އައްޑޫ ސިޓީގައި ކޮވިޑް ފެތުރެމުން އަންނާތީ ބަލި ކޮންޓްރޯލް ކުރުމަށް އަޅާ ފިޔަވަޅެއްގެ ގޮތުން އެ ސިޓީގެ އެއް ގެއިން އަނެއް ގެއަށް ދިއުން މަނާ ކޮށް ފިޔަވަޅުތައް ހަރުކަށިކޮށްފި އެވެ.
އައްޑޫގެ ކޮވިޑްގެ ހާލަތު ގޯސްވެގެން މޮނިޓަރިންއަށް ލިތާ މިހާރު ވަނީ ހަތަރު މަސް ވެފަ އެވެ. އެކަމާ ގުޅިގެން ރަށުގެ ގިނަ ބަޔަކު ކަންބޮޑުވުން ފާޅުކުރަމުން ދާ ނަމަވެސް އައްޑޫގެ ކޮވިޑް ހާލަތު ރަނގަޅު ނުވާތީ މޮނިޓަރިންގެ ހާލަތު މިހާތަނަށް އުވާލާފައެއް ނުވެ އެވެ.
އައްޑޫ ސިޓީގެ ޖުމްލަ 2768 މީހަކަށް ކޮވިޑް ޖެހިފައިވާއިރު، މިހާތަނަށް 2494 މީހަކު ވަނީ ބަލިން ރަނގަޅުވެފަ އެވެ.
ހާލަތު ގޯސްވެފައިވާ އައްޑޫގައި ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އަންގައިގެން އެޅި ފިޔަވަޅުތައް:
- އާންމުކޮށް އެންމެން އެއްތަނަށް އެއްވެގެން ކުރިއަށް ގެންދެވޭ ހަރަކާތްތައް (ކުޅިވަރު މުބާރާތްތައް، ހަފްލާތައް، ޖަލްސާތައް ފަދަ ކުރިއަށް ގެންދިޔުން ހުއްޓާލުން.)
- ސްކޫލް ކިޔެވުން ފިޔަވައި، ސްކޫލްތަކުގައި ހިންގޭ އެހެނިހެން ހަރަކާތްތައް (މުބާރާތްތައް، ހަފްލާތައް، ޖަލްސާތައް ފަދަ) މިވަގުތު ކުރިޔަށް ގެންދިއުން މަޑުޖައްސާލުން.
- އެއްގެއިން އަނެއް ގެއަށް ޒިޔާރަތްކުރުން ހުއްޓާލުން.
- އައްޑޫގެ ކާފިއު ވަގުތު މިހާރުއޮތްގޮތަށް (ރޭގަނޑު 09,00 އިން ފެށިގެން ފަތިހު 04.00 އަށް) ދެމެހެއްޓުން.
އައްޑޫ އިމަޖެންސީ އޮޕަރޭޝަންސް ސެންޓަރުން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައްޑޫގެ މޭޔަރު އަލީ ނިޒާރު ވިދާޅުވީ ފިޔަވަޅުތައް ހަރުދަނާ ކުރުމަށް ނިންމީ ބައްޔަށް ޕޮޒިޓިވްވާ މީހުންގެ އަދަދު މަދުކުރުމަށް ކަމަށެވެ. އެގޮތުން އެ ފިޔަވަޅުތަކާއި އެކު ކުރިއަށް އޮތް ދެ ހަފްތާގައި ޕޮޒިޓިވްވާ ސާމްޕަލް ތަކުގެ އަދަދު ދަށަށް ނުދާނަމަ އިތުރު ފިޔަވަޅުތަކެއް އެޅުން މަޖުބޫރުވާނެ ކަމަށް ނިޒާރު ވިދާޅުވި އެވެ.
އައްޑޫގެ ކޮވިޑް ހާލަތަށް ބަލާއިރު މިވަގުތު ކޮވިޑް ޖެހިފައި ތިބި މީހުންގެ އަދަދު ވަނީ 264 އަށް އަރާފަ އެވެ. އިއްޔެ އެކަނި 14 މީހަކު އައްޑޫން ޕޮޒިޓިވް ވެފައިވެ އެވެ. ހޮސްޕިޓަލުގައި އެޑްމިޓް ކޮށްގެން ތިން މީހަކަށް ފަރުވާ ދެމުންދާއިރު ކޮވިޑް ޖެހިގެން 10 މީހަކު ވަނީ އައްޑޫން މަރުވެފަ އެވެ.
