އިރު، ސިވިލް ސާވަންޓުންނަށް މުސާރަ ނުދެވޭތީ އެތައް މަހެއް ވެއްޖެ އެވެ. ގައުމަށް ބޭނުންވާ މުދާ އިމްޕޯޓް ކުރާނެ ފައިސާއެއް ވެސް ނެތެވެ. އދ. އިން އިންޒާރުދޭ ގޮތުގައި ފިނި މޫސުމުގެ ތެރޭގައި 22 މިލިއަން މީހުންނަށް ބަނޑުހައި ހޫނުކަން ދިމާވާނެ އެވެ. އެއީ އަފްގާން އާބާދީގެ ދެބައި ކޮށްފައި އެއް ބަޔެވެ.
ތާލިބާން ސަރުކާރުގެ ބޮޑު ވަޒީރު މުއްލާ މުހައްމަދު ހަސަން އަހުންދް އަކީ އެމެރިކާ އިން ބްލެކްލިސްޓުކޮށް ދަތިކުރުމުގެ ފިޔަވަޅު އަޅާފައިވާ އެކަކެވެ. ފައިސާ ހިފަހައްޓާފައި އޮތް އޮތުން ދިފާއު ކުރުމަށް ފަހު އެމެރިކާ އިން ބުނީ އާދައިގެ އަފްގާން ރައްޔިތުންނަށް އެހީވާން ފިޔަވަޅުތައް އަޅަމުންދާ ކަމަށެވެ.
"އެމެރިކާގެ ފިޔަވަޅުތަކާ ހެދި އަފްގާން ރައްޔިތުންނަށް ލިބެން ޖެހޭ އިންސާނީ އެހީ އަށް ހުރަސް ނޭޅޭނެކަން ކަށަވަރު ކުރަން މި ދަނީ މަސައްކަތް ކުރަމުން،" ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވި އެވެ.
"ޑިޕާޓްމަންޓް އޮފް ޓްރެޝަރީ އިން ވާނީ އަފްގާން ރައްޔިތުންނަށް މެދުނުކެނޑި އިންސާނީ އެހީ ފޯރުކޮށްދޭން ހާއްސަ ލައިސެންސްތަކެއް އެކި ޖަމިއްޔާތަކެއް ދޫކޮށްފައި."
އޭގެ އިތުރުން އެމެރިކާ އިން ވަނީ އަންހެނުންނާއި އަންހެން ކުދިންނަށް ތައުލީމު އުނގެނުމުގެ ހައްގު ދިނުމަށް ގޮވާލައި، "އިންސާނީ ހައްގުތަކާ ދެކޮޅަށް ހިންގާ އަމަލުތަކުގެ ތުހުމަތުތަކާ" ގުޅޭ ކަންބޮޑުވުން ފާޅުކޮށްފަ އެވެ.
އަފްގާން ފަސްގަނޑުގައި ޓެރަރިސްޓުން އޮޕަރޭޓް ކުރުމުގެ ފުރުސަތު ނުދިނުމަށް ތާލިބާނުން ވެފައިވާ ވައުދާއި، އެމެރިކާ ރައްޔިތުން ރައްކާތެރިކަމާ އެކު އަފްގާނިސްތާން ދޫކޮށް ދާން ފުރުސަތު ދޭނެ ކަމަށް ވެފައިވާ ވައުދުގެ ވާހަކަ ވެސް މަޝްވަރާގައި އެމެރިކާ އިން ދެއްކި އެވެ.
މާކް ފްރެރިކްސް. އޭނާ ރަހީނުކުރި ކަމަށް ތުހުމަތު ކުރެވެނީ ތާލިބާނުންގެ ތެރޭގައި ހިމެނޭ ހައްގާނީ ނެޓްވޯކުން.
އޭގެ އިތުރުން މިދިޔަ އަހަރުގެ ފެބްރުއަރީ މަހު އަފްގާނިސްތާނުގައި ރަހީނުކުރި އެމެރިކާގެ ރައްޔިތެއް ކަމަށްވާ މާކް ފްރެރިޗްސް ދޫކޮށްލަން އެމެރިކާ އިން ގޮވާލި އެވެ.
ތާލިބާނުން ބުނީ މަޝްވަރާތައް "ޕޮޒިޓިވް" ކަމަށާއި ފޮރިން މިނިސްޓަރު މުއްތަގީ ވަނީ ޖަޕާނާއި ޖަރުމަނުވިލާތުގެ ސަފީރުންނާ ވެސް ދޯހާގައި ބައްދަލުކޮށްފައި ކަމަށެވެ.
