އަންކާރާ، ތުރުކީ (ނޮވެމްބަރު 29) - އިޒްރޭލާއި މިސްރާ އެކު އޮތް ގުޅުން ރަނގަޅު ކުރަން ފިޔަވަޅުތަކަށް އަޅާނެ ކަމަށް ތުރުކީގެ ރައީސް ތައްޔިބް އުރުދުގާން ވިދާޅުވެއްޖެ އެވެ.
ސަރަހައްދީ މައްސަލަތަކާ ހެދި ތުރުކީ އާއި ޔޫއޭއީގެ ގުޅުން ވެސް ވަރަށް ގޯސްވި އެވެ. ނަމަވެސް ފިޔަވަޅުތަކަށް ފަހު ގުޅުން މިހާރު ވަނީ ރަނގަޅުވެފަ އެވެ. އެގޮތުން އަބޫ ދާބީގެ ވަލީއަހުދު ޝެއިހް މުހައްމަދު ބިން ޒައިދު މިދިޔަ ހަފުތާގައި ތުރުކީ އަށް ވަޑައިގެން މަލްޓި ބިލިއަން ޑޮލަރުގެ އިންވެސްޓްމަންޓުތަކުގައި ސޮއިކުރެއްވި އެވެ.
"އަޅުގަނޑުމެންނާއި ޔޫއޭއީއާ ދެމެދު އެޅި ފިޔަވަޅު ފަދައިން، އެހެން ގައުމުތަކާ އެކު ވެސް އެފަދަ ފިޔަވަޅުތައް އަޅާނަން،" ތުރްކުމެނިސްތާނަށް ކުރެއްވި ދަތުރަށް ފަހު އެނބުރި ގައުމަށް ވަޑައިގެން އުރުދުގާން ނޫސްވެރިންނަށް ވިދާޅުވި އެވެ.
އެގޮތުން ތުރުކީގެ ސަފީރުން އަލުން އަނބުރާ މިސްރާއި އިޒްރޭލަށް ފޮނުވުމުގެ ފުރުސަތު އެބަ އޮތް ކަމަށާއި އަންނަ އަހަރުގެ ފެބްރުއަރީ މަހު ޔޫއޭއީ އަށް އެމަނިކުފާނު ދަތުރެއް ކުރައްވާނެ ކަމަށް އުރުދުގާން ވިދާޅުވި އެވެ.
"އަޅުގަނޑުމެން ގޮތެއް ނިންމުމާ އެކު ވަކި ޝެޑިއުލެއްގެ ތެރެއިން ސަފީރުން އައްޔަނު ކުރުމުގެ މަސައްކަތް ކުރެވޭނެ."
ތުރުކީ އިން މިސްރާ އެކު ގުޅުން ކަނޑާލީ 2013 ވަނަ އަހަރު ރައީސް މުހައްމަދު މުރްސީގެ ވެރިކަން ބަގާވާތަކުން ބަދަލުކުރުމާ ގުޅިގެންނެވެ.
އިޒްރޭލާ އެކު ގުޅުން ކަނޑާލީ 2018 ވަނަ އަހަރު ގާޒާގައި މުޒާހަރާ ކުރަމުން ދިޔަ ގިނަ އަދަދެއްގެ ފަލަސްތީނު ރައްޔިތުން މަރުވި ހާދިސާ އަށް ފަހު އެވެ.
މިސްރާ އެކު އަލުން ގުޅުން ގާއިމްކުރަން މި އަހަރުގެ ކުރީކޮޅު ވެސް ތުރުކީ އިން މަސައްކަތް ކުރި އެވެ. ނަމަވެސް ލީބިޔާގެ ހަމަނުޖެހުމުގައި މިސްރާއި ތުރުކީ އިން ތާއީދުކުރަނީ ދެ ފަޅިއަކަށެވެ.
މިދިޔަ މާޗް މަހު ތުރުކީ އިން ބުނީ 2013 ވަނަ އަހަރަށް ފަހު ފުރަތަމަ ފަހަރަށް މިސްރާ އެކު ޑިޕްލޮމެޓިކް މުއާސަލާތުތަކެއް ކުރެވިއްޖެ ކަމަށެވެ.
އޭގެ ފަހުން ސެޕްޓެމްބަރު މަހު ވެސް ދެ ގައުމުގެ ވާހަކަތައް ކުރިއަށް ދިޔަ އެވެ. ނަމަވެސް ގުޅުން އިއާދަކުރުމާ މެދު ވަކި ގޮތެއް ނުނިންމަ އެވެ.
